<p><strong>World oldest man dies of asthma attack after 121st birthday party:</strong> దశాబ్దాల పాటు ధూమపానం చేస్తూ కూడా శతాధిక వృద్ధుడిగా నిలిచిన ఒక వ్యక్తి ఉదంతం ఇప్పుడు ప్రపంచవ్యాప్తంగా చర్చనీయాంశమైంది. తన 121వ పుట్టినరోజు వేడుకలు జరుపుకున్న కొద్ది గంటల్లోనే శ్వాసకోశ సమస్య తో ఆయన కన్నుమూశాడు. </p>
<p>దక్షిణాఫ్రికాకు చెందిన జాన్ స్టీన్‌బర్గ్ (Jan Steenberg) తనను తాను ప్రపంచంలోనే అత్యంత వృద్ధుడిగా పేర్కొనేవారు. ఆయన 1904, డిసెంబర్ 31న జన్మించినట్లు చెప్తారు. రెండు ప్రపంచ యుద్ధాలు, వర్ణ వివక్ష వ్యతిరేక పోరాటాలు , ఇటీవల కోవిడ్-19 మహమ్మారిని కూడా తట్టుకుని ఆయన జీవించారు. తన 121వ పుట్టినరోజును కుటుంబ సభ్యులు , స్నేహితుల మధ్య ఘనంగా జరుపుకున్న ఆయన, మరుసటి రోజే జనవరి 1, 2026 మరణించారు. </p>
<p>జాన్ స్టీన్‌బర్గ్ తన 14వ ఏట నుంచే ధూమపానం ప్రారంభించారు. అంటే దాదాపు 100 ఏళ్లకు పైగా ఆయన నిరంతరం పొగతాగారు. సాధారణంగా ధూమపానం ఊపిరితిత్తుల ఆరోగ్యాన్ని దెబ్బతీస్తుందని, ఆయుష్షును తగ్గిస్తుందని వైద్యులు హెచ్చరిస్తుంటారు. కానీ, జాన్ విషయంలో మాత్రం ఆయన సెంచరీ దాటిన తర్వాత కూడా ఆరోగ్యంగా ఉండటం అందరినీ ఆశ్చర్యానికి గురిచేసింది. ఆయన తన దీర్ఘాయువుకు దేవుడి ఆశీస్సులే కారణమని తరచుగా చెప్పేవారు. </p>
<blockquote class="twitter-tweet">
<p dir="ltr" lang="en">A South African man believed to be one of the country’s oldest residents has passed away shortly after marking what was claimed to be his 121st birthday.<br /><br />Jan Steenberg, known affectionately as Oom Jan, died on New Year’s Day in Colchester, Eastern Cape province, following an… <a href="https://t.co/5WpqRxzGlH">pic.twitter.com/5WpqRxzGlH</a></p>
— The scoop stateside (@ScoopStateside) <a href="https://twitter.com/ScoopStateside/status/2009220727719780572?ref_src=twsrc%5Etfw">January 8, 2026</a></blockquote>
<p>పుట్టినరోజు వేడుకలు ముగిసిన కొద్ది గంటలకే ఆయన తీవ్రమైన ఆస్తమా అటాక్‌కు గురయ్యారు. శ్వాస తీసుకోవడం కష్టమవడంతో ఆసుపత్రికి తరలించే లోపే ఆయన తుది శ్వాస విడిచారు. వందేళ్ల పాటు ధూమపానం చేసినా రాని సమస్య, చివరికి శ్వాసకోశ సంబంధిత ఇబ్బంది రూపంలో వచ్చి ఆయన ప్రాణాలను తీసింది. </p>
<p>జాన్ స్టీన్‌బర్గ్ తన జీవితకాలంలో జాలరిగా , గోల్ఫ్ మైదానంలో పని వాడిగా విధులు నిర్వహించారు. ఆయన అత్యంత నిరాడంబరంగా ఉండేవారని, ఎప్పుడూ సూట్ , హ్యాట్ ధరించి హుందాగా కనిపించేవారని స్థానికులు గుర్తు చేసుకుంటారు. అధికారికంగా గిన్నిస్ వరల్డ్ రికార్డ్స్ ఆయన వయస్సును ధృవీకరించనప్పటికీ, స్థానిక రికార్డుల ప్రకారం ఆయనే ప్రపంచంలో అత్యంత వృద్ధుడని గ్రామస్థులు నమ్ముతారు. </p>
<p> </p>
<p><iframe class="vidfyVideo" style="border: 0px;" src="https://telugu.abplive.com/web-stories/education/how-to-get-reliance-foundation-scholarships-233675" width="631" height="381" scrolling="no"></iframe><br /> </p>
3 months ago
8 
