<p><strong>Ethanol conversion kits:</strong> దేశంలో ఇథనాల్‌ ఆధారిత ఇంధన వినియోగాన్ని పెంచేందుకు కేంద్ర ప్రభుత్వం వరుస చర్యలు చేపడుతున్న వేళ, వాహనదారులను సంతోషపరిచేలా మరో కీలక సమాచారం వెలుగులోకి వచ్చింది. ప్రస్తుతం రోడ్లపై నడుస్తున్న BS4, BS6 పెట్రోల్‌ కార్లను ఫ్లెక్స్‌ ఫ్యూయల్‌ వాహనాలుగా మార్చేందుకు ఉపయోగించే "ఇథనాల్‌ కన్వర్షన్‌ కిట్లు" భవిష్యత్తులో కేవలం "రూ.15,000 పరిధిలోనే" అందుబాటులోకి వచ్చే అవకాశం ఉందని ఇండియన్‌ షుగర్‌ అండ్‌ బయో ఎనర్జీ మాన్యుఫ్యాక్చరర్స్‌ అసోసియేషన్‌ (ISMA) వెల్లడించింది.</p>
<p>ప్రస్తుతం విదేశాల నుంచి దిగుమతి చేసుకునే ఇలాంటి కిట్ల ధర రూ.40,000 నుంచి రూ.60,000 వరకు ఉండగా, భారత్‌లో స్థానికంగా తయారీ ప్రారంభమైతే ధర భారీగా తగ్గే అవకాశముందని ISMA డైరెక్టర్‌ జనరల్‌ దీపక్‌ బల్లాని తెలిపారు.</p>
<p><strong>BS4, BS6 కార్లపై పరీక్షలు సక్సెస్‌</strong></p>
<p>ఇథనాల్‌ కన్వర్షన్‌ కిట్ల సామర్థ్యాన్ని అంచనా వేయడానికి ISMA, IIT ఢిల్లీతో కలిసి ప్రత్యేక పరీక్షలు నిర్వహించింది. ఇందులో, ఫిన్లాండ్‌కు చెందిన eFlexFuel సంస్థ తయారు చేసిన కన్వర్షన్‌ కిట్లను రెండు వాహనాల్లో అమర్చారు, అవి:</p>
<p>* BS4 Maruti Swift (E10 అనుకూల మోడల్‌)</p>
<p>* BS6 Maruti Dzire (E20 అనుకూల మోడల్‌)</p>
<p>ఈ రెండు కార్లను E15 నుంచి E100 వరకు వివిధ ఇథనాల్‌ మిశ్రమాలతో 10,000 కిలోమీటర్లకు పైగా నడిపి పరీక్షించారు.</p>
<p><strong>ఎంత దూరం నడిపారు?</strong></p>
<p>పరీక్షల్లో భాగంగా BS4 స్విఫ్ట్‌ మొత్తం 10,500 కిలోమీటర్లు ప్రయాణించగా, అందులో 1,000 కిలోమీటర్లు E100 ఇంధనంతో నడిచింది.</p>
<p>BS6 డిజైర్‌ కారు 14,250 కిలోమీటర్లు నడిచింది. ఇందులో 5,000 కిలోమీటర్లు E100 ఇంధనంతో ప్రయోగాలు నిర్వహించారు.</p>
<p><strong>ఫలితాలు ఏమంటున్నాయి?</strong></p>
<p>పరిశోధకులు వాహనాలపై పలు అంశాలను పరిశీలించారు.</p>
<p>* యాక్సిలరేషన్‌<br />* డీసిలరేషన్‌<br />* కోల్డ్ స్టార్ట్‌ పనితీరు<br />* ఇంజిన్‌ స్పందన<br />* ఉద్గారాలు<br />* ఇంధన వినియోగం<br />* ఇంజిన్‌ ఆరోగ్యం</p>
<p>పరీక్షల మొత్తం వ్యవధిలో వాహనాల్లో ఎలాంటి అసాధారణ సమస్యలు కనిపించలేదని నివేదిక వెల్లడించింది.</p>
<p>ఈ కన్వర్షన్‌ కిట్‌లో ప్రత్యేక ఇథనాల్‌ సెన్సార్‌ ఉంటుంది. ఇది ఇంధనంలో ఉన్న ఇథనాల్‌ శాతాన్ని గుర్తించి, దానికి అనుగుణంగా ఫ్యూయల్‌ ఇంజెక్షన్‌ను ఆటోమేటిక్‌గా సర్దుబాటు చేస్తుంది. దీంతో, కారు ఇంజిన్‌ E15, E20, E85 లేదా E100 వంటి వివిధ ఇంధన మిశ్రమాలను వాహనం సులభంగా వినియోగించగలదు.</p>
<p><strong>లక్షలాది వాహనదారులకు ప్రయోజనం</strong></p>
<p>ప్రస్తుతం భారత్‌లో E20 పెట్రోల్‌ వినియోగం విస్తరిస్తుండగా, ఇటీవలే E85 ఇంధనాన్ని కూడా ప్రవేశపెట్టారు. ఇక కేంద్ర ప్రభుత్వం E100 ఇంధనానికి కూడా నిబంధనలకు ఆమోదం తెలిపింది. ఈ నేపథ్యంలో, కన్వర్షన్‌ కిట్లు అందుబాటులోకి వస్తే కొత్త ఫ్లెక్స్‌ ఫ్యూయల్‌ వాహనం కొనాల్సిన అవసరం లేకుండా ఇప్పటికే ఉన్న పెట్రోల్‌ కార్లనే అధిక ఇథనాల్‌ ఇంధనాలకు అనుకూలంగా మార్చుకునే అవకాశం ఉంటుంది.</p>
<p><strong>ఇంకా అనుమతులు రావాల్సి ఉంది</strong></p>
<p>అయితే ప్రస్తుతం ఈ సాంకేతికత వాణిజ్యపరంగా అందుబాటులో లేదు. స్థానికంగా తయారయ్యే కన్వర్షన్‌ కిట్లు మార్కెట్లోకి రావాలంటే కేంద్ర ప్రభుత్వం, ఆటోమోటివ్‌ టెస్టింగ్‌ ఏజెన్సీలు, వాహన తయారీ సంస్థల నుంచి అనుమతులు పొందాల్సి ఉంటుంది. ఈ దిశగా నియంత్రణ వ్యవస్థను రూపొందించాలని ISMA ఇప్పటికే సంబంధిత అధికారులకు ప్రతిపాదనలు పంపింది.</p>
<p><strong>భవిష్యత్తులో పెద్ద మార్పే!</strong></p>
<p>భారత్‌లో E85, E100 ఇంధనాల వినియోగం పెరిగే కొద్దీ ఇలాంటి కన్వర్షన్‌ కిట్లకు డిమాండ్‌ పెరిగే అవకాశముంది. ముఖ్యంగా ఇంధన దిగుమతులపై ఆధారాన్ని తగ్గించడం, రైతులకు అదనపు ఆదాయం కల్పించడం, పర్యావరణ హిత ఇంధనాల వినియోగాన్ని ప్రోత్సహించడం వంటి లక్ష్యాలకు ఇవి కీలకంగా మారనున్నాయి. రూ.15 వేల పరిధిలో ఇలాంటి కిట్లు అందుబాటులోకి వస్తే, లక్షలాది పెట్రోల్‌ వాహనాలు ఫ్లెక్స్‌ ఫ్యూయల్‌ యుగంలోకి అడుగుపెట్టే అవకాశం కనిపిస్తోంది.</p>
<p><em><strong>ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.</strong></em></p>
4 months ago
10 
