<p>ముంబై: ICC T20 ప్రపంచ కప్ 2026 ప్రారంభానికి మరికొన్ని రోజులే సమయం ఉంది. కానీ టోర్నమెంట్ కు సంబంధించి ఊహించని నాటకీయ పరిణామాలు చోటు చేసుకుంటున్నాయి. బంగ్లాదేశ్ తిరిగి వరల్డ్ కప్ రేసులోకి వచ్చే అవకాశాలు కనిపిస్తున్నాయి. అయితే దాని స్థానంలో వరల్డ్ కప్ ఛాన్స్ దక్కించుకున్న స్కాట్లాండ్ జట్టుకు వచ్చిన ప్రమాదమేమీ లేదని కొన్ని నివేదికలు చెబుతున్నాయి. </p>
<p>పేసర్ ముస్తాఫిజుర్ రెహ్మాన్ ను IPL నుండి తొలగించిన తర్వాత, బంగ్లాదేశ్ తమ మ్యాచ్‌లను భారత్ నుంచి శ్రీలంకకు మార్చాలని డిమాండ్ చేసింది. భద్రతా కారణాలతో తాము భారతదేశానికి వెళ్లడం లేదని బంగ్లా క్రికెట్ బోర్డు తెలిపింది. తమ మ్యాచులను శ్రీలంకకు మార్చాలని, లేకపోతే తాము మెగా టోర్నీ నుంచి తప్పుకుంటామని చెప్పింది. విచారణ చేపట్టిన ICC అధికారులు, బంగ్లా రిక్వెస్ట్ తిరస్కరించారు. దాంతో బంగ్లాదేశ్ జట్టు టోర్నమెంట్ నుండి వైదొలిగింది. </p>
<p>బంగ్లాదేశ్ ను తొలగించడంపై పాకిస్తాన్ సైతం T20 ప్రపంచ కప్ ను బహిష్కరిస్తామని బెదిరించింది. అయితే ఇంకా తుది నిర్ణయం తీసుకోలేదు. బంగ్లాదేశ్ ను ప్రోత్సహించింది, వారికి ఇలాంటి ఆలోచన వచ్చేలా చేసింది పాకిస్తాన్ అని ఐసీసీ భావిస్తోంది. ఒకవేళ పాకిస్తాన్ జట్టు టీ20 వరల్డ్ కప్ ఆడేందుకు నికరాకరించినా, లేక వారిపై క్రమశిక్షణా చర్యలలో భాగంగా ఐసీసీ ఆ జట్టుపై వేటు వేసినా.. బంగ్లాదేశ్ జట్టుకు అవకాశం దక్కుతుందని ప్రచారం జరుగుతోంది. </p>
<h2>పాకిస్తాన్ బహిష్కరిస్తే బంగ్లాదేశ్ గోల్డెన్ ఛాన్స్</h2>
<p>హిందుస్థాన్ టైమ్స్ నివేదిక ప్రకారం, పాకిస్తాన్ జట్టు కనుక T20 ప్రపంచ కప్ ను బహిష్కరిస్తే, ICC వారి స్థానంలో తొలగించిన బంగ్లాదేశ్ జట్టును చేర్చే అవకాశం ఉంది. ఈ పరిణామాలపై ఒక అధికారిని ఉటంకిస్తూ ఈ విధంగా పేర్కొన్నారు. "పాకిస్తాన్ వైదొలగాలని నిర్ణయించుకుంటే, గ్రూప్ A లో వారి స్థానంలో బంగ్లాను చేర్చుకునే అవకాశం ఉంది. BCB అభ్యర్థన మేరకు వారి మ్యాచులు శ్రీలంకలో ఆడతారు. ఈ ఏర్పాట్లు పరిమిత లాజిస్టికల్ సవాళ్లకు దారితీస్తాయి. కానీ పాక్ రేసు నుంచి తప్పుకుంటే మాత్రం బీసీబీ అభ్యర్థన నెరవేరి వారికి పొట్టి ప్రపంచ కప్ ఆడే సువర్ణావకాశం దక్కుతుంది" అన్నారు.</p>
<p>ఒకవేళ ఇదే జరిగితే, బంగ్లాదేశ్ పాకిస్తాన్ స్థానంలో గ్రూప్ A లో చేరుతుంది. భారత్ సైతం ఇదే గ్రూపులో ఉంటుందిన తెలిసిందే. ఇదివరకే పాకిస్తాన్ మ్యాచులు శ్రీలంకలో ఆడేలా షెడ్యూల్ చేశారు. కనుక బంగ్లా జట్టు భారత్ రాకుండా లంకలోనే మ్యాచులు ఆడుతుంది. </p>
<p>అయితే, పాకిస్తాన్ ఐసీసీ టోర్నమెంట్ ను బహిష్కరిస్తే తీవ్ర పరిణామాలు ఎదుర్కోవలసి వస్తుంది. ఇందులో ఆంక్షలు, ప్రపంచ, ప్రాంతీయ కార్యక్రమాల నుండి సస్పెన్షన్ వేటు పడుతుంది. విదేశాలలో PSL ఆటగాళ్లకు NOCలను ఉపసంహరించుకోవడం వంటివి ఉన్నాయని క్రిక్‌బజ్ నివేదిక పేర్కొంది.</p>
<p>అందువల్ల, ఫిబ్రవరి 7, 2026న ప్రారంభమయ్యే T20 ప్రపంచ కప్ లో పాల్గొనడంపై వారి తుది నిర్ణయం ఏమిటో చూడాలి. ఆ రోజున నెదర్లాండ్స్తో వారి మొదటి మ్యాచ్ షెడ్యూల్ చేయబడింది.</p>
<p>భారత్-పాకిస్తాన్ మ్యాచ్ ఫిబ్రవరి 15, 2026న శ్రీలంకలో ఆడాలని షెడ్యూల్ చేయబడింది, భారత్ లో ఆడకూడదనే వారి డిమాండ్ మేరకు ఈ నిర్ణయం తీసుకున్నారు.</p>
2 months ago
9 
