<p><strong>Ration Card Family Register:</strong> పౌర సేవలను మరింత సులభతరం చేసేందుకు మరియు కుటుంబ వివరాల ధ్రువీకరణను వేగవంతం చేసేందుకు తెలంగాణ ప్రభుత్వం ఒక ముఖ్యమైన నిర్ణయం తీసుకుంది. రెవెన్యూ శాఖ ద్వారా జూలై 25, 2026న జీవో ఎంఎస్ నంబర్ 172 జారీ చేస్తూ, రాష్ట్రవ్యాప్తంగా ఎలక్ట్రానిక్ తెలంగాణ ఫ్యామిలీ రిజిస్టర్ వ్యవస్థను అందుబాటులోకి తీసుకువచ్చింది. దీని ద్వారా పౌరులు తమ కుటుంబ వివరాలతో కూడిన అధికారిక ఫ్యామిలీ రిజిస్టర్ సర్టిఫికెట్ ను నేరుగా మీసేవ కేంద్రాలు , డిజిటల్ ప్లాట్‌ఫామ్‌ల ద్వారా సులభంగా పొందే వీలు కలిగింది.</p>
<p><strong> రేషన్ కార్డ్ నంబరే ఫ్యామిలీ ఐడీ </strong></p>
<p>ఈ కొత్త విధానంలో పౌర సరఫరాల శాఖ పరిధిలోని ఆహార భద్రత కార్డు డేటాబేస్ నుండి కుటుంబ సభ్యుల వివరాలను ఎలక్ట్రానిక్ పద్ధతిలో సేకరిస్తారు. ప్రతీ కుటుంబానికి కేటాయించే ఫ్యామిలీ రిజిస్టర్ ఐడెంటిఫికేషన్ నంబర్ , వారి రేషన్ కార్డ్ నంబర్‌తో సమానంగా ఉంటుంది. ఈ సర్టిఫికెట్‌లో కుటుంబ యజమాని పేరు, సభ్యుల పేర్లు, వారితో ఉన్న సంబంధం, వయస్సు, పుట్టిన తేదీ, లింగం, ఆధార్ వివరాలు , ప్రస్తుతం నివసిస్తున్న చిరునామా స్పష్టంగా నమోదు చేసి ఉంటారు. </p>
<p><strong>దరఖాస్తు విధానం </strong></p>
<p>ఫ్యామిలీ రిజిస్టర్ సర్టిఫికెట్ కావాలనుకునే పౌరులు తమ సమీప మీసేవ కేంద్రం, అధికారిక పోర్టల్ లేదా మొబైల్ యాప్ ద్వారా దరఖాస్తు చేసుకోవచ్చు. కుటుంబంలో నమోదైన వయోజనులు మాత్రమే ఈ ధ్రువీకరణ పత్రానికి దరఖాస్తు చేసేందుకు అర్హులు. దరఖాస్తు చేసుకున్న తర్వాత సంబంధిత తహసీల్దార్ డేటాను సరి చూసి డిజిటల్ సంతకంతో ఆమోదిస్తారు. దరఖాస్తు చేసిన 2 పని దినాల్లోనే డిజిటల్ సర్టిఫికెట్‌ను జారీ చేయాలని ప్రభుత్వం కాలపరిమితి విధిస్తూ ఆదేశాలు ఇచ్చింది.</p>
<p><strong> చట్టబద్ధత </strong></p>
<p>ప్రభుత్వం ఈ జీవోలో ఒక ముఖ్యమైన స్పష్టతనిచ్చింది. ఈ ఫ్యామిలీ రిజిస్టర్ కేవలం ఆ కుటుంబ నిర్మాణ సమిష్టి వివరాలను తెలియజేసే రికార్డు మాత్రమే. ఇది ఎట్టి పరిస్థితుల్లోనూ ఆస్తి హక్కులు, చట్టబద్ధమైన వారసత్వ హక్కులు , ఆస్తుల యాజమాన్య హక్కులను నిర్ణయించదు. అలాగే కేవలం ఈ సర్టిఫికెట్ ఉన్నంత మాత్రాన సంక్షేమ పథకాల అర్హతలకు నేరుగా ప్రాతిపదిక కాదని ప్రభుత్వం స్పష్టం చేసింది. ఈ సేవను సజావుగా అందించడానికి ఎలక్ట్రానిక్ సర్వీస్ డెలివరీ కమిషనర్ ఎపిఐ ద్వారా మీసేవ ప్లాట్‌ఫామ్‌ను సివిల్ సప్లైస్ డేటాబేస్‌తో అనుసంధానించనున్నారు. రాష్ట్రవ్యాప్తంగా జిల్లాల్లో ఈ సేవల అమలును పర్యవేక్షించే బాధ్యతను జిల్లా కలెక్టర్లకు అప్పగించారు. వివిధ ప్రభుత్వ సేవలు, అధికారిక అవసరాల కోసం పదే పదే కుటుంబ ఆధారాలు సమర్పించాల్సిన శ్రమను తప్పించడమే లక్ష్యంగా ఈ కొత్త సర్టిఫికెట్ విధానం రూపుదిద్దుకుంది. </p>
<p><strong>SIRకి ఉపయోగం</strong></p>
<p>పూర్తి నివాస ధృవీకరణ పత్రం లేకపోవడం వల్ల చాలా మంది ఓటర్ల జాబితాలో ఓటు కోల్పోయే పరిస్థితుల్లో పడ్డారు. అందుకే ఇటీవల ఓవైసీ ఇలాంటి సర్టిఫికెట్లు ఇవ్వాలని డిమాండ్ చేస్తూ వస్తున్నారు. ఇప్పుడు వాటిని జారీ చేసేందుకు ప్రభుత్వం ముందుకు వచ్చినట్లుగా కనిపిస్తోంది. </p>
<p><iframe class="vidfyVideo" style="border: 0px;" src="https://telugu.abplive.com/web-stories/health/doing-this-exercise-will-melt-away-belly-fat-like-butter-254670" width="631" height="381" scrolling="no"></iframe></p>
3 months ago
7 
