<p><strong>Sonam Wangchuk:</strong>ఢిల్లీలోని నిరసన కేంద్రం జంతర్ మంతర్‌ వద్ద శనివారం ఉదయం ఉద్రిక్తత చోటు చేసుకుంది. నీట్‌ యూజీ పేపర్‌ లీకేజీ వ్యవహారంలో విద్యాశాఖ మంత్రి ధర్మేంద్ర ప్రధాన రాజీనామా చేయాలని విద్యావేత్త సోనమ్‌ వాంగ్‌చుక్‌ నిరశన చేపట్టారు. 21 రోజులుగా ఆమరణ దీక్ష చేస్తున్నారు. ఆయన ఆరోగ్యం క్షీణించటంతో ఆసుపత్రికి తరలించారు. </p>
<h2>జంతర్ మంతర్ వద్ద ఏం జరిగింది?</h2>
<p>శనివారం ఉదయం భారీగా మోహరించిన పోలీస్ బలగాలు నిరశన వేదిక వద్ద చేరుకొని, క్షీణిస్తున్న ఆయన ఆరోగ్య పరిస్థితిని చూపిస్తూ చికిత్స నిమిత్తం ఆసుపత్రికి తరలించారు. ఈ క్రమంలో అక్కడ ఉన్న విద్యార్థులను, మద్దతుదారులను వెళ్లిపోవాలని పోలీసులు ఆదేశించారు. దీంతో అక్కడ తీవ్ర ఉద్రిక్తత వాతావరణం నెలకొంది. </p>
<h2>క్షీణిస్తున్న వాంగ్ చుక్ ఆరోగ్యం</h2>
<p>జూన్ 28 నుంచి కేవలం ఉప్పు నీరు మాత్రమే తాగుతూ సోనమ్‌ వాంగ్ చుక్‌ దీక్ష కొనసాగిస్తున్నారు. అయితే గ 21 రోజులుగా సాగుతున్న దీక్ష కారణంగా ఆయన బలహీనపడ్డారు. 9 కిలోల బరువు తగ్గారు.గ్లూకోజ్ నిల్వలు పూర్తిగా అడుగంటిపోవడంతో శరీర కండరాల మాస్‌ను వినియోగించుకోవడం ప్రారంభించింది. దీని వల్ల కీటోన్‌ స్థాయిలు హెచ్చుతగ్గులను లోనవుతున్నాయని వైద్యులు నిర్దారించారు. ఇలాంటి పరిస్థితుల్లో దీక్ష కొనసాగితే ఆయన ప్రాణాలకు ప్రమాదమని హెచ్చరించారు. </p>
<h2>వాంగ్‌చుక్‌ ఆరోగ్యంపై ఢిల్లీ హైకోర్టు ఆదేశాలు </h2>
<p>వాంగ్‌చుక్‌ ఆరోగ్యంపై ఢిల్లీ హైకోర్టులో పిటిషన్ దాఖలైంది. దీన్ని విచారించిన హైకోర్టు ప్రతి పౌరుడి జీవితం చాలా విలువైందని అభిప్రాయపడింది. అందుకే వాంగ్‌చుక్‌ ఆరోగ్యంపై ప్రత్యేక శ్రద్ధపెట్టాలని కేంద్ర, రాష్ట్ర ప్రభుత్వాలను ఆదేశించింది. నిరంతరం వైద్య పర్యవేక్షణతోపాటు అవసరమైన అత్యవసర సహాయం అందించాలని చెప్పింది. </p>
<h2>సీజేపీ నేతల అరెస్టు </h2>
<p>వాంగ్‌చుక్‌ను ఆసుపత్రికి తరలించే ముందు ఈ దీక్షకు మద్ధతు ఇస్తున్న కాక్రోచ్ జనతా పార్టీ వ్యవస్థాపకుడు అభిజీత్‌ దీప్కే సహా కీలక నేతలను ముందస్తుగానే అదుపులోకి తీసుకున్నారు. దీక్షా స్థలంలో ఉన్న మద్దతుదారులను అక్కడి నుంచి వెళ్లిపోవాలని ఆదేశించారు. వారు పోలీసులకు వ్యతిరేకంగా నినాదాలు చేశారు. దీంతో వారిని అక్కడి నుంచి తరిమికొట్టే ప్రయత్నం చేయడం ఉద్రిక్త పరిస్థితులు ఏర్పడ్డాయి. </p>
<p>దేశవ్యాప్తంగా లక్షల మంది విద్యార్థుల భవిష్యత్‌ను ప్రభావతం చేసే నీట్ పరీక్ష పేపర్ లీక్‌, ఇతర పరీక్షల నిర్వహణలో వెలుగు చూసిన లోపాలతో ఈ ఉద్యమం పుట్టుకొచ్చింది. లోపాలకు విద్యాశాఖ మంత్రి ధర్మేంద్ర ప్రధాన బాధ్యత వహించాలని కాక్రోచ్‌ జనతాపార్టీ, సోనమ్‌ వాంగ్‌చుక్‌ డిమాండ్ చేశారు. దీనికి డిమాండ్‌తోనే ఆయన జూన్ 28 నుంచి దీక్ష చేపట్టారు. దీనికి దేశవ్యాప్తంగా మద్ధతు లభించింది. </p>
<p>సోమవారం నుంచి పార్లమెంట్ సమావేశాలు ఉన్నందున ముందస్తుగానే వాంగ్చుక్‌ను పోలీసులు జంతర్ మంతర్‌ నుంచి తరలించారు.. ఇప్పటికే వివిధ పార్టీల నేతలు ఆయన దీక్షకు మద్దతు తెలిపారు. ఇప్పుడు పార్లమెంట్ సమావేశాల సందర్భంగా వచ్చే ప్రతిపక్ష నేతలంతా అక్కడకు వెళ్లేందుకు ప్లాన్ చేస్తున్నారు. పార్లమెంట్‌లో కూడా ఈ వ్యవహారం దుమారం రేపనుంది. అందుకే ముందస్తుగా పోలీసులు వాంగ్‌చుక్ దీక్షను భగ్నం చేసి ఆయన్ని ఆసుపత్రికి తరలించారు. </p>
3 months ago
8 
