<p><strong>Hung municipalities</strong>: తెలంగాణ మున్సిపల్ ఎన్నికల్లో కాంగ్రెస్ పార్టీ ఏకపక్ష విజయాలు సాధించింది. కానీ కనీసం 30 మున్సిపాలిటీల్లో హంగ్ ఏర్పడుతోంది. తెలంగాణ మున్సిపల్ ఎన్నికల ఫలితాలు రాష్ట్ర రాజకీయాల్లో కొత్త సమీకరణాలకు తెరలేపాయి. అధికార కాంగ్రెస్ పార్టీ మెజారిటీ మున్సిపాలిటీల్లో తన జెండా ఎగురవేసినప్పటికీ, సొంత పార్టీ రెబల్స్ రూపంలో గట్టి సవాలునే ఎదుర్కొంది. రాష్ట్రవ్యాప్తంగా దాదాపు 30కి పైగా మున్సిపాలిటీల్లో ఏ పార్టీకి స్పష్టమైన మెజారిటీ రాకపోవడంతో హంగ్ పరిస్థితులు నెలకొన్నాయి. ఈ హంగ్ మున్సిపాలిటీల్లో స్వతంత్రులుగా గెలిచిన కాంగ్రెస్ రెబల్ అభ్యర్థులే ఇప్పుడు కింగ్ మేకర్లుగా మారారు.</p>
<p><strong>కాంగ్రెస్ హవా.. కానీ రెబల్స్ సెగ </strong></p>
<p>మున్సిపల్ ఎన్నికల్లో కాంగ్రెస్ పార్టీ ఏకపక్ష విజయాల దిశగా దూసుకెళ్లింది. అయితే, టికెట్ల కేటాయింపులో అసంతృప్తికి లోనై స్వతంత్రులుగా బరిలోకి దిగిన రెబల్ అభ్యర్థులు అధికార పార్టీకి ముచ్చెమటలు పట్టించారు. ప్రధానంగా ఉమ్మడి నల్గొండ, కరీంనగర్, వరంగల్ జిల్లాల్లోని పలు మున్సిపాలిటీల్లో కాంగ్రెస్ అధికారిక అభ్యర్థుల కంటే రెబల్ అభ్యర్థులకే ఓటర్లు పట్టం కట్టారు. దీంతో కాంగ్రెస్ గెలవాల్సిన అనేక మున్సిపాలిటీలు హంగ్‌గా మారాయి.</p>
<p><strong>హంగ్ మున్సిపాలిటీల్లో ఇండిపెండెంట్ల జోరు </strong></p>
<p> జనగామ, కోహిర్, కేసముద్రం, అలంపూర్ వంటి కీలక మున్సిపాలిటీల్లో హంగ్ ఏర్పడింది. ఇక్కడ చైర్మన్ పీఠాన్ని దక్కించుకోవాలంటే స్వతంత్ర అభ్యర్థుల మద్దతు తప్పనిసరి. గెలిచిన స్వతంత్రులలో అత్యధికులు కాంగ్రెస్ నుంచి వచ్చిన వారే కావడంతో, వారంతా తిరిగి అధికార పార్టీ గూటికి చేరే అవకాశాలు మెండుగా ఉన్నాయి. ఈ పరిణామం వల్ల హంగ్ ఏర్పడిన మున్సిపాలిటీలు కూడా అంతిమంగా అధికార పార్టీ ఖాతాలోకే వెళ్తాయని విశ్లేషకులు భావిస్తున్నారు.</p>
<p><strong> మజ్లిస్ మ్యాజిక్.. ముస్లిం ఓటు బ్యాంకులో పట్టు </strong></p>
<p> పాతబస్తీకే పరిమితం కాకుండా జిల్లాల్లోని మున్సిపాలిటీల్లో కూడా మజ్లిస్ పార్టీ గణనీయమైన ప్రభావం చూపింది. మైనారిటీ ఓట్లు అధికంగా ఉన్న పట్టణాల్లో ఎంఐఎం అభ్యర్థులు చెప్పుకోదగ్గ స్థానాలను దక్కించుకున్నారు. కొన్ని చోట్ల కాంగ్రెస్ , ఎంఐఎం కలిసి మున్సిపాలిటీ పాలకవర్గాన్ని దక్కించుకునే అవకాశం ఉంది. మరికొన్ని చోట్ల ఎంఐఎం కింగ్ మేకర్‌గా నిలిచే అవకాశం ఉంది.</p>
<p><strong>అధికార పార్టీ ఖాతాలోకి హంగ్ మున్సిపాలిటీలు </strong></p>
<p>హంగ్ ఏర్పడిన చోట స్వతంత్రుల బేరసారాలు అప్పుడే మొదలయ్యాయి. తమకు చైర్మన్ లేదా వైస్ చైర్మన్ పదవులు ఇస్తేనే మద్దతు ఇస్తామని కొందరు డిమాండ్ చేస్తున్నారు. అయితే, రాష్ట్రంలో అధికారంలో ఉన్న కాంగ్రెస్ పార్టీకి ఎక్స్-అఫీషియో ఓట్ల బలం తోడవనుండటంతో, హంగ్ మున్సిపాలిటీలను చేజిక్కించుకోవడం ఆ పార్టీకి పెద్ద కష్టమేమీ కాకపోవచ్చు. రెబల్ అభ్యర్థులను తిరిగి పార్టీలోకి ఆహ్వానించడం ద్వారా మెజారిటీని సులభంగా సాధించవచ్చని కాంగ్రెస్ వ్యూహకర్తలు అంచనా వేస్తున్నారు.</p>
<p><strong>నియోజకవర్గాల్లో మారిన ముఖచిత్రం </strong></p>
<p>సిట్టింగ్ ఎమ్మెల్యేలు తమ నియోజకవర్గాల్లో పట్టు నిరూపించుకోవడానికి ప్రయత్నించినప్పటికీ, పట్టణ ఓటర్లు ఈసారి భిన్నమైన తీర్పునిచ్చారు. బీఆర్ఎస్ అగ్రనేతల కోటలు బద్దలు కావడం, <a title="కాంగ్రెస్" href="https://telugu.abplive.com/topic/Congress" data-type="interlinkingkeywords">కాంగ్రెస్</a> లోని అంతర్గత విభేదాలు బయటపడటం ఈ ఎన్నికల ప్రత్యేకత. మున్సిపల్ చైర్మన్ల ఎన్నిక ఫిబ్రవరి 16న జరగనుండటంతో, అప్పటి వరకు ఈ రాజకీయ ఉత్కంఠ కొనసాగే అవకాశం ఉంది. </p>
<p><iframe class="vidfyVideo" style="border: 0px;" src="https://telugu.abplive.com/web-stories/lifestyle/why-is-jewelry-hidden-in-pink-paper-237866" width="631" height="381" scrolling="no"></iframe></p>
<p> </p>
2 months ago
5 
