<p><strong>Warangal NIT: </strong>దేశంలోని ప్రముఖ ఇంజినీరింగ్ విద్యాసంస్థల్లో ఒకటైన నేషనల్ ఇన్‌స్టిట్యూట్ ఆఫ్ టెక్నాలజీ (ఎన్‌ఐటీ) వరంగల్ మరోసారి తన సత్తా చాటుకుంది. ప్రస్తుత సవాళ్లతో కూడిన ఉద్యోగ మార్కెట్ పరిస్థితుల మధ్య 2025–26 ప్లేస్‌మెంట్ సీజన్‌లో అద్భుతమైన విజయాన్ని సాధించింది. అండర్ గ్రాడ్యుయేట్, పోస్ట్ గ్రాడ్యుయేట్ విద్యార్థుల ప్లేస్‌మెంట్‌లలో సంస్థ అత్యుత్తమ ఫలితాలు నమోదు చేసింది. అర్హత కలిగిన 704 మంది యూజీ విద్యార్థులలో 660 మందికి పైగా ఉద్యోగాలు లభించగా, 93.75 శాతం ప్లేస్‌మెంట్ రేటు నమోదైంది. పీజీ స్థాయిలో 860 మంది అర్హులైన విద్యార్థులలో 677 మంది ఉద్యోగాలు సాధించి 78.72 శాతం ప్లేస్‌మెంట్ రేటు నమోదు చేశారు. ప్రస్తుతం కొంతమంది విద్యార్థులు ఇంటర్న్‌షిప్‌లు కొనసాగిస్తూ పూర్తి స్థాయి ఉద్యోగ ఆఫర్ల కోసం ఎదురుచూస్తున్నారు. ఆఫ్-క్యాంపస్ ప్లేస్‌మెంట్‌లు, ఉన్నత విద్యలో చేరిన విద్యార్థులను పరిగణనలోకి తీసుకుంటే, యూజీ ప్లేస్‌మెంట్ రేటు 95 శాతం, పీజీ ప్లేస్‌మెంట్ రేటు 80 శాతానికి మించి ఉండే అవకాశం ఉంది.</p>
<p>ఈ ప్లేస్‌మెంట్ సీజన్‌లో ఎన్‌ఐటీ వరంగల్ చారిత్రాత్మక మైలురాయిని సాధించింది. దేశీయంగా అత్యధిక వార్షిక వేతన ప్యాకేజీ రూ.1.27 కోట్లకు చేరుకోగా, రూ.70 లక్షల కంటే అధిక విలువ కలిగిన అనేక ఆఫర్లు విద్యార్థులకు లభించాయి. యూజీ విద్యార్థులకు సగటు సీటీసీ రూ.18.54 లక్షలు, మధ్యస్థ సీటీసీ రూ.15 లక్షలు నమోదయ్యాయి. పీజీ విద్యార్థులకు సగటు సీటీసీ రూ.12.13 లక్షలు, మీడియన్ సీటీసీ రూ.9 లక్షలుగా నమోదయ్యాయి. ముఖ్యంగా దాదాపు అన్ని యూజీ విభాగాలు గత సంవత్సరంతో పోలిస్తే అధిక ప్లేస్‌మెంట్ శాతాలను నమోదు చేయడం విశేషం.</p>
<p><br /><img src="https://feeds.abplive.com/onecms/images/uploaded-images/2026/06/24/212469cab60082fcc2d899254a29eb8d1782298022584215_original.jpeg" /></p>
<p>2025–26 ప్లేస్‌మెంట్ డ్రైవ్‌లో 360కిపైగా ప్రముఖ సంస్థలు పాల్గొన్నాయి. ఇది గత సంవత్సరాలతో పోలిస్తే గణనీయమైన పెరుగుదల కాగా, ఎన్‌ఐటీ వరంగల్ విద్యార్థుల ప్రతిభపై పరిశ్రమల విశ్వాసాన్ని ప్రతిబింబిస్తోంది.</p>
<p><br /><img src="https://feeds.abplive.com/onecms/images/uploaded-images/2026/06/24/768652bd74be79ff167beaa4142abdbb1782298059722215_original.jpeg" /></p>
<h2>ఈ విజయాల్లో ముఖ్యాంశాలు:</h2>
<p>• 6 మంది విద్యార్థులు రూ.70 లక్షలకుపైగా వార్షిక వేతన ఆఫర్లను పొందారు.<br />• 27 మంది విద్యార్థులు రూ.50 లక్షలకుపైగా ప్యాకేజీలను సాధించారు.<br />• 130 మందికిపైగా విద్యార్థులు రూ.30లక్షలకుపైగా వార్షిక వేతన ఆఫర్లు పొందగా, 720 మందికి పైగా విద్యార్థులు రూ.10 లక్షలకు మించిన ప్యాకేజీలను సాధించారు.<br />• సాఫ్ట్‌వేర్ డెవలప్‌మెంట్ (410 ఆఫర్లు), కోర్ ఇంజినీరింగ్ (480 ఆఫర్లు), అనలిటిక్స్ (230 ఆఫర్లు)తో పాటు ఇతర రంగాల్లోనూ గణనీయమైన ఉద్యోగ అవకాశాలు లభించాయి.</p>
<p>గత మూడు సంవత్సరాల ప్లేస్‌మెంట్ గణాంకాలు కూడా ఎన్‌ఐటీ వరంగల్ పురోగతిని స్పష్టంగా చూపిస్తున్నాయి. 2024లో 305 సంస్థలు పాల్గొనగా, 2026 నాటికి ఈ సంఖ్య 360కుపైగా పెరిగింది. యూజీ ప్లేస్‌మెంట్ శాతం 83 శాతం నుంచి 93.75 శాతానికి పెరగడం విశేషం. ఈ విజయంపై స్పందించిన ఎన్‌ఐటీ వరంగల్ డైరెక్టర్ ప్రొఫెసర్ బిధ్యాధర్ సుబుధి విద్యార్థులు, అధ్యాపకులను అభినందించారు. విద్యార్థులకు నిరంతరం సాఫ్ట్ స్కిల్స్ శిక్షణ అందిస్తూ వారి కెరీర్ అభివృద్ధికి కృషి చేస్తున్న సెంటర్ ఫర్ కెరీర్ ప్లానింగ్ అండ్ డెవలప్‌మెంట్ బృందాన్ని, దాని అధిపతి ప్రొఫెసర్ పి.వి.సురేష్ నాయకత్వాన్ని ఆయన ప్రశంసించారు. ఈ ప్లేస్‌మెంట్ విజయం సంస్థలోని విద్యా నాణ్యత, విద్యార్థుల నైపుణ్యాభివృద్ధి, సమిష్టి కృషికి నిదర్శనమని ఆయన పేర్కొన్నారు. సంస్థ డీన్లు, విభాగాధిపతులు, రిజిస్ట్రార్ విద్యార్థులతో పాటు సీసీపీడీ బృందానికి అభినందనలు తెలియజేశారు.</p>
4 months ago
10 
