<p>విజయనగరం: స్థానిక సంస్థల ఎన్నికల సందర్భంగా విజయనగరం రాజకీయం మరింత ఆసక్తికరంగా మారింది. కొన్ని రోజుల కిందటే వైసీపీని వీడి తెలుగుదేశం పార్టీలో చేరారు విజయనగరం జిల్లా పరిషత్ మాజీ ఛైర్మన్, బొత్స సత్యనారాయణ మేనల్లుడు మజ్జి శ్రీనివాసరావు అలియాస్ చిన్నశ్రీను. ఆయన తన కుమార్తె సహస్రను తెర్లాం ZPTC స్థానం నుంచి పోటీలో నిలిపారు. అయితే ఓసీ అయిన మజ్జి సహస్త్రను బీసీ స్థానం నుంచి పోటీలో నిలిపారంటూ వైసీపీ నేతలు ఫిర్యాదు చేశారు. వివరాలు పరిశీలించి, ఆమె నామినేషల్ క్యాన్సిల్ చేయాలని డిమాండ్ చేస్తున్నారు. </p>
<p>ఒకప్పుడు ఒకే ఫ్యామిలీగా, ఓకే ఫ్యామిలీలో ఉండి.. విజయనగరం జిల్లా రాజకీయాలను శాసించిన బొత్స సత్యనారాయణ- చిన్న శ్రీను ఇప్పుడు రెండు పార్టీల్లో ప్రత్యర్థులుగా తలపడుతున్నారు. విజయనగరం జిల్లా పరిషత్ ఛైర్మన్ పీఠం చాన్నాళ్లుగా ఎమ్మెల్సీ బొత్స కుటుంబం చేతిలోనే ఉండేది. ముందుగా బొత్స సత్యనారాయణ భార్య ఝాన్సీ, ఆ తర్వాత ఆయన మేనల్లుడు చిన్న శ్రీను ఛైర్మన్‌లుగా చేశారు. ఇటీవల బొత్స తన రాజకీయ వారసురాలిగా కూతురును తెరపైకి తీసుకురావడంతో చిన్న శ్రీను టీడీపీలో చేరారు. జిల్లా రాజకీయాల్లో పట్టు కోసం తన కుమార్తె సిరి సహస్రను తెర్లాం మండలం నుంచి జెడ్పీటీసీగా పోటీ చేయిస్తున్నారు. ఆమెను జెడ్పీ ఛైర్మన్‌ను చేస్తారన్న ప్రచారం జరుగుతోంది. బొత్స కూతురు అనూష సైతం జడ్పీ చైర్మన్ రేసులో ఉన్నారు.</p>
<p>ఎన్నికలకు ముందే చిన్న శ్రీనుకు కొత్త సమస్య వచ్చింది. కుమార్తె సిరి సహస్రకు చిన్న శ్రీను కన్న తండ్రి కాదని తెలిసిందే. ఆమెను శ్రీను దత్తత తీసుకున్నారు. మజ్జి సహస్ర అసలు పేరు ముష్కాన్‌జైన్ అని.. ఆమె తండ్రి రమేష్‌ జైన్ అని వైసీపీ తెర్లాం అభ్యర్థి రిటర్నింగ్ అధికారికి ఫిర్యాదు చేశారు. ఆమె బీసీ కాకపోయినప్పటికీ నిబంధనలకు విరుద్ధంగా సహస్ర బీసీ స్థానం నుంచి పోటీ చేశారని ఫిర్యాదులో పేర్కొన్నారు. </p>
<p>అయితే టీడీపీ నేతలు మాత్రం దత్తత తీసుకోవడంతో సహస్త్ర చట్టబద్ధంగా చిన్న శ్రీను కుమార్తె అని.. తనకు ప్రభుత్వం నుంచి బీసీ సర్టిఫికెట్ ఉందని చెబుతున్నారు. తమ ఫిర్యాదు పెండింగ్‌లో ఉండగానే ఎమ్మార్వో ఆమెకు బీసీ సర్టిఫికెట్ ఎలా జారీ చేస్తారని వైసీపీ నేతలు ప్రశ్నిస్తున్నారు. తప్పుడు సర్టిఫికెట్‌తో <a title="టీడీపీ" href="https://telugu.abplive.com/topic/tdp" data-type="interlinkingkeywords">టీడీపీ</a> అభ్యర్థి సహస్త్ర నామినేషన్ వేశారని, దీనిపై కోర్టుకు వెళతామని విజయనగరం జిల్లా వైసీపీ అధ్యక్షుడు బెల్లాన చంద్రశేఖర్ చెబుతున్నారు.</p>
<p><br /><img src="https://feeds.abplive.com/onecms/images/uploaded-images/2026/10/25/49a6dc36b1a4de6c9759c091b7dc601d1792919590393233_original.jpg" /></p>
<p><strong>చిన్న శ్రీను ప్లాన్ బీ ఇదేనా..</strong></p>
<p>ఒకవేళ తెర్లాంలో వేసిన నామినేషన్ కనుక చెల్లుబాటు కాదని, ఎన్నికలు అధికారులు రిజెక్ట్ చేసినా ప్లాన్ బీ రెడీ చేసుకున్నారు. జెడ్పీ సీట్ ను కచ్చితంగా కాపాడుకునేందుకు చిన్న శ్రీను బ్యాకప్ ఉంచుకున్నారు. కుమార్తె సహస్రతో కొత్త వలస లో కూడా నామినేషన్ వేయించారు. కొత్త వలస సీట్ ఓసీకే కేటాయించారు. కనుక ఆ స్థానంలో ఆమెకు కులం అడ్డంకి కాదని భావిస్తున్నారు. కనుక తెర్లాంలో నామినేషన్ రిజెక్ట్ అయితే... కొత్తవలస జెడ్పీ స్థానం నుంచి బరిలో నిలుస్తారు.</p>
<p><strong>మరోవైపు బొత్సకు షాక్..</strong></p>
<p>పూసపాటిరేగ జడ్పీటీసీ అభ్యర్థి బొత్స చైతన్య నామినేషన్‌ను రిటర్నింగ్ అధికారి తిరస్కరించడంతో బొత్స కుటుంబానికి ఎదురుదెబ్బ తగిలింది. మజ్జి శ్రీనివాసరావు వైసీపీని వీడిన తర్వాత విజయనగరంలో పట్టు నిలుపుకునేందుకు బొత్స తన కుటుంబంలోని నలుగురిని బరిలోకి దించారు. చైతన్య నామినేషన్ రద్దయినా, ఆయన కుమార్తె అనూష (బొండపల్లి), కోడలు పూజిత (గరివిడి), చెల్లెలు లక్ష్మి (గుర్ల) స్థానిక సంస్థల ఎన్నికల రేసులో ఉన్నారు.</p>
5 days ago
2 
