<p><strong>Sunil Gavaskar Details Hidden Pressures Of National Selection Committee Role: </strong>భారత క్రికెట్ నియంత్రణ మండలి (బీసీసీఐ) చీఫ్ సెలెక్టర్‌గా అజిత్ అగార్కర్ పదవీకాలం ముగింపు దశకు చేరుకుంది. అక్టోబర్ 4 తర్వాత తదుపరి కార్యాచరణను బోర్డు అధికారికంగా వెల్లడిస్తుందని బీసీసీఐ కార్యదర్శి దేవాజిత్ సైకియా ఇప్పటికే ప్రకటించారు. 2023 జూలైలో బాధ్యతలు చేపట్టిన అగార్కర్ హయాంలో భారత్ అద్భుత విజయాలను సాధించింది. వన్డే ప్రపంచకప్ ఫైనల్ చేరడంతో పాటు రెండు టీ20 ప్రపంచకప్‌లు, ఆసియా కప్, ఛాంపియన్స్ ట్రోఫీ టైటిళ్లను గెలుచుకుంది. అయితే ఇదే సమయంలో విరాట్ కోహ్లీ, రోహిత్ శర్మ టెస్టులు, టీ20ల నుంచి తప్పుకోవడం, రవిచంద్రన్ అశ్విన్ అన్ని ఫార్మాట్ల నుంచి రిటైర్మెంట్ ప్రకటించడం, మహమ్మద్ షమీని పక్కన పెట్టడం లాంటి కఠిన నిర్ణయాలు కూడా జరిగాయి. తదుపరి చీఫ్ సెలెక్టర్ రేసులో పార్థివ్ పటేల్, ప్రజ్ఞాన్ ఓజా పేర్లు ప్రముఖంగా వినిపిస్తుండగా, రాబోయే న్యూజిలాండ్ పర్యటనకు కొత్త బాసే జట్టును ఎంపిక చేస్తాడనే వార్తలపై భారత క్రికెట్ దిగ్గజం సునీల్ గవాస్కర్ తాజాగా స్పందించాడు.</p>
<p>Read Also: <a title="Virat Kohli Mastery Beyond Numbers: సచిన్ కంటే వేగంగా 15 వేల ర‌న్స్ మైలురాయిని దాటిన కోహ్లీ.. 74 ఇన్నింగ్స్‌ల భారీ తేడాతో పూర్తి.." href="https://telugu.abplive.com/sports/cricket/virat-kohli-reaches-15000-odi-runs-way-faster-than-sachin-tendulkar-260128" target="_self">Virat Kohli Mastery Beyond Numbers: సచిన్ కంటే వేగంగా 15 వేల ర‌న్స్ మైలురాయిని దాటిన కోహ్లీ.. 74 ఇన్నింగ్స్‌ల భారీ తేడాతో పూర్తి..</a></p>
<p><strong>అదో ముళ్ల కిరీటం.. </strong><br />జాతీయ సెలెక్షన్ కమిటీ చైర్మన్ పదవి ఎంత గౌరవప్రదమైనదో, అంతే ప్రమాదకరమైనదని గవాస్కర్ పేర్కొన్నాడు. "ఆ కుర్చీలో కూర్చున్న వ్యక్తి వీపుపై ఒక టార్గెట్ బోర్డు అమర్చినట్లే ఉంటుంది. అంపైరింగ్, వికెట్ కీపింగ్, కామెంట్రీ విభాగాల తరహాలోనే ఇదీ సాగుతుంది. మీరు చేసిన తొమ్మిది మంచి పనులను జనం వెంటనే మర్చిపోతారు. కానీ మీరు చేశారని భావించే ఒక్క తప్పును వంద రెట్లు పెద్దదిగా చేసి పదేపదే విమర్శిస్తారు. అందుకే ఆ పదవి చేపట్టే వ్యక్తికి ఎప్పుడూ నిరంతర ఒత్తిడి తప్పదు" అని గవాస్కర్ విశ్లేషించాడు. </p>
<p>Read Also: <a title="Sindhu Fires on Schedule: 18 గంటల్లో మూడు మ్యాచ్‌లు.. ఆ మూడు పాయింట్లే కొంపముంచాయి, ఆసియా క్రీడల క్వార్టర్స్ ఓటమిపై పీవీ సింధు ఫైర్" href="https://telugu.abplive.com/sports/pv-sindhu-blames-gruelling-schedule-after-asian-games-quarterfinal-exit-260134" target="_self">Sindhu Fires on Schedule: 18 గంటల్లో మూడు మ్యాచ్‌లు.. ఆ మూడు పాయింట్లే కొంపముంచాయి, ఆసియా క్రీడల క్వార్టర్స్ ఓటమిపై పీవీ సింధు ఫైర్</a></p>
<p><strong>తెరవెనుక అసలు రాజకీయం.. </strong><br />సెలెక్షన్ కమిటీ అంతర్గత వ్యవహారాల గురించి బయటి ప్రపంచానికి పెద్దగా తెలియదని గవాస్కర్ వివరించాడు. "కమిటీలోని ఇతర సెలెక్టర్లు కొన్ని నిర్ణయాలను చైర్మన్‌పై బలవంతంగా రుద్దుతారు. కానీ మీడియా ముందుకు వచ్చి మాట్లాడాల్సింది మాత్రం ఆయనే కావడంతో అన్ని విమర్శలు చైర్మన్ మీదే పడతాయి. వెనుక ఉండి తప్పులు చేసేది ఇతర సభ్యులైనప్పటికీ, నిందలు మాత్రం మెయిన్ ప‌ర్స‌న్ కే చుట్టుకుంటాయి. గతంలో కెప్టెన్ కూడా సెలెక్షన్ మీటింగ్‌లో ఉన్నప్పుడు, కొందరు సెలెక్టర్లు బయటకు వచ్చి తమ అభిమాన మీడియా వ్యక్తులతో రహస్యంగా మాట్లాడుతూ అప్రియమైన నిర్ణయాల నెపాన్ని కెప్టెన్‌పై నెట్టేసేవారు. నా కెరీర్‌లోనూ ఇలా ఎన్నోసార్లు జరిగింది" అని పాత అనుభవాలను గుర్తుచేశాడు.</p>
<p><strong>భవిష్యత్ చీఫ్ సెలెక్టర్‌కు వార్నింగ్..</strong><br />రాబోయే కొత్త చీఫ్ సెలెక్టర్ ఎవరైనా సరే ఒక చేదు నిజాన్ని గుర్తించాలని గవాస్కర్ సూచించాడు. "కొత్త చైర్మన్‌గా ఎవరు బాధ్యతలు చేపట్టినా, ఆటగాడిగా అతడు ఎంతటి ప్రజాదరణ పొందిన దిగ్గజమైనా సరే, పదవీకాలం ముగిసి బయటకు వచ్చే సమయానికి అతడి ఖాతాలో ప్లస్‌ల కంటే మైనస్‌లే ఎక్కువగా నమోదవుతాయి. ప్రజల దృష్టిలో తప్పుడు అభిప్రాయాలే మిగిలిపోతాయి" అని హెచ్చరించాడు.</p>
1 month ago
2 
