<p><strong>TG 20 Tournament Controversy:</strong>హైదరాబాద్‌ క్రికెట్ వర్గాల్లో ఒక్కసారిగా ప్రకంపనలు మొదలయ్యాయి. అట్టహాసంగా ప్రారంభంకావాల్సిన టీజీ 20 టోర్నమెంట్‌ ఇప్పుడు లీగల్ చిక్కుల్లో పడింది. కేవలం టోర్నీ నిర్వాహకులే కాదు, దీనికి బ్రాండ్ అంబాసిడర్‌లుగా, ప్రమోటర్లుగా వ్యవహరిస్తున్న టాలీవుడ్‌ స్టార్ హీరోలు విజయ్ దేవరకొండ, వెంకటేష్‌ దగ్గుపాటితోపాటు స్టార్ క్రికెటర్లు మహమ్మద్‌ సిరాజ్, తిలక్‌ వర్మ, అంబటి రాయుడికి తెలంగాణ క్రికెట్ అసోసియేషన్ గట్టి షాక్ ఇచ్చింది. </p>
<p>ఈ టోర్నమెంట్‌కు అసలు అనుమతులే లేవని, ఇది పూర్తిగా నిబంధనలకు విరుద్ధమని టీసీఏ సంచలన ఆరోపణలు చేస్తోంది. అసలు ఒక్క టోర్నీ నిర్వహించాలంటే ఉండాల్సిన బీసీసీఐ పర్మిషన్లు ఎక్కడ? సుప్రీంకోర్టు గైడ్‌లైన్స్‌ ఏమయ్యాయి? అనే ప్రశ్నలు ఇప్పుడు హాట్‌టాపిక్‌గా మారాయి. ఈ వివాదం వెనుక ఉన్న అసలు కథేంటీ? </p>
<h2>అసలు వివాదం ఏంటీ? </h2>
<p>హైదరాబాద్ క్రికెట్‌ అసోసియేషన్ నిర్వహిస్తున్న ఈ టీజీ 20 టోర్నమెంట్‌కు ఎలాంటి చట్టబద్ధత లేదని టీసీఏ జనరల్ సెక్రటరీ స్పష్టం చేశారు. సాధారణంగా ఏదైనా పెద్ద క్రికెట్‌ టోర్నమెంట్‌ అనౌన్స్‌ చేయడానికి కనీసం 45 రోజులు ముందే బీసీసీఐ నుంచి రాతపూర్వక అనుమతి తీసుకోవాలి. కానీ, ఈ టోర్నీ విషయంలో అటువంటి నిబంధనలేవీ పాటించలేదని టీసీఏ వాదిస్తోంది. </p>
<p><iframe title="TilakVarma, Vijay, Venkatesh, Siraj in trouble | BCCI అనుమతిలేకుండా TG20 లీగ్ పై నోటీసులు| ABP Desam" src="https://www.youtube.com/embed/RqmcqkM-LD8" width="919" height="517" frameborder="0" allowfullscreen="allowfullscreen"></iframe></p>
<h2>సెలబ్రిటీలకు నోటీసులు ఎందుకు?</h2>
<p>ఏదైనా బ్రాండ్‌ను లేదా టోర్నమెంట్‌ను ఎండార్స్‌మెంట్‌ చేసే ముందు ఆ సంస్థకు లేదా ఈవెంట్‌కు లీగల్ పరిషన్లు ఉన్నాయో లేదో చూసుకోవడం సెలబ్రిటీల బాధ్యత అని టీసీఏ గుర్తు చేసింది. విజయ్‌ దేవరకొండ, వెంకటేష్‌ వంటి హీరోలు ఈ టోర్నీకి ప్రచారం కల్పించడం ద్వారా ప్రజలను తప్పుదోవ పట్టిస్తున్నారని భావిస్తున్నారు. సిరాజ్, తిలక్ వర్మ వంటి బీసీసీఐ కాంట్రాక్ట్ ప్లేయర్లు, అప్రూవల్‌ లేని టోర్నీల్లో పాల్గొనడం లేదా వాటిని ప్రమోట్ చేయడం నిబంధనల ఉల్లంఘన కిందకే వస్తుందని హెచ్చరించింది. </p>
<h2>రాజకీయ నాయకుల వారసుల ఎంట్రీపై ప్రశ్నలు </h2>
<p>ఈ వివాదం కేవలం క్రికెట్‌కే పరిమితం కాలేదు. రాజకీయ రంగు కూడా పులుముకుంది. టీజీ 20లో వివిధ జిల్లాల జట్ల ఏర్పాటుపై టీసీఏ ప్రశ్నలు సంధించింది. ఖమ్మం టీంతో డిప్యూటీ సీఎం భట్టి విక్రమార్క కుమారుడికి ఏం సంబంధమని అడిగింది. వరంగల్ టీమ్‌లో జూపల్లి కృష్ణారావు కుమారుడి పాత్ర ఏంటని నిలదీసింది. ఈ విధంగా రాజకీయ నాయకుల వారసులను ఈ టోర్నీలో ఇన్వాల్వ్ చేయడం వెనుక ఉన్న ఉద్దేశాలను టీసీఏ తప్పుపట్టింది. </p>
<h2>లీగల్ ఫీజుల పేరుతో కోట్లు వృథా?</h2>
<p>హెచ్‌సీఏపై టీసీఏ మరో తీవ్ర ఆరోపణచేసింది. టోర్నీ నిర్వహణ, ఇతర లీగల్ వివాదాల కోసం హెచ్‌సీఏ దాదాపు ఐదు నుంచి ఐరు కోట్లు ఖర్చు చేస్తోందని, అదే డబ్బును గ్రామీణ ప్రాంతాల్లో క్రికెట్ అభివృద్ధికి ఉపయోగిస్తే ఎంతోమంది యువ ఆటగాళ్లకు మేలు జరుగుతుందని అభిప్రాయపడింది. ఈ టోర్నీని ఫ్రాడ్‌ టోర్నమెంట్‌గా టీసీఏ అభివర్ణించడం చర్చనీయాంశంగా మారింది. </p>
4 months ago
11 
