<p><strong>JioHotstar Latest Web Series Save The Tigers Season 3 Review In Telugu:</strong> జియో హాట్‌స్టార్ ఓటీటీలో 'సేవ్ ద టైగర్స్' వెబ్ సిరీస్ రెండు సీజన్లు వినోదంతో వీక్షకులను మెప్పించాయి. ప్రియదర్శి - జోర్దార్ సుజాత, అభినవ్ గోమఠం - పావని గంగిరెడ్డి, చైతన్య కృష్ణ - దేవియాని శర్మకు తోడు మూడో సీజన్ 'సేవ్ ద టైగర్స్ 3'లో 'వెన్నెల' కిశోర్ కూడా ఉన్నారు. మరి ఈ సిరీస్ ఎలా ఉంది? మొదటి రెండు సీజన్స్ తరహాలో నవ్విస్తుందా? లేదా? రివ్యూలో తెలుసుకోండి.</p>
<p><strong>కథ (Save The Tigers 3 Story):</strong> భార్య హైమావతి (జోర్దార్ సుజాత) కోరిక మేరకు గేటెడ్ కమ్యూనిటీకి కుటుంబంతో కలిసి షిఫ్ట్ అవుతాడు గంటా రవి (ప్రియదర్శి). కానీ, అక్కడ అతనికి సంతోషం ఉండదు. భార్య మాధురి (పావని గంగిరెడ్డి) ఆశించినట్టు ఉద్యోగంలో చేరతాడు రాహుల్ (అభివన్ గోమఠం). అయితే... బాస్ చెప్పినట్టు చేయలేక, ఆఫీసు వాతావరణంలో ఇమడలేక ఇబ్బంది పడతాడు. రేఖ (దేవియాని శర్మ)తో విక్రమ్ (చైతన్య కృష్ణ) విడాకుల కేసు కోర్టులో నలుగుతుంది. అతని బాధ అతనిది.</p>
<p>తమ తమ తమ జీవితాల్లో సమస్యలకు కారణం ఇంద్రుడు (వెన్నెల కిశోర్) అని, 'మ్యారేజెస్ ఆర్ మేడ్ ఇన్ హెవెన్' అంటారు కనుక స్వర్గలోకపు అధిపతి ఇంద్రుణ్ణి తిట్టుకుంటారు రవి, రాహుల్, విక్రమ్. వాళ్ళ సంగతి చిత్రగుప్తుడు (గుండు సుదర్శన్) చేతిలో పెడతాడు ఇంద్రుడు. భూలోకానికి వచ్చిన గుప్తుడు ఏం చేశాడు? రవి, రాహుల్, విక్రమ్ జీవితాల్లో ఎటువంటి మార్పులు జరిగాయి? గుప్తుడు ఇచ్చిన ఆఫర్ వల్ల జీవితాలు ఎలా తల్లకిందులు అయ్యాయి? అనేది సిరీస్ చూసి తెలుసుకోవాలి.</p>
<p><strong>విశ్లేషణ (Save The Tigers Web Series Season 3 Review In Telugu):</strong> 'సేవ్ ద టైగర్స్' మొదటి రెండు సీజన్లలో భార్యాభర్తల మధ్య కథ నడిపిన క్రియేటర్లు మహి వి రాఘవ్, ప్రదీప్ అద్వైతం... ఈసారి కథకు ఫాంటసీ ఎలిమెంట్ యాడ్ చేశారు. 'యమదొంగ' <strong>(<a title="ఎన్టీఆర్ సినిమాకు, ఈ సిరీస్‌కు కనెక్షన్ ఏమిటంటే?" href="https://telugu.abplive.com/entertainment/ott-webseries/save-the-tigers-3-surprising-yamadonga-connection-revealed-indrudu-vs-yamudu-250847" target="_self">ఎన్టీఆర్ సినిమాకు, ఈ సిరీస్‌కు కనెక్షన్ ఏమిటంటే?</a>)</strong> తరహాలో హీరోలను ఓ లోకం నుంచి మరో లోకానికి పంపారు. ఒకరి స్థానంలో అచ్చంగా అటువంటి మనిషి మరొకరిని దింపారు. దాంతో కథకు ఫ్రెష్‌నెస్ యాడ్ అయ్యింది.</p>
<p>'సేవ్ ద టైగర్స్ 2' స్పెషాలిటీ ఏమిటంటే... మెయిన్ లీడ్స్ ప్రియదర్శి - జోర్దార్ సుజాత, అభినవ్ గోమఠం - పావని గంగిరెడ్డి, చైతన్య కృష్ణ - దేవియాని శర్మకు డ్యూయల్ రోల్ చేసే అవకాశం లభించింది. ఓ లోకంలో జంటలకు, మరొక లోకంలో జంటలకు గుణగణాలు వేర్వేరు. ప్రవర్తించే తీరు వేరు. ఓ లోకంలో పాత్రలు మరొక లోకంలోకి వెళ్లిన తర్వాత... సిరీస్ చూసే వీక్షకులకు ఎవరేమిటి? అనే క్లారిటీ ఉంటుంది. కానీ, తెరపై పాత్రలకు మాత్రం తెలియదు. అందువల్ల ఏం జరుగుతుందో అనే కుతూహలం ఉంటుంది. దాన్ని క్రియేటర్లు మహి వి రాఘవ్ & ప్రదీప్ అద్వైతం, దర్శకుడు శ్రీరామ్ ఎర‌గం బాగా వాడుకున్నారు.</p>
<p>'సేవ్ ద టైగర్స్ 3' ప్రారంభమే ఇదొక సాధారణ భార్యాభర్తల కథ కాదని ఇంద్రుడి ఎంట్రీతో చెప్పేశారు. దాంతో ఫస్ట్ ఎపిసోడ్ నుంచి ఇంట్రెస్ట్ క్రియేట్ అవుతుంది. ట్విస్టులతో మొదటి రెండు ఎపిసోడ్స్ నడిపించారు. మధ్యలో సన్నివేశాలు కాస్త రిపీట్ అవుతున్న ఫీలింగ్ కలిగినా... ఎండింగ్ రెండు ఎపిసోడ్స్ అదరగొట్టారు. ఈసారి ఫాంటసీ ఎలిమెంట్ యాడ్ చేయడంతో ఫస్ట్ ఎపిసోడ్స్‌లో కామెడీని క్యూరియాసిటీ డామినేట్ చేసింది. అలాగే, భార్యాభర్తల నడుమ సన్నివేశాలు ఇంతకు ముందు చూసినట్టు ఉంటాయి. అయితే... వినోదాన్ని పూర్తిగా పక్కన పెట్టలేదు. కానీ, ఎండింగ్ వచ్చేసరికి కామెడీ డోస్ ఆడియన్స్ ఆశించిన స్థాయికి వస్తుంది.</p>
<p>Also Read<strong>: <a title="Vanda Devullu Review - 'వంద దేవుళ్ళు' రివ్యూ: అమ్మకు మళ్ళీ పెళ్లి... 'బిచ్చగాడు' కాంబినేషన్‌లో లేటెస్ట్ సినిమా - ఎలా ఉందంటే?" href="https://telugu.abplive.com/movie-review/entertainment/cinema-vanda-devullu-movie-review-rating-telugu-vijay-antony-250910" target="_self">Vanda Devullu Review - 'వంద దేవుళ్ళు' రివ్యూ: అమ్మకు మళ్ళీ పెళ్లి... 'బిచ్చగాడు' కాంబినేషన్‌లో లేటెస్ట్ సినిమా - ఎలా ఉందంటే?</a></strong></p>
<p>'సేవ్ ద టైగర్స్ 3'లో మెయిన్ లీడ్స్ అందరూ డ్యూయల్ రోల్స్ చేశారు. అయితే... చైతన్య కృష్ణ - దేవియాని శర్మ మాత్రం సర్‌ప్రైజ్ చేశారు. చైతన్య కృష్ణ రెండో రోల్ ప్లే బాయ్ అన్నమాట. లుక్ నుంచి బాడీ లాంగ్వేజ్, డైలాగ్ డెలివరీ వరకు ప్రతి అంశంలో వేరియేషన్ చూపించారు. అన్నట్టు... అతడి నోటి నుంచి కొన్ని బూతు పదాలు సైతం వచ్చాయి. క్యారెక్టర్ పరంగా చూస్తే కరెక్ట్ అనిపించవచ్చు. కానీ, కొందరి నుంచి అభ్యంతరాలు వ్యక్తం అయ్యే అవకాశాలు పుష్కలంగా ఉన్నాయి. భర్త చెప్పినట్టు నడుచుకునే భార్యగా చీరకట్టులో దేవియాని శర్మను చూస్తే... 'సైతాన్' సిరీస్‌లో నటించినది ఈ అమ్మాయేనా? అని సందేహం కలుగుతుంది. అంత వేరియేషన్ చూపించారు. 'సేవ్ ద టైగర్స్ 3'లో చైతన్య కృష్ణ - దేవియాని శర్మ హైలైట్ అవుతారు.</p>
<p>Also Read<strong>: <a title="Maa Inti Bangaram First Review - 'మా ఇంటి బంగారం' ఫస్ట్ రివ్యూ: సమంత బ్యాగ్రౌండ్ తెలిసింది... మరి సినిమా ఎలా ఉందంటే?" href="https://telugu.abplive.com/entertainment/cinema/samantha-maa-inti-bangaram-first-review-in-telugu-250790" target="_self">Maa Inti Bangaram First Review - 'మా ఇంటి బంగారం' ఫస్ట్ రివ్యూ: సమంత బ్యాగ్రౌండ్ తెలిసింది... మరి సినిమా ఎలా ఉందంటే?</a></strong></p>
<p>ప్రియదర్శి - జోర్దార్ సుజాత, అభినవ్ గోమఠం - పావని గంగిరెడ్డి తమ పాత్రలకు తగ్గట్టు నటించారు. తన కామెడీ టైమింగ్‌తో అభినవ్ మరోసారి నవ్వించారు. ఇక ఇంద్రుడిగా 'వెన్నెల' కిశోర్‌కు పెద్దగా నవ్వించే అవకాశం లభించలేదు. గుండు సుదర్శన్, అభయ్ బేతిగంటి, గంగవ్వ, జయశ్రీ రాచకొండ తదితరులు తమ తమ పాత్రలకు న్యాయం చేశారు. 'జబర్దస్త్' రోహిణి ఆఖరి ఎపిసోడ్‌లో అదరగొట్టారు.</p>
<p>భార్యలను చెప్పుచేతల్లో పెట్టుకోవాలని ఆశించే భర్తల ఈగోను శాటిస్‌ఫై చేసే సిరీస్ 'సేవ్ ద టైగర్స్ 3'. ఈసారి మెయిన్ కాన్సెప్ట్ అదొక్కటే కాదు... ఫాంటసీ అంశాలతో కథను కొత్త మలుపు తిప్పారు క్రియేటర్స్. అందువల్ల, మొదట కామెడీ కాస్త బ్యాక్ సీటు తీసుకుందని అనిపించినా... ఎండింగ్ వచ్చేసరికి బాగా నవ్వించారు. ఆరు ఎపిసోడ్స్ రన్ టైమ్ చూస్తే... మూడు గంటల సినిమా చూసినంత. స్టార్టింగ్ టు ఎండింగ్ ఎంజాయ్ చేయవచ్చు. మొదటి రెండు సీజన్లు నచ్చిన వీక్షకులకు మూడో సీజన్ కూడా తప్పకుండా నచ్చుతుంది.</p>
<p>Also Read<strong>: <a title="Deewana First Review - 'దీవానా' ఫస్ట్ రివ్యూ: షాక్ ఇచ్చిన ఇంటర్వెల్ ట్విస్ట్... హర్షిత్ రెడ్డి సినిమా ఎలా ఉందంటే?" href="https://telugu.abplive.com/entertainment/cinema/harshit-reddy-deewana-movie-first-review-in-telugu-250839" target="_self">Deewana First Review - 'దీవానా' ఫస్ట్ రివ్యూ: షాక్ ఇచ్చిన ఇంటర్వెల్ ట్విస్ట్... హర్షిత్ రెడ్డి సినిమా ఎలా ఉందంటే?</a></strong></p>
<p><iframe class="vidfyVideo" style="border: 0px;" src="https://telugu.abplive.com/web-stories/cinema/actress-rohini-best-comedy-roles-in-movies-other-than-jabardasth-or-bigg-boss-shows-188701" width="631" height="381" scrolling="no"></iframe></p>
4 months ago
11 
