<p><strong>Star Indian Allrounders Suffer Fitness Blows Ahead Of Crucial White Ball Series: </strong>భారత స్టార్ ఆల్‌రౌండర్ హార్దిక్ పాండ్యా, పేస‌ర్ హర్షిత్ రాణా కాంపిటీటివ్ క్రికెట్‌లోకి తిరిగి రావడం మరింత ఆలస్యం కానుంది. గాయాల నుంచి కోలుకునే క్రమంలో బెంగళూరులోని బీసీసీఐ సెంటర్ ఆఫ్ ఎక్సలెన్స్ (సీఓఈ)లో రిహాబిలిటేషన్ పొందుతున్న ఈ ఇద్దరు ఆటగాళ్లకు ప్రాక్టీస్ సమయంలో కొత్త సమస్యలు తలెత్తాయి. ఐపీఎల్ 2026 ముగిసిన తర్వాత హార్దిక్ మైదానంలోకి దిగకపోగా, హర్షిత్ రాణా ఈ ఏడాది ఆరంభంలో ఇంగ్లాండ్‌తో జరిగిన టీ20 సిరీస్‌లో ఆఖరిసారిగా ఇండియా తరఫున ఆడాడు. రాబోయే న్యూజిలాండ్ టూర్‌లో ఈ ఇద్దరు ఆటగాళ్లు పాల్గొనే అవకాశాలు చాలా తక్కువగా ఉన్నాయని తాజా నివేదికలు స్పష్టం చేస్తున్నాయి.</p>
<p>Read Also: <a title="Rohit Century Quest: రోహిత్ మ‌రిన్ని సెంచ‌రీలు సాధించాలని గావ‌స్క‌ర్ కోరిక‌.. చాలా బాధ్య‌త‌యుతంగా ఆడుతున్నాడని కితాబు, హిట్ మ్యాన్ సరికొత్త బ్యాటింగ్ టెంప్లేట్‌పై విశ్లేషణ " href="https://telugu.abplive.com/sports/cricket/sunil-gavaskar-expresses-frustration-as-rohit-sharma-misses-century-against-west-indies-260661" target="_self">Rohit Century Quest: రోహిత్ మ‌రిన్ని సెంచ‌రీలు సాధించాలని గావ‌స్క‌ర్ కోరిక‌.. చాలా బాధ్య‌త‌యుతంగా ఆడుతున్నాడని కితాబు, హిట్ మ్యాన్ సరికొత్త బ్యాటింగ్ టెంప్లేట్‌పై విశ్లేషణ </a></p>
<p><strong>హార్దిక్ కుడి పిక్కలో తీవ్ర నొప్పి.. ఎనిమిది వారాల చికిత్స</strong><br />బ్యాటింగ్, బౌలింగ్, ఫీల్డింగ్ వర్క్‌లోడ్స్ పూర్తి చేసి దాదాపు మ్యాచ్ ఫిట్‌నెస్ సాధించే దశకు చేరుకున్న సమయంలో హార్దిక్‌కు మ్యాచ్ సిమ్యులేషన్ సందర్భంగా తీవ్ర ఎదురుదెబ్బ తగిలింది. కుడి కాలి పిక్కలో తీవ్రమైన నొప్పి రావడంతో స్కానింగ్ నిర్వహించారు. ఎంఆర్ఐ స్కాన్ అనంతరం హార్దిక్‌కు కనీసం ఎనిమిది వారాల పాటు విటమిన్-డి మందులతో పాటు బిస్ఫాస్ఫోనేట్ థెరపీ అవసరమని వైద్య బృందం సూచించింది. దీంతో అతడి రీఎంట్రీ మరింత ఆలస్యం కానుంది.</p>
<p>Read Also: <a title="Shubman Gill Milestone Surge: ధోని ఆల్‌టైమ్ రికార్డును సమం చేసిన ప్రిన్స్.. టీమిండియా కెప్టెన్ గిల్ ఖాతాలో అరుదైన ఫీట్" href="https://telugu.abplive.com/sports/cricket/shubman-gill-equals-ms-dhoni-tally-of-seven-player-of-the-series-awards-260655" target="_self">Shubman Gill Milestone Surge: ధోని ఆల్‌టైమ్ రికార్డును సమం చేసిన ప్రిన్స్.. టీమిండియా కెప్టెన్ గిల్ ఖాతాలో అరుదైన ఫీట్</a></p>
<p><strong>హర్షిత్ రాణాకు తొడ కండరాల గాయం.. జ్వరం, గొంతునొప్పి సమస్యలు</strong><br />మరోవైపు పేస్ బౌలింగ్ ఆల్‌రౌండర్ హర్షిత్ రాణా సైతం మ్యాచ్ సిమ్యులేషన్ సమయంలో ఎడమ తొడ క్వాడ్రిసెప్స్ ప్రాంతంలో గ్రేడ్ వన్ నొప్పితో బాధపడ్డాడు. దీనికి తోడు అతడు జ్వరం, గొంతునొప్పి, తీవ్రమైన జలుబు బారిన పడ్డాడు. ఈ అనారోగ్య సమస్యల నుంచి పూర్తిగా కోలుకున్న తర్వాతే అతడిని బౌలింగ్ ప్రాక్టీస్‌‌లోకి తీసుకురావాలని మెడికల్ టీమ్ నిర్ణయించింది.</p>
<p><strong>అక్టోబర్ 22 నుంచి న్యూజిలాండ్ టూర్.. సాంట్నర్ సారథ్యంలో కివీస్ టీమ్</strong><br />ఇండియా వైట్ బాల్ న్యూజిలాండ్ టూర్ అక్టోబర్ 22న ప్రారంభమై నవంబర్ 15 వరకు సాగనుంది. ఇందులో భాగంగా ఇరు జట్లు ఐదు టీ20లు, ఐదు వన్డే మ్యాచ్‌లు ఆడనున్నాయి. అనంతరం నవంబర్ 19 నుంచి డిసెంబర్ 1 వరకు వెల్లింగ్టన్, క్రైస్ట్‌చర్చ్ వేదికలుగా ప్రపంచ టెస్ట్ ఛాంపియన్‌షిప్ (డబ్ల్యూటీసీ) సర్కిల్‌లో భాగంగా రెండు టెస్టుల సిరీస్ జరగనుంది. డబ్ల్యూటీసీ పాయింట్ల పట్టికలో కివీస్ మూడో స్థానంలో ఉండగా, ఇండియా ఐదో స్థానంలో కొనసాగుతోంది. ఐదు మ్యాచ్‌ల టీ20 సిరీస్ కోసం మిచెల్ సాంట్నర్ కెప్టెన్సీలో 16 మందితో కూడిన పటిష్టమైన స్క్వాడ్‌ను న్యూజిలాండ్ బోర్డు ఇప్పటికే ప్రకటించింది. ఈ టూర్ కోసం భారత సెలెక్టర్లు త్వరలోనే జట్టును ఎంపిక చేయనున్నారు.</p>
3 weeks ago
3 
