<p>Ysrcp Petition: ఏపీలో స్థానిక సంస్థల ఎన్నికల నిర్వహణకు సంబంధించి హైకోర్టు తీర్పుపై వైఎస్సార్ <a title="కాంగ్రెస్" href="https://telugu.abplive.com/topic/Congress" data-type="interlinkingkeywords">కాంగ్రెస్</a> పార్టీ సుప్రీంకోర్టును ఆశ్రయించింది. వార్డుల విభజన, స్థానిక ఎన్నికల నిర్వహణకు అనుకూలంగా హైకోర్టు ఇటీవల తీర్పును వెలువరించిన విషయం తెలిసిందే. ఈ నేపథ్యంలో ఎన్నికల నిర్వహణకు హైకోర్టు గ్రీన్ సిగ్నల్ ఇవ్వడాన్ని సవాల్ చేస్తూ వైసీపీ సోమవారం సుప్రీంకోర్టులో పిటిషన్ దాఖలు చేసింది. ఈ పిటిషన్‌లో రాష్ట్ర ఎన్నికల కమిషన్‌ను ప్రతివాదిగా చేర్చింది.</p>
<h3>సుప్రీంకోర్టులో వైసీపీ పిటిషన్</h3>
<p>పిటిషన్ దాఖలు చేసిన వెంటనే వైసీపీ తరఫు న్యాయవాది సీజేఐ జస్టిస్ సూర్యకాంత్ ధర్మాసనం ముందు ఈ అంశాన్ని ప్రస్తావించారు. ఇదే అంశానికి సంబంధించి మరో పిటిషన్ కూడా దాఖలైందని, అది శుక్రవారం విచారణకు వచ్చే అవకాశం ఉందని ధర్మాసనం తెలిపింది. అయితే, ఏ క్షణంలోనైనా ఎన్నికల షెడ్యూల్ విడుదలయ్యే అవకాశం ఉన్నందున, అంతకంటే ముందే తమ పిటిషన్‌పై విచారణ చేపట్టాలని వైసీపీ తరఫు న్యాయవాది కోరారు. <br /><br />Also Read: <a title="స్థానిక ఎన్నికల్లో జగన్ మార్క్ క్లాస్ - కూటమి విభేదాలపై వైఎస్సార్‌సీపీ పొలిటికల్ అటాక్ -" href="https://telugu.abplive.com/politics/ysrcp-local-body-elections-strategy-jagan-review-tdp-janasena-rift-260616" target="_self">స్థానిక ఎన్నికల్లో జగన్ మార్క్ క్లాస్ - కూటమి విభేదాలపై వైఎస్సార్‌సీపీ పొలిటికల్ అటాక్ -</a></p>
<h3>బీసీ రిజర్వేషన్లు-వివాదాలు </h3>
<p>స్థానిక సంస్థల ఎన్నికల్లో బీసీ రిజర్వేషన్ల అమలు, వార్డుల పునర్విభజన వంటి అంశాలపై గత కొంతకాలంగా రాష్ట్రంలో రాజకీయ, న్యాయపరమైన ఉత్కంఠ కొనసాగుతోంది. స్థానిక ఎన్నికల్లో బీసీ రిజర్వేషన్ల శాతాన్ని ఖరారు చేసే విషయంలో, ముందస్తుగా చేపట్టిన కసరత్తుపై పలు విమర్శలు వ్యక్తమయ్యాయి. గతంలో బీసీ రిజర్వేషన్లు, ఎన్నికల ప్రక్రియకు సంబంధించి హైకోర్టులో వాదనల తర్వాతే ఈ తీర్పు వెలువడింది. ఈ తీర్పు ద్వారా ఎన్నికల నిర్వహణకు మార్గసుగమం కాగా, తాజాగా వైసీపీ ఈ తీర్పును సుప్రీంకోర్టులో సవాల్ చేయడం రాజకీయంగా ప్రాధాన్యత సంతరించుకుంది. ఎన్నికల షెడ్యూల్ వెలువడే ముందే అత్యున్నత ధర్మాసనం ఈ పిటిషన్‌పై ఎలాంటి నిర్ణయం తీసుకుంటుందనేది ఆసక్తికరంగా మారింది. </p>
<p>స్థానిక సంస్థల ఎన్నికల్లో బీసీలకు 34% రిజర్వేషన్లు కల్పిస్తూ ఏపీ ప్రభుత్వం ఇటీవల జీవోలు 105, 1065లను జారీ చేసింది. ఈ జీవోలను హైకోర్టు కొట్టివేసింది. హైకోర్టు తీర్పును సవాల్‌ చేస్తూ ఏపీ ప్రభుత్వం సుప్రీంకోర్టులో పిటిషన్‌ దాఖలు చేసింది. ఈ పిటిషన్‌‌పై ఈ వారం విచారణ జరిగే అవకాశం ఉంది.</p>
<p>Also Read: <a title=" రిజర్వేషన్లపై 50% పరిమితి అన్ని సమయాల్లో తప్పనిసరి కాదు.. సుప్రీంకోర్టు పిటిషన్‌లో ఏపీ ప్రభుత్వం వాదన!" href="https://telugu.abplive.com/andhra-pradesh/ap-government-approaches-supreme-court-over-local-body-reservations-ruling-over-high-court-order-260664" target="_self"> రిజర్వేషన్లపై 50% పరిమితి అన్ని సమయాల్లో తప్పనిసరి కాదు.. సుప్రీంకోర్టు పిటిషన్‌లో ఏపీ ప్రభుత్వం వాదన!</a></p>
3 weeks ago
4 
