<p><strong>2026 Maruti Brezza Price And Features:</strong> మారుతి సుజుకీ, Brezza 2026 మోడల్‌లో కొత్త ఆప్షన్‌ అందించింది. ఇప్పటివరకు 1.5 లీటర్‌ నేచురల్లీ ఆస్పిరేటెడ్‌ (NA) పెట్రోల్‌ & CNG ఇంజిన్లతో మాత్రమే అందుబాటులో ఉన్న Brezzaలో ఇప్పుడు 1.0 లీటర్‌ డైరెక్ట్‌ ఇంజెక్షన్‌ టర్బో పెట్రోల్‌ ఇంజిన్‌ను కూడా అందుబాటులోకి తీసుకొచ్చింది. దీంతో, మరింత పవర్‌ పెర్ఫార్మెన్స్‌ కోరుకునే వారికి కొత్త ప్రత్యామ్నాయం లభించింది. అయితే టర్బో పెట్రోల్‌ & సాధారణ పెట్రోల్‌ వేరియంట్ల మధ్య ఇంజిన్‌ మాత్రమే కాదు, డిజైన్‌, ఫీచర్లు & సాంకేతిక అంశాల్లో కూడా పలు తేడాలు ఉన్నాయి.</p>
<p>డిజైన్‌ <br />టర్బో వేరియంట్‌ను ప్రత్యేకంగా గుర్తించేలా Maruti కొన్ని మార్పులు చేసింది. ముందు గ్రిల్‌పై, ముందు & వెనుక బంపర్లలోని సిల్వర్‌ స్కిడ్‌ ప్లేట్‌ పైన, వీల్‌ ఆర్చ్‌లు & డోర్‌ క్లాడింగ్‌పై ఎరుపు రంగు హైలైట్‌లను అందించింది. ఇవి స్పోర్టీ లుక్‌ను తీసుకొస్తాయి. వెనుక క్వార్టర్‌ గ్లాస్‌పై "Turbo Boosterjet" స్టికర్‌తో పాటు టెయిల్‌గేట్‌పై "Turbo" బ్యాడ్జ్‌ను కూడా ఇచ్చింది. వీటిని మినహాయిస్తే డ్యూయల్‌-పాడ్‌ హెడ్‌ల్యాంప్స్‌, LED DRLs, LED ఫాగ్‌ ల్యాంప్స్‌, 16 అంగుళాల అల్లాయ్‌ వీల్స్‌, సిల్వర్‌ రూఫ్‌ రైల్స్‌, LED టెయిల్‌ల్యాంప్స్‌ వంటి అంశాలు రెండు వేరియంట్లలో ఒకేలా ఉన్నాయి.</p>
<p>క్యాబిన్‌లో... టర్బో & NA పెట్రోల్‌ వేరియంట్ల మధ్య ఎలాంటి డిజైన్‌ తేడా కనిపించదు. రెండు మోడళ్లలోనూ బ్లాక్‌ & బ్రౌన్‌ రంగుల ఇంటీరియర్‌, మూడు స్పోక్‌ల స్టీరింగ్‌ వీల్‌, 10.1 అంగుళాల టచ్‌స్క్రీన్‌ ఇన్ఫోటైన్‌మెంట్‌ సిస్టమ్‌, అనలాగ్‌ ఇన్‌స్ట్రుమెంట్‌ క్లస్టర్‌తో కలర్‌ MIDను అందించారు. MIDలో కనిపించే మెనూలు కూడా రెండింటిలో ఒకే విధంగా ఉంటాయి.</p>
<p>ఇది కూడా చదవండి: <a title="2026 Maruti Brezza మైలేజ్‌ నంబర్లు ఇవిగో - పెట్రోల్‌, టర్బో, CNG వేరియంట్ల పూర్తి వివరాలు" href="https://telugu.abplive.com/auto/2026-maruti-suzuki-brezza-fuel-efficiency-figures-explained-in-telugu-254460" target="_self">2026 Maruti Brezza మైలేజ్‌ నంబర్లు ఇవిగో - పెట్రోల్‌, టర్బో, CNG వేరియంట్ల పూర్తి వివరాలు</a></p>
<p>ఫీచర్లు <br />టాప్‌-ఎండ్‌ ZXi+ వేరియంట్‌లో టర్బో & NA పెట్రోల్‌ మోడళ్లకు ఒకే ఫీచర్లు లభిస్తాయి. అయితే LXi, VXi & ZXi వేరియంట్లలో టర్బో మోడల్‌కు కొన్ని అదనపు సదుపాయాలు ఉన్నాయి.</p>
<p>LXi టర్బో వేరియంట్‌లో రియర్‌ డిఫాగర్‌, ఎత్తు సర్దుబాటు చేసుకునే డ్రైవర్‌ సీటు, అడ్జస్టబుల్‌ రియర్‌ హెడ్‌రెస్ట్స్‌, ఆటోమేటిక్‌ క్లైమేట్‌ కంట్రోల్‌ను అదనంగా అందించారు.</p>
<p>VXi టర్బో వేరియంట్‌లో రివర్స్‌ పార్కింగ్‌ కెమెరా, ఎలక్ట్రిక్‌గా మడతపెట్టుకునే ORVMలు, అల్లాయ్‌ వీల్స్‌, ప్రత్యేక Bluish Black బాడీ కలర్‌ ఎంపిక లభిస్తుంది.</p>
<p>ZXi టర్బో వేరియంట్‌లో రియర్‌ వైపర్‌ & వాషర్‌, రెండు ట్వీటర్లు, క్రూయిజ్‌ కంట్రోల్‌, ఆటో హెడ్‌ల్యాంప్స్‌, బ్లైండ్‌ స్పాట్‌ వార్నింగ్‌, సేఫ్‌ ఎగ్జిట్‌ వార్నింగ్‌, రియర్‌ క్రాస్‌ ట్రాఫిక్‌ అలర్ట్‌ వంటి ఆధునిక ఫీచర్లు ఉన్నాయి. దీంతో తక్కువ వేరియంట్లలోనే మరిన్ని సౌకర్యాలు పొందాలనుకునే వారికి టర్బో మోడల్‌ మంచి ఎంపికగా మారుతుంది.</p>
<p>ఇది కూడా చదవండి: <a title="సరికొత్త CB500ని ఆవిష్కరించిన హోండా - లోకల్‌గా తయారీ, మూడు వేరియంట్లలో అందుబాటులోకి!" href="https://telugu.abplive.com/auto/honda-cb500-unveiled-in-india-details-in-telugu-254455" target="_self">సరికొత్త CB500ని ఆవిష్కరించిన హోండా - లోకల్‌గా తయారీ, మూడు వేరియంట్లలో అందుబాటులోకి!</a></p>
<p>ఇంజిన్‌<br />ఇంజిన్‌ పరంగా రెండు మోడళ్ల మధ్య స్పష్టమైన తేడా ఉంది. కొత్త 1.0 లీటర్‌ డైరెక్ట్‌ ఇంజెక్షన్‌ టర్బో పెట్రోల్‌ ఇంజిన్‌ 110 హెచ్‌పీ శక్తి & 170 ఎన్ఎం టార్క్‌ను ఉత్పత్తి చేస్తుంది. మరోవైపు 1.5 లీటర్‌ నేచురల్లీ ఆస్పిరేటెడ్‌ పెట్రోల్‌ ఇంజిన్‌ 103 హెచ్‌పీ శక్తి & 139 ఎన్ఎం టార్క్‌ను అందిస్తుంది. అంటే టర్బో ఇంజిన్‌ ఎక్కువ శక్తి & గణనీయంగా అధిక టార్క్‌ను అందిస్తుంది.</p>
<p>అయితే టర్బో వేరియంట్‌కు ఒక పరిమితి కూడా ఉంది. ఇందులో కేవలం మాన్యువల్‌ గేర్‌బాక్స్‌ మాత్రమే లభిస్తుంది. ఆటోమేటిక్‌ ట్రాన్స్‌మిషన్‌ ఎంపికను Maruti 1.5 లీటర్‌ NA పెట్రోల్‌ ఇంజిన్‌కే పరిమితం చేసింది. ఆసక్తికరమైన విషయం ఏమిటంటే ఇదే 1.0 లీటర్‌ టర్బో ఇంజిన్‌ను Fronxలో 6-స్పీడ్‌ ఆటోమేటిక్‌తో కలిపి అందిస్తున్నప్పటికీ, Brezzaలో మాత్రం ఆ అవకాశం ఇవ్వలేదు. అలాగే టర్బో ఇంజిన్‌కు CNG ఎంపిక కూడా లేదు.</p>
<p>మొత్తంగా చూస్తే... ఎక్కువ పనితీరు, స్పోర్టీ లుక్‌ & అదనపు ఫీచర్లు కావాలనుకునే వారికి Turbo Brezza మంచి ఎంపికగా నిలుస్తుంది. మరోవైపు ఆటోమేటిక్‌ గేర్‌బాక్స్‌ లేదా CNG ఎంపిక కోరుకునే వారు 1.5 లీటర్‌ NA పెట్రోల్‌ వేరియంట్‌ను ఎంచుకోవాల్సి ఉంటుంది. కొనుగోలుదారుల అవసరాలను బట్టి Maruti రెండు వేర్వేరు ఎంపికలను అందించడం ఈ కొత్త Brezza ప్రత్యేకతగా చెప్పొచ్చు.</p>
<p><em><strong>ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.</strong></em></p>
3 months ago
7 
