<p><strong>Sugar Based Ethanol Ban:</strong> దేశంలో చక్కెర ధరలు పెరుగుతున్న వేళ కేంద్ర ప్రభుత్వం కీలక నిర్ణయం తీసుకున్నట్లు సమాచారం. 2026-27 సరఫరా ఏడాదికి చక్కెర ఆధారిత ఇథనాల్‌ను కొనుగోలు టెండర్ నుంచి మినహాయించినట్లు రాయిటర్స్ నివేదిక వెల్లడించింది. చెరకు రసం, చక్కెర, చక్కెర పాకం, బీ-హెవీ మొలాసిస్‌తో తయారయ్యే ఇథనాల్‌కు ఈసారి టెండర్లలో అవకాశం ఇవ్వలేదు. దేశంలో చక్కెర ఉత్పత్తి తగ్గే ప్రమాదం ఉందన్న ఆందోళనల నేపథ్యంలో ఈ నిర్ణయం తీసుకున్నట్లు తెలుస్తోంది.</p>
<p>చెరుకును ఇథనాల్ తయారీకి మళ్లించకుండా చూడాలని ప్రభుత్వ రంగ చమురు మార్కెటింగ్ సంస్థలకు కేంద్రం సూచించినట్లు రాయిటర్స్ నివేదిక పేర్కొంది. అయితే, ఈ నిర్ణయానికి సంబంధించిన పూర్తి వివరాలను అధికారిక ప్రకటనల తర్వాతే నిర్ధారించుకోవాల్సి ఉంది.</p>
<p><strong>ఇథనాల్ మిశ్రమ పెట్రోల్‌పై ప్రభావం ఉంటుందా?</strong></p>
<p>భారత్ విదేశాల నుంచి ముడి చమురు దిగుమతులపై ఆధారపడటాన్ని తగ్గించేందుకు ఇథనాల్ మిశ్రమ పెట్రోల్ కార్యక్రమాన్ని అమలు చేస్తోంది. పెట్రోల్‌లో ఇథనాల్‌ను కలపడం ద్వారా దిగుమతి ఇంధన వినియోగాన్ని తగ్గించాలని లక్ష్యంగా పెట్టుకుంది. కాలుష్య ఉద్గారాలను తగ్గించడం కూడా ఈ కార్యక్రమంలోని మరో ముఖ్య ఉద్దేశం.</p>
<p>ఈ ఏడాది దేశవ్యాప్తంగా E20 పెట్రోల్‌ను తప్పనిసరి చేశారు. ఇందులో గరిష్ఠంగా 20 శాతం ఇథనాల్ మిశ్రమం ఉంటుంది. అయితే, చక్కెర ఆధారిత ఇథనాల్‌కు బదులుగా మొక్కజొన్న, బియ్యం వంటి ముడి పదార్థాల వినియోగం పెరిగితే సరఫరా వ్యవస్థలో మార్పులు రావచ్చు.</p>
<p>ఇది కూడా చదవండి: <a title="Honda Festive Discounts: హోండా కార్లపై బిగ్‌ డీల్స్‌.. సిటీ, ఎలివేట్, అమేజ్ కొనేవాళ్లకు రూ.2.35 లక్షల వరకు భారీ డిస్కౌంట్లు!" href="https://telugu.abplive.com/auto/honda-festive-discounts-2026-amaze-city-elevate-navratri-dussehra-offers-261848" target="_self">Honda Festive Discounts: హోండా కార్లపై బిగ్‌ డీల్స్‌.. సిటీ, ఎలివేట్, అమేజ్ కొనేవాళ్లకు రూ.2.35 లక్షల వరకు భారీ డిస్కౌంట్లు!</a></p>
<p><strong>పెట్రోల్ ధరలు తగ్గుతాయా, పెరుగుతాయా?</strong></p>
<p>చెరుకును ఇథనాల్ తయారీకి మళ్లించకుండా నిషేధం విధించినప్పటికీ, కేవలం ఈ ఒక్క కారణంతోనే దేశీయ పెట్రోల్‌ ధరల్లో మార్పులు ఉండవు. దేశీయ కారణాల కంటే, అంతర్జాతీయ కారణాలే చమురు ధరలను అధికంగా ప్రభావితం చేస్తాయి. అంటే, అంతర్జాతీయ మార్కెట్లపై ఆధారపడి పెట్రోల్‌ &డీజిల్‌ ధరలు మారుతుంటాయి.</p>
<p><strong>11 బిలియన్ లీటర్ల ఇథనాల్ కొనుగోలుకు టెండర్</strong></p>
<p>2026 నవంబర్‌లో ప్రారంభమయ్యే సరఫరా ఏడాదికి మొత్తం 11 బిలియన్ లీటర్ల ఇథనాల్‌ను కొనుగోలు చేయాలని ఇండియన్ ఆయిల్, భారత్ పెట్రోలియం, హిందుస్థాన్ పెట్రోలియం సంస్థలు లక్ష్యంగా పెట్టుకున్నాయి. ఈ మేరకు టెండర్ ప్రక్రియను చేపట్టినట్లు రాయిటర్స్ తెలిపింది.</p>
<p>ఈసారి మొక్కజొన్న, నూకలు, భారత ఆహార సంస్థ వద్ద ఉన్న మిగులు బియ్యంతో తయారుచేసిన ఇథనాల్‌కు బిడ్లు దాఖలు చేయవచ్చు. అంటే, చక్కెర ఆధారిత ఉత్పత్తికి బదులుగా ఇతర ముడి పదార్థాలతో ఇథనాల్ తయారీకి ప్రాధాన్యం ఇవ్వనున్నారు.</p>
<p>ఇది కూడా చదవండి: <a title="హ్యుందాయ్ కార్లపై దసరా ఆఫర్లు.. క్రెటా నుంచి గ్రాండ్ ఐ10 నియోస్ వరకు భారీ తగ్గింపులు!" href="https://telugu.abplive.com/auto/hyundai-dasara-navratri-discounts-2026-creta-venue-aura-i20-grand-i10-nios-offers-261847" target="_self">హ్యుందాయ్ కార్లపై దసరా ఆఫర్లు.. క్రెటా నుంచి గ్రాండ్ ఐ10 నియోస్ వరకు భారీ తగ్గింపులు!</a></p>
<p><strong>మొక్కజొన్న ఇథనాల్ ధర కూడా తగ్గింపు</strong></p>
<p>మొక్కజొన్నతో తయారుచేసే ఇథనాల్‌కు ఇచ్చే ప్రోత్సాహక మొత్తాన్ని కూడా తగ్గించినట్లు నివేదిక వెల్లడించింది. గతంలో లీటరుకు రూ.5.79గా ఉన్న ప్రోత్సాహకాన్ని రూ.2.79కు తగ్గించారు. దీంతో కొనుగోలు ధర లీటరుకు రూ.71.86 నుంచి రూ.68.86కు పడిపోయింది. ఈ మార్పు ఇథనాల్ తయారీ సంస్థలపై ప్రభావం చూపే అవకాశం ఉంది. ముఖ్యంగా మొక్కజొన్నను ముడి పదార్థంగా ఉపయోగించే సంస్థలు కొత్త ధరల ప్రకారం తమ ఉత్పత్తి ఖర్చులు, లాభాలను లెక్కించుకోవాల్సి ఉంటుంది.</p>
<p><em><strong>ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.</strong></em></p>
1 week ago
2 
