<p style="text-align: justify;">US President Donald Trump | అమెరికా సైన్యం తమ దేశ రాజధాని కారకాస్‌లోకి గగనతలం ద్వారా ప్రవేశించి కొన్ని నిమిషాల వ్యవధిలో వెనిజులా అధ్యక్షుడు నికోలస్ మదురో, ఆయన భార్యను బంధీలుగా తీసుకెళ్లారు. దాంతో దేశంలో తలెత్తిన రాజకీయ సంక్షోభం సమయంలో వెనెజులా సుప్రీంకోర్టు కీలక నిర్ణయం తీసుకుంది. వెనిజులాకి తాత్కాలిక అధ్యక్షురాలిగా డెల్సీ రోడ్రిగ్జ్‌ను నియమించాలని ఆదేశించింది. సుప్రీంకోర్టు రాజ్యాంగ విభాగం, దేశ ఉపాధ్యక్షురాలైన డెల్సీ రోడ్రిగ్జ్, మదురో లేని సమయంలో దేశానికి తాత్కాలిక అధ్యక్షురాలిగా సేవలు అందించాలని ఆదేశించింది. నికోలస్ మదురోను శనివారం (జనవరి 3) ఉదయం అమెరికా సైన్యం ఒక ఆపరేషన్‌లో భాగంగా కారకస్ లో అదుపులోకి తీసుకుంది. </p>
<p style="text-align: justify;">సుప్రీంకోర్టు తీర్పు ప్రకారం, పరిపాలనా కొనసాంచడంతో పాటు దేశ సమగ్ర రక్షణకు హామీ ఇవ్వడానికి రోడ్రిగ్జ్ బొలివరియన్ రిపబ్లిక్ ఆఫ్ వెనెజులా అధ్యక్షురాలిగా బాధ్యతలు స్వీకరిస్తారు. అధ్యక్షుడి గైర్హాజరీలో దేశ పాలన నిర్వహణకు, ప్రభుత్వ కార్యకలాపాల కొనసాగింపు, దేశ సార్వభౌమాధికారాన్ని రక్షించడానికి చట్టపరమైన విధివిధానాలు నిర్ధారించడానికి ఈ కేసును కోర్టు పరిశీలిస్తుందని కూడా సుప్రీంకోర్టు తమ ఆదేశాలలో పేర్కొంది.</p>
<p style="text-align: justify;"><strong>డెల్సీ రోడ్రిగ్జ్ ఎవరు</strong><br />వెనెజులాలో అమెరికా సైనిక చర్యతో రాజకీయ సంక్షోభం తలెత్తింది. అమెరికా అధ్యక్షుడు డొనాల్డ్ ట్రంప్ అయితే తామే కొంతకాలం పాటు వెనిజులా పరిపాలనా బాధ్యతలు చూస్తామని, ఆ తరువాతే అధికార మార్పిడి చేస్తామని ప్రకటించారు. అధ్యక్షుడు నికోలస్ మాదురో అరెస్ట్ అయిన తర్వాత, దేశ కమాండ్ కార్యనిర్వాహక ఉపాధ్యక్షురాలు డెల్సీ రోడ్రిగ్జ్ అధికారం చేపట్టనున్నారు. అధ్యక్షుడి గైర్హాజరీ విషయంలో వైస్ ప్రెసిడెంట్ బాధ్యతలు చేపట్టాలని వెనెజులా రాజ్యాంగంలో ఇదే నిబంధన పొందుపరిచారు. ఆర్టికల్ 233, ఆర్టికల్ 234 ప్రకారం, అధ్యక్షుడి గైర్హాజరీ తాత్కాలికమైనా లేదా శాశ్వతమైనా, ఉపాధ్యక్షుడే బాధ్యతలు చేపట్టాలి.</p>
<p style="text-align: justify;">డెల్సీ రోడ్రిగ్జ్ వెనెజులా ఆర్థిక, చమురు శాఖల మంత్రిగా కొనసాగుతున్నారని తెలిసిందే. మదురో, అతని భార్య సిలియా ఫ్లోర్స్ అరెస్ట్ అయిన కొన్ని గంటల తర్వాత, ఆమె తోటి మంత్రులు, సీనియర్ అధికారులతో కలిసి జాతీయ రక్షణ మండలి సమావేశానికి అధ్యక్షత వహించారు. ఈ సమయంలో డెల్సీ అమెరికా సైనిక చర్యను తీవ్రంగా ఖండించారు. తమ అధ్యక్షుడు మదురోతో పాటు అతని భార్యను తక్షణమే విడుదల చేయాలని డిమాండ్ చేశారు. అమెరికా చర్యలను చైనా, రష్యా సహా పలు దేశాలు తీవ్రంగా వ్యతిరేకిస్తున్నాయి. ఇతర దేశాల సార్వభౌమాధికారాన్ని అమెరికా ధిక్కరించడంపై ఆగ్రహం వ్యక్తం చేస్తున్నారు.</p>
<p style="text-align: justify;"><strong>'లాటిన్ అమెరికాలోని అన్ని ప్రభుత్వాలు ఖండించాలి'</strong><br />అమెరికా చర్య అంతర్జాతీయ చట్టాన్ని, వెనెజులా సార్వభౌమాధికారాన్ని తీవ్రంగా ఉల్లంఘిస్తోందని వెనెజులా జెండా ముందు నిలబడి రోడ్రిగ్జ్ అన్నారు. వెనెజులా ప్రజలు ఈ చర్యను తిరస్కరించాలని, లాటిన్ అమెరికాలోని అన్ని ప్రభుత్వాలు దీనిని ఖండించాలని ఆమె పిలుపునిచ్చారు. గొప్ప గడ్డమీద ప్రజలు ఐక్యంగా ఉండాలని ఆమె సూచించారు. ఎందుకంటే వెనెజులాతో ఏమి జరిగిందో ఇతర దేశాలతోనూ అదే జరగవచ్చు అన్నారు. ప్రజల సంకల్పాన్ని నాశనం చేయడానికి, ఇతర దేశాల అధినేతలపై అమెరికా బలప్రయోగం చేసే అవకాశాలు ఉన్నాయని పేర్కొన్నారు.</p>
<p style="text-align: justify;">Also Read: <a href="https://telugu.abplive.com/news/world/nicolus-maduro-arrested-what-venezuela-future-pland-donald-trump-key-decision-233231">Venezuela Future: మదురో అరెస్టుతో వెనిజులా ఫ్యూచర్ ఏమిటి? ట్రంప్ ఏం ప్లాన్ చేశారు.. రష్యా, చైనా ఆగ్రహం</a></p>
3 months ago
6 
