<p>తాడేపల్లి: ఏపీలో స్థానిక సంస్థల ఎన్నికల ప్రక్రియ సాగుతున్న తీరుపై వైఎస్సార్ <a title="కాంగ్రెస్" href="https://telugu.abplive.com/topic/Congress" data-type="interlinkingkeywords">కాంగ్రెస్</a> పార్టీ అధినేత, మాజీ సీఎం వైఎస్ జగన్ మోహన్ రెడ్డి తీవ్రస్థాయిలో ధ్వజమెత్తారు. రిజర్వేషన్లు ప్రకటించిన వెంటనే కనీసం ఎస్ఐఆర్ ప్రక్రియ కూడా పూర్తి చేయకుండా నోటిఫికేషన్ విడుదల చేశారని ఆయన విమర్శించారు. అధికార కూటమి ముందస్తుగానే తమ అభ్యర్థులను, రిజర్వేషన్లను సెట్ చేసుకున్న తర్వాత, వైఎస్సార్సీపీకి ఏమాత్రం సమయం ఇవ్వకుండా ఎన్నికల షెడ్యూల్ తెచ్చారని ఆరోపించారు. నామినేషన్లు దాఖలు చేస్తున్న తమ పార్టీ అభ్యర్థులను పోలీసులు అరెస్టు చేయడం, వారిపై లాఠీచార్జ్ చేయడం దారుణమని మండిపడ్డారు. అధికారులు, రిటర్నింగ్ ఆఫీసర్లు నామినేషన్ పత్రాలను తీసుకోవడం లేదంటే రాష్ట్రంలో అసలు రాజ్యాంగబద్ధ పాలన, చట్టం, న్యాయం ఉన్నాయా లేదా అని ప్రశ్నించారు. డీజీపీ, హోంమంత్రి, ఎన్నికల సంఘం నిద్రపోతున్నాయని, పోలీసులు వైసీపీ అభ్యర్థులు, నాయకులపై దాడి చేస్తూ టీడీపీ నేతలకు పూర్తిస్థాయిలో సహకరిస్తున్నారని ధ్వజమెత్తారు.</p>
<p>గతంలో అనుకూలం లేకున్నా 13 కార్పొరేషన్లు నెగ్గాం..</p>
<p>గతంలో తమ వైఎస్సార్సీపీ పాలనలో స్థానిక ఎన్నికలు జరిగాయని, నాటి ఎస్ఈసీ నిమ్మగడ్డ ప్రసాద్ టీడీపీ కోసం కాళ్లకు బలపం కట్టుకుని తిరిగినప్పటికీ, ఎన్నికల కోడ్ రాగానే భారీ ఎత్తున పోలీసుల బదిలీలు జరిగినప్పటికీ, తాము చేసిన సంక్షేమ పథకాలు, అభివృద్ధి ఆధారంగానే 13 మున్సిపల్ కార్పొరేషన్లను వైఎస్సార్సీపీ స్వీప్ చేసిందని జగన్ గుర్తుచేశారు. కానీ నేడు చంద్రబాబు హయాంలో సూపర్ 6, సూపర్ సెవెన్ హామీలను గాలికి వదిలేసి, ప్రజలకు బాండ్లు ఇచ్చి ఎగ్గొట్టారని విమర్శించారు. ఎక్కడ చూసినా అవినీతి, ‘రెడ్ బుక్’ రాజ్యాంగమే కనిపిస్తోందని అన్నారు. </p>
<p>ఎస్ఈసీ చంద్రబాబుకు వీరవిధేయుడు</p>
<p>చంద్రబాబుకు నిష్పక్షపాతంగా ఎన్నికలు జరిపే ధైర్యం లేకనే నామినేషన్లు వేసేందుకు వచ్చే తమ పార్టీ అభ్యర్థులను భయాందోళనకు గురిచేస్తున్నారని ఆరోపించారు. గతంలో సీఎస్ విధులపై హైకోర్టు ఆగ్రహం వ్యక్తం చేసి తొలగించిన మాజీ అధికారి అనిల్ చంద్ర పునేఠా చంద్రబాబుకు వీరవిధేయుడని, పదవీ విరమణ చేసినప్పటికీ ఆయనను మళ్లీ తెచ్చి ఎస్ఈసీగా నియమించారని, ఆయన చంద్రబాబు చెప్పినట్లు వినడం వల్లే రాష్ట్రంలో నామినేషన్ల ప్రక్రియలో తీవ్ర అరాచకాలు జరుగుతున్నాయని వైఎస్ జగన్ స్పష్టం చేశారు.</p>
<p>రాష్ట్రవ్యాప్తంగా వివిధ నియోజకవర్గాల్లో చోటుచేసుకున్న ఘటనలను వివరిస్తూ.. పుంగనూరులో లోక్‌సభ ఫ్లోర్ లీడర్, ఎంపీ మిథున్ రెడ్డితో పాటు ఇతర వైఎస్సార్సీపీ నాయకులపై మారణాయుధాలతో దాడులకు తెగబడ్డారని వైఎస్ జగన్ ఆరోపించారు. పూర్తి టీటోటలర్ అయిన ఎంపీ మిథున్ రెడ్డి కార్లలో మద్యం సీసాలు పెట్టి విషయాన్ని తిప్పికొట్టే కుట్రలు చేశారని, వారి వాహనాలను ధ్వంసం చేశారని ఆరోపించారు. డీఎస్సీ స్కామ్‌లో ప్రధాన నిందితుడు, శాప్ ఛైర్మన్ రవి నాయుడు నామినేషన్ కేంద్రంలో పోలీసుల మైక్ తీసుకొని బెదిరింపులకు దిగుతుంటే పోలీసులు చేతులు కట్టుకుని చూశారని విమర్శించారు. ఎస్ఎమ్ నయాజ్ ఆయన భార్యతో కలిసి వెళ్తే పోలీసుల ముందే దాడి చేసి నామినేషన్ పత్రాలు లాక్కున్నారన్నారు. </p>
<p>తిరుపతిలో తమ మేయర్ అభ్యర్థి వాసు యాదవ్ నామినేషన్ వేయకుండా అడ్డుకున్నారని, ఆయనకు మద్దతుగా వెళ్లిన ఎంపీ గురుమూర్తి చేతిలో ఉన్న పత్రాలను కూడా లాక్కున్నారని తెలిపారు. వాసు యాదవ్ తన తల్లితో కలిసి నిరసన తెలిపారని, అసలు వీళ్లు ప్రభుత్వానికా లేక చంద్రబాబు కోసమా పనిచేసేదని పోలీసుల తీరుపై తీవ్ర ఆగ్రహం వ్యక్తం చేశారు. నామినేషన్ వేసేందుకు వచ్చిన ఒక కార్పొరేటర్ అభ్యర్థి కొడుకుపై కత్తి దాడికి కూడా తెగబడ్డారని వాపోయారు.</p>
<p>కడప జిల్లా బద్వేల్‌లో టీడీపీ ఎమ్మెల్యే భర్త, ఇన్‌ఛార్జ్ సూర్యనారాయణరెడ్డి బెదిరింపులకు దిగుతూ.. ఆర్వో కార్యాలయంలోకి చొరబడి పోలీసుల సమక్షంలోనే వైఎస్సార్సీపీ అభ్యర్థుల నామినేషన్ పత్రాలను చించేశారని జగన్ ఆరోపించారు. రాజంపేటలో మేయర్ అభ్యర్థిగా పోటీ చేస్తున్న మహిళ, ఆమె తండ్రిపై భౌతిక దాడులు చేశారని, మహిళలపై ఇలాంటి దాడులు చేయడానికి <a title="చంద్రబాబు" href="https://telugu.abplive.com/topic/Chandrababu" data-type="interlinkingkeywords">చంద్రబాబు</a>కు సిగ్గులేదా అని ప్రశ్నించారు. దర్శిలోనూ తమ అభ్యర్థులను నామినేషన్లు వేయకుండా అడ్డుకున్నారని తెలిపారు. ఇక పులివెందులలో పరిస్థితి మరింత దారుణంగా మారిందని, అక్కడ జరుగుతున్న అరాచకాలపై ఎంపీ అవినాష్ రెడ్డి పోలీసు అధికారులకు సమాచారం ఇచ్చినప్పటికీ, నామినేషన్ల కోసం వెళ్తున్న వైఎస్సార్సీపీ నేతలపై పోలీసులే స్వయంగా ఏకే-47 తుపాకీలతో ఫైరింగ్ చేశారని సంచలన ఆరోపణ చేశారు. <a title="టీడీపీ" href="https://telugu.abplive.com/topic/tdp" data-type="interlinkingkeywords">టీడీపీ</a> గూండాలు కర్రలు, రాడ్లు, వేటకొడవళ్లతో దాడులకు తెగబడటంతో పాటు పోలీసులే రాళ్లు విసురుతూ కార్లను ధ్వంసం చేశారని వైఎస్ <a title="జగన్" href="https://telugu.abplive.com/topic/cm-jagan" data-type="interlinkingkeywords">జగన్</a> తీవ్ర స్థాయిలో విరుచుకుపడ్డారు.</p>
1 week ago
2 
