<p><strong>Tasty Egg Masala Curry Recipe :</strong> గుడ్లతో ఎప్పుడూ ఒకే రకమైన కూర చేస్తున్నారా? అయితే ఈసారి మంచిగా టేస్టీ మసాలా చేసుకుని.. కరివేపాకు, నెయ్యితో కలిపి ఘుమఘుమలాడే ఎగ్ మసాలా కర్రీ ట్రై చేయండి. ఉడికించిన గుడ్లకు చిక్కటి మసాలా గ్రేవీని వేసి తయారు చేసే ఈ కూర వేడి వేడి రోటీలోకి, చపాతీల్లోకి, అన్నంలోకి చాలా రుచిగా ఉంటుంది. మరి దీనిని ఎలా తయారు చేయాలో.. కావాల్సిన పదార్థాలు ఏంటో చూసేద్దాం.</p>
<h3>కావాల్సిన పదార్థాలు</h3>
<p>ధనియాలు - 2 టేబుల్ స్పూన్లు</p>
<p>జీలకర్ర - 1 టీ స్పూన్</p>
<p>సోంపు - 1 టీ స్పూన్</p>
<p>మిరియాలు - 1 టీ స్పూన్</p>
<p>మెంతులు - అర టీ స్పూన్</p>
<p>అనాస పువ్వు - 1</p>
<p>దాల్చిన చెక్క - 1 ముక్క</p>
<p>యాలకులు - 3</p>
<p>జాపత్రి - చిన్న ముక్క</p>
<p>వెల్లుల్లి రెబ్బలు - 7</p>
<p>నానబెట్టిన కశ్మీరీ ఎండు మిర్చి - 5</p>
<p>నానబెట్టిన చింతపండు - 5 గ్రాములు </p>
<p>బెల్లం - 1 టేబుల్ స్పూన్</p>
<p><strong>Also Read : <a href="https://telugu.abplive.com/lifestyle/tasty-egg-maggi-recipe-homemade-easy-spicy-noodles-259931" target="_blank" rel="noopener">ఎగ్ మ్యాగీ రెసిపీ.. ఇలా చేస్తే టేస్టీగా, స్పైసీగా ఉంటుంది.. ఇంట్లోనే చేసుకోండిలా</a></strong></p>
<p>ఉడికించిన గుడ్లు - 6</p>
<p>నూనె - 1 టేబుల్ స్పూన్</p>
<p>నెయ్యి - 2 టేబుల్ స్పూన్లు</p>
<p>కరివేపాకు - 15 ఆకులు</p>
<p>ఉల్లిపాయ - 1</p>
<p>ఉప్పు - 1 టీ స్పూన్</p>
<h3>ఎగ్ మసాలా కర్రీ తయారీ విధానం</h3>
<p>ముందుగా ఎగ్స్ బాయిల్ చేసుకోవాలి. అలాగే చింతపండు, బెల్లం నానబెట్టుకోవాలి. కశ్మీరి మిర్చీ కూడా నానబెట్టుకోవాలి. తర్వాత స్టవ్‌పై పాన్ పెట్టి మంటను తక్కువగా ఉంచాలి. అందులో ధనియాలు, జీలకర్ర, సోంపు, మిరియాలు, మెంతులు, అనాస పువ్వు, దాల్చిన చెక్క, యాలకులు, జాపత్రి వేసి వేయించాలి. మంచి సువాసన వచ్చే వరకు కలుపుతూ వేయించి పక్కన పెట్టాలి. దినుసులు మాడిపోకుండా చూసుకోవాలి.</p>
<p><strong>Also Read : <a href="https://telugu.abplive.com/lifestyle/easy-and-tasty-egg-pulao-recipe-even-bachelors-can-try-for-lunch-237588" target="_blank" rel="noopener">లంచ్‌కు సింపుల్‌, టేస్టీ ఎగ్ పలావ్.. బ్యాచిలర్స్‌కూ ఈజీ రెసిపీ</a></strong></p>
<p>వేయించిన మసాలా దినుసులను మిక్సీ జార్‌లోకి తీసుకోవాలి. అందులో వెల్లుల్లి రెబ్బలు, నానబెట్టిన కాశ్మీరీ మిర్చి, చింతపండు, బెల్లం, నీళ్లు పోయాలి. వీటన్నింటినీ మెత్తగా, చిక్కటి పేస్ట్‌లా గ్రైండ్ చేసుకోవాలి. ఇప్పుడు పాన్‌లో నూనె, నెయ్యి వేసి వేడి చేయాలి. అందులో కరివేపాకు, సన్నగా తరిగిన ఉల్లిపాయ ముక్కలు వేసి వేయించాలి. ఉల్లిపాయలు బంగారు గోధుమ రంగులోకి మారి, మంచి సువాసన వచ్చేవరకు కలుపుతూ ఉడికించాలి.</p>
<p>ఉల్లిపాయలు వేగిన తర్వాత ముందుగా తయారు చేసుకున్న మసాలా పేస్ట్‌ను వేసి బాగా కలపాలి. ఇందులో కాస్త నీళ్లు, ఉప్పు వేసి కలపాలి. మసాలా అడుగున అంటుకోకుండా మధ్య మధ్యలో కలుపుతూ ఉడికించాలి. గ్రేవీ చిక్కబడి, మసాలా నుంచి నూనె పైకి తేలే వరకు ఉంచాలి. మసాలా బాగా ఉడికిన తర్వాత మరిన్ని మరిగించిన నీళ్లు వేయాలి. బాగా కలిపి గ్రేవీని మరిగించాలి. మీకు ఎంత చిక్కటి గ్రేవీ కావాలనే దాన్ని బట్టి నీరు వేసుకోవచ్చు. </p>
<p><strong>Also Read : <a href="https://telugu.abplive.com/lifestyle/spicy-garlic-egg-fried-rice-recipe-bachelor-friendly-reciepe-in-10-minutes-237470" target="_blank" rel="noopener">వెల్లుల్లి ఫ్లేవర్ లవర్స్‌కు స్పెషల్.. స్పైసీ గార్లిక్ ఎగ్ ఫ్రైడ్ రైస్ రెసిపీ</a></strong></p>
<p>ముందుగా ఉడికించి పొట్టు తీసిన ఆరు గుడ్లను సగానికి కోయాలి. మరుగుతున్న మసాలా గ్రేవీలో గుడ్లను మెల్లగా వేయాలి. గుడ్లు విరిగిపోకుండా జాగ్రత్తగా కలుపుతూ.. వాటికి మసాలా బాగా పట్టేలా చూడాలి. గుడ్లు వేసిన తర్వాత తక్కువ మంటపై మరో ఐదు నిమిషాలు ఉడికించాలి. దీంతో గుడ్లకు మసాలా రుచి బాగా పడుతుంది. గ్రేవీ చిక్కబడిన తర్వాత స్టవ్ ఆఫ్ చేయాలి. అంతే.. ఘుమఘుమలాడే ఎగ్ మసాలా కర్రీ రెడీ. </p>
<p>నోరూరించే ఈ కూరను వేడి వేడి అన్నం, జీరా రైస్ లేదా చపాతీలు, రోటీలతో తింటే రుచిగా ఉంటుంది. బెల్లం, చింతపండు కలయిక వల్ల కూరకు తీపి, పులుపు, కారం బ్యాలెన్స్ వస్తాయి. మీకు ఎక్కువ కారం ఇష్టమైతే మిర్చిని కాస్త ఎక్కువ వేసుకోవచ్చు.</p>
<p><strong>Also Read : <a href="https://telugu.abplive.com/lifestyle/restaurant-style-malai-egg-curry-recipe-at-home-smooth-creamy-and-flavorful-229987" target="_blank" rel="noopener">మలై ఎగ్ కర్రీ.. ఇంట్లోనే రెస్టారెంట్ స్టైల్ రుచి కావాలంటే ఈ రెసిపీ ట్రై చేసేయండి</a></strong></p>
2 days ago
2 
