<p><strong>Maruti Suzuki Fronx @ 5 Lakh Sales:</strong> భారత ఆటోమొబైల్ మార్కెట్లో మారుతి సుజుకి ఫ్రాంక్స్ మరో అరుదైన రికార్డ్‌ సృష్టించింది. 2023లో మార్కెట్లోకి అడుగుపెట్టిన ఈ క్రాసోవర్, కేవలం మూడు సంవత్సరాల వ్యవధిలోనే 5 లక్షల అమ్మకాల మైలురాయిని దాటింది. నెక్సా బ్రాండ్ చరిత్రలో అత్యంత వేగంగా ఈ ఘనత సాధించిన మోడల్‌గా ఫ్రాంక్స్ కొత్త రికార్డు సృష్టించింది.</p>
<p><strong>ఈ క్రాసోవర్ విజయానికి కారణాలేంటి?</strong><br />ఫ్రాంక్స్ విజయం మరింత ప్రత్యేకం కావడానికి కారణం - పోటీ తీవ్రంగా ఉన్న సెగ్మెంట్‌లో అమ్ముడవుతుండటమే. టాటా నెక్సాన్, హ్యుందాయ్ వెన్యూ, కియా సోనెట్, మహీంద్రా ఎక్స్‌యూవీ 3ఎక్స్‌ఓ, టయోటా టైసర్, నిస్సాన్ మ్యాగ్నైట్, స్కోడా కైలాక్, రెనాల్ట్ కైగర్ వంటి బలమైన ప్రత్యర్థుల మధ్య కూడా ఫ్రాంక్స్ తనకంటూ ప్రత్యేక గుర్తింపు సంపాదించింది.</p>
<p>2023లో ఏప్రిల్ నుంచి డెలివరీలు ప్రారంభమైనప్పటికీ, అదే ఏడాది 94,393 యూనిట్ల అమ్మకాలు నమోదు చేసింది. ఆ తర్వాత 2024లో అమ్మకాలు భారీగా పెరిగి 1,56,236 యూనిట్లకు చేరుకున్నాయి. 2025లో మరింత జోరు చూపిన ఫ్రాంక్స్ 1,79,894 యూనిట్ల సేల్స్‌తో దేశంలో అత్యధికంగా అమ్ముడైన యుటిలిటీ వెహికల్స్‌లో ఒకటిగా నిలిచింది.</p>
<p>2026లో కూడా ఇదే దూకుడు కొనసాగుతోంది. జనవరి నుంచి మే వరకు కేవలం ఐదు నెలల్లోనే 82,306 యూనిట్ల విక్రయాలు నమోదయ్యాయి. ఫిబ్రవరి 2025లో తొలిసారి నెలవారీ అమ్మకాలు 20 వేల మార్క్‌ను దాటి 21,461 యూనిట్లకు చేరుకున్నాయి. డిసెంబర్ 2025లో 20,706 యూనిట్లు అమ్ముడవగా, 2026 మేలో 20,686 యూనిట్లతో మరో బలమైన ప్రదర్శన కనబర్చింది.</p>
<p><strong>ప్రత్యేక డిజైన్</strong><br />ఫ్రాంక్స్ విజయానికి ప్రధాన కారణాల్లో ఒకటి దాని ప్రత్యేక డిజైన్. సాధారణ కాంపాక్ట్ SUVలా కాకుండా హ్యాచ్‌బ్యాక్ సౌలభ్యాన్ని, క్రాసోవర్ స్టైలింగ్‌ను కలిపి రూపొందించడం జనాన్ని ఆకట్టుకుంది. స్లోపింగ్ రూఫ్‌లైన్, ఎత్తైన గ్రౌండ్ క్లియరెన్స్, వెడల్పాటి స్టాన్స్, ఎస్‌యూవీ తరహా డిజైన్ ఫ్రాంక్స్‌ను ఇతర మోడళ్ల కంటే భిన్నంగా నిలిపాయి.</p>
<p><strong>ఇంజిన్‌ ఆప్షన్స్‌</strong><br />ఇంజిన్ ఎంపికలు కూడా ఈ విజయానికి తోడ్పడ్డాయి. ఎంట్రీ వేరియంట్లలో 1.2 లీటర్ నేచురల్లీ ఆస్పిరేటెడ్ పెట్రోల్ ఇంజిన్ అందుబాటులో ఉండగా, ఇది 89 hp పవర్ & 113 Nm టార్క్ ఇస్తుంది. 5 స్పీడ్ మాన్యువల్, AMT గేర్‌బాక్స్ ఆప్షన్లు ఉన్నాయి.</p>
<p>అదే సమయంలో 1.0 లీటర్ బూస్టర్‌జెట్ టర్బో పెట్రోల్ ఇంజిన్ 99 hp పవర్, 147.6 Nm టార్క్‌ అందిస్తుంది. దీనికి 5 స్పీడ్ మాన్యువల్ లేదా 6 స్పీడ్ టార్క్ కన్వర్టర్ ఆటోమేటిక్ ట్రాన్స్‌మిషన్ ఎంపికలు ఉన్నాయి. ఫ్యాక్టరీ ఫిట్‌డ్ CNG వేరియంట్ కూడా వినియోగదారులకు అందుబాటులో ఉంది.</p>
<p><strong>ఫీచర్లు</strong><br />ఫీచర్ల పరంగా కూడా ఫ్రాంక్స్ ఆకట్టుకుంటోంది. 9 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, వైర్‌లెస్ ఆండ్రాయిడ్ ఆటో, ఆపిల్ కార్‌ప్లే, హెడ్ అప్ డిస్‌ప్లే, 360 డిగ్రీ కెమెరా, వైర్‌లెస్ ఛార్జింగ్, క్రూయిజ్ కంట్రోల్, ఆటోమేటిక్ క్లైమేట్ కంట్రోల్, కనెక్టెడ్ కార్ టెక్నాలజీ వంటి సదుపాయాలు ఉన్నాయి.</p>
<p>భద్రత కోసం 6 ఎయిర్‌బ్యాగ్‌లు, ఎలక్ట్రానిక్ స్టెబిలిటీ కంట్రోల్, హిల్ హోల్డ్ అసిస్ట్, ఏబీఎస్ విత్ ఈబీడీ వంటి ఫీచర్లు అందుబాటులో ఉన్నాయి.</p>
<p>ప్రస్తుతం భారత మార్కెట్‌లో ఎస్‌యూవీ తరహా వాహనాలకు పెరుగుతున్న డిమాండ్‌ను ఫ్రాంక్స్ సమర్థంగా అందిపుచ్చుకుంది. రూ.6.85 లక్షల నుంచి రూ.11.98 లక్షల మధ్య ధరలతో అందుబాటులో ఉన్న ఈ క్రాసోవర్, నెక్సా నెట్‌వర్క్‌లోనే కాకుండా దేశీయ మార్కెట్లో కూడా బలమైన శక్తిగా మారింది. ఎగుమతులు కూడా పెరుగుతుండటంతో రాబోయే రోజుల్లో ఫ్రాంక్స్ మరిన్ని రికార్డులు సృష్టించే అవకాశాలు కనిపిస్తున్నాయి.</p>
<p><em><strong>ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.</strong></em></p>
3 hours ago
1 
