<p><strong>Stock Market Today:</strong> డోనాల్డ్ ట్రంప్ ప్రమాణ స్వీకారానికి ముందు, ఈ రోజు (సోమవారం, 20 జనవరి 2025) భారత బెంచ్‌మార్క్ సూచీలు నిఫ్టీ & సెన్సెక్స్ లాభాల్లో ప్రారంభమయ్యాయి. కోటక్ మహీంద్రా బ్యాంక్, విప్రో లాభాలు బ్యాంకింగ్ & ఐటీ రంగాలలో సెంటిమెంట్‌ను పెంచాయి. అయితే, ఆటో & మెటల్ రంగాలలో బలహీనత మార్కెట్‌ ర్యాలీకి బ్రేక్‌లు వేసింది. ప్రమాణ స్వీకారానికి ముందు, డొనాల్డ్ ట్రంప్ - చైనా అధ్యక్షుడు జిన్‌పింగ్ మధ్య సానుకూల చర్చలతో ప్రపంచ మార్కెట్లు ఉత్సాహంగా ఉన్నాయి. </p>
<p>ఉదయం 11.00 గంటల ప్రాంతంలో, సెన్సెక్స్ 294 పాయింట్లు లేదా 0.38% పెరిగి 76,913.32 వద్దకు చేరుకోగా, నిఫ్టీ 67పాయింట్లు లేదా 0.29% పెరిగి 23,270.20 వద్ద కదులుతోంది. ఇండెక్స్‌లో.. కోటక్ మహీంద్రా బ్యాంక్, NTPC, SBI, రిలయన్స్ ఇండస్ట్రీస్‌, పవర్ గ్రిడ్ మేజర్‌ గెయినర్స్‌గా నిలిచాయి. ఇండస్‌ల్యాండ్, టాటా మోటార్స్, యాక్సిస్ బ్యాంక్, TCS, ఇన్ఫోసిస్ ఎక్కువగా నష్టపోయాయి.</p>
<p>రంగాల వారీగా చూస్తే.. నిఫ్టీ PSU బ్యాంక్, రియాల్టీ స్టాక్స్‌ ఆకుపచ్చగా ప్రారంభమయ్యాయి, తలో 0.4 శాతం లాభపడ్డాయి. ఆయిల్ & గ్యాస్, కన్స్యూమర్ డ్యూరబుల్స్‌ కూడా సానుకూల ప్రారంభాలను చూశాయి. నిఫ్టీ ఆటో, ఫార్మా స్టాక్స్‌ స్వల్పంగా నష్టపోయాయి.</p>
<p><strong>రూపాయి విలువ</strong><br />డాలర్ ఇండెక్స్ క్షీణత, ఆసియా కరెన్సీలలో లాభాల కారణంగా సోమవారం ప్రారంభంలో, డాలర్‌తో పోలిస్తే భారత రూపాయి 15 పైసలు లాభపడింది. గత సెషన్ ముగింపు 86.6125తో పోలిస్తే ఈ రోజు 86.4613 వద్ద ప్రారంభమైంది.</p>
<p><strong>భారతీయ స్టాక్‌ మార్కెట్లపై డొనాల్డ్‌ ట్రంప్‌ పాలన ప్రభావం</strong></p>
<p>డొనాల్డ్ ట్రంప్ ప్రమాణ స్వీకారం తర్వాత, అమెరికా కొత్త ప్రభుత్వం ఆవిష్కరించే ఆర్థిక దృక్పథం కోసం ఇండియన్‌ కార్పొరేట్స్‌ సహా గ్లోబల్‌ ఇన్వెస్టర్లు ఆత్రుతగా ఎదురుచూస్తున్నారు. ట్రంప్ పరిపాలనలో వాణిజ్య సుంకాలు & ఒప్పందాల ద్వారా అమెరికన్ ప్రయోజనాలకే అధిక ప్రాధాన్యత లభిస్తుందని నిపుణులు భావిస్తున్నారు. ఇది చైనా, జపాన్, దక్షిణ కొరియా, వియత్నాం వంటి దేశాలపై ఒత్తిడి పెంచుతుంది. అదే సమయంలో భారత్‌, ఇండోనేషియా, మలేషియా, థాయిలాండ్ వంటి దేశాలు ప్రయోజనం పొందవచ్చు.</p>
<p><strong>గ్రీన్ ఎనర్జీ స్టాక్స్‌పై ప్రభావం</strong><br />ట్రంప్, శిలాజ ఇంధన విధానాలకు అనుకూలం. కాబట్టి, అదే వైఖరిని కొనసాగిస్తే ఇండియా సహా ఆసియా దేశాల్లోని పునరుత్పాదక ఇంధన రంగంపై ప్రతికూల ప్రభావం పడొచ్చు. గ్రీన్ ఎనర్జీ వైపు మారే వేగం తగ్గవచ్చు. ఫలితంగా, భారతదేశంలోని సోలార్‌ & ఇతర గ్రీన్ ఎనర్జీ స్టాక్స్‌ ఒత్తిడిని ఎదుర్కొనే అవకాశం ఉంది.</p>
<p><strong>డిఫెన్స్ స్టాక్స్‌కు ప్రయోజనం</strong><br />రక్షణ రంగం పని చేసే కంపెనీలకు మరిన్ని అవకాశాలు లభించవచ్చు. ట్రంప్ 2.0 పాలనలో డిఫెన్స్‌ & సాంకేతికత-ఆధారిత డిఫెన్స్‌ స్టాక్స్‌ డిమాండ్‌ పెరుగుతుందని ఎక్స్‌పర్ట్స్‌ భావిస్తున్నారు. ముఖ్యంగా.. డ్రోన్ & ఏరోస్పేస్ కంపెనీలకు లాభం కలగవచ్చు.</p>
<p><strong>ఎగుమతి కంపెనీలపై ఒత్తిడి</strong><br />ట్రంప్ సుంకాల విధానాలు గార్మెంట్స్‌ & IT వంటి ఎగుమతి ఆధారిత రంగాలను సవాలు చేసే అవకాశం ఉంది. ముఖ్యంగా, లార్జ్ క్యాప్ IT స్టాక్స్‌పై ఈ ప్రభావం స్పష్టంగా కనిపించవచ్చు.</p>
<p><strong>ఫిన్‌టెక్ స్టాక్స్‌కు అవకాశాలు</strong><br />ట్రంప్ ఇమ్మిగ్రేషన్ విధానాలు భారతదేశం, సింగపూర్, దక్షిణ కొరియా వంటి దేశాలలో ఆవిష్కరణలకు బలమైన ఊతం ఇవ్వవచ్చు. ఈ వారంలో ఫిన్‌టెక్ స్టాక్స్‌లో కదలికలను పెట్టుబడిదారులు గమనిస్తూ ఉండాలి.</p>
<p><strong>మౌలిక సదుపాయాలు & రైల్‌ స్టాక్స్‌కు అవకాశాలు</strong><br />గ్లోబల్‌ కంపెనీలు తమ ఉత్పత్తి కేంద్రాలను చైనా నుంచి భారతదేశం, వియత్నాం, ఇండోనేషియాకు మార్చే అవకాశం ఉంది. ముఖ్యంగా, అమెరికా-చైనా మధ్య వాణిజ్య సుంకాల యుద్ధం కొనసాగితే, తయారీ కేంద్రంగా భారతదేశం మరింత వేగంగా వృద్ధి చెందుతుంది. ఇది.. మౌలిక సదుపాయాలు, రవాణా & లాజిస్టిక్స్‌, ముఖ్యంగా రైల్‌ లాజిస్టిక్‌కు డిమాండ్‌ను పెంచే అవకాశం ఉంది.</p>
<p>Disclaimer: ఈ వార్త కేవలం సమాచారం కోసం మాత్రమే. మ్యూచువల్‌ ఫండ్లు, స్టాక్‌ మార్కెట్‌, క్రిప్టో కరెన్సీ, షేర్లు, ఫారెక్స్‌, కమొడిటీల్లో పెట్టే పెట్టుబడులు ఒడుదొడుకులకు లోనవుతుంటాయి. మార్కెట్‌ పరిస్థితులను బట్టి ఆయా పెట్టుబడి సాధనాల్లో రాబడి మారుతుంటుంది. ఫలానా మ్యూచువల్‌ ఫండ్‌, స్టాక్‌, క్రిప్టో కరెన్సీలో పెట్టుబడి పెట్టాలని లేదా ఉపసంహరించుకోవాలని 'abp దేశం' చెప్పడం లేదు. పెట్టుబడి పెట్టే ముందు, లేదా ఉపసంహరించుకునే ముందు అన్ని వివరాలు పరిశీలించడం ముఖ్యం. అవసరమైతే సర్టిఫైడ్‌ ఫైనాన్షియల్‌ అడ్వైజర్ల నుంచి సలహా తీసుకోవడం మంచిది.</p>
<p>మరో ఆసక్తికర కథనం: <a title="గోల్డ్‌ కొనేవాళ్లకు చుక్కలు చూపిస్తున్న ట్రంప్‌ - ప్రమాణ స్వీకారం వేళ పెరిగిన రేట్లు" href="https://telugu.abplive.com/business/personal-finance/latest-gold-silver-prices-today-20-january-2025-know-gold-silver-rates-in-your-city-telangana-hyderabad-andhra-pradesh-amaravati-194748" target="_self">గోల్డ్‌ కొనేవాళ్లకు చుక్కలు చూపిస్తున్న ట్రంప్‌ - ప్రమాణ స్వీకారం వేళ పెరిగిన రేట్లు</a> </p>
10 months ago
8 
