<p><strong> IRFC Loan Disbursal Telangana: </strong>హైదరాబాద్ మెట్రో రైల్ ప్రాజెక్ట్ నిధులు, విస్తరణ మంజూరు అంశం ఇప్పుడు తెలంగాణ రాజకీయాల్లో తీవ్రమైన పొలిటికల్ వార్ కు దారితీసింది. ముఖ్యమంత్రి ఎ. రేవంత్ రెడ్డి జూన్ 20, 2026 నాటి అధికారిక లేఖలో కేంద్ర బొగ్గు, గనుల శాఖ మంత్రి జి. కిషన్ రెడ్డికి సవాల్ విసురుతూనే ఉమ్మడి పరిష్కారం కోసం ప్రతిపాదనలు పంపారు. జూన్ 22, 23 తేదీల్లో తాను దిల్లీ పర్యటనలో ఉంటానని, ఈ లోపే కేంద్ర రైల్వే శాఖ మంత్రి అశ్విని వైష్ణవ్‌తో ఉమ్మడి సమావేశాన్ని ఏర్పాటు చేయాలని లేఖలో కోరారు. </p>
<p><strong> దిల్లీ మీటింగ్‌కు డిమాండ్! </strong></p>
<p>ముఖ్యమంత్రి రేవంత్ రెడ్డి పంపిన తాజా లేఖలో హైదరాబాద్ మెట్రో ఫేజ్-1 టర్మ్ లోన్ రీఫైనాన్సింగ్, మెట్రో ఫేజ్-2 మంజూరుకు సంబంధించిన పెండింగ్ అంశాలను ప్రధానంగా ప్రస్తావించారు. జూన్ 16న తాను రాసిన మునుపటి లేఖను గుర్తు చేస్తూ.. ఇండియన్ రైల్వే ఫైనాన్స్ కార్పొరేషన్ నిధుల విడుదల ఆలస్యంపై కేంద్రం జోక్యం చేసుకోవాలని కోరారు. జూన్ 22, 23 తేదీల్లో తాను దిల్లీలో అందుబాటులో ఉంటానని, కేంద్ర రైల్వే మంత్రి అశ్విని వైష్ణవ్‌ను ఇద్దరం సంయుక్తంగా కలిసి వాస్తవాలను, ఒప్పంద పత్రాలను రికార్డులపై ఉంచుదామని లేఖలో స్పష్టం చేశారు. తెలంగాణ ప్రగతికి మెట్రో ప్రాజెక్ట్ అత్యంత కీలకమని ఆయన గుర్తు చేశారు.</p>
<p><strong> రూ. 13,500 కోట్ల లోన్ నిధుల నిలిపివేత! </strong></p>
<p>హైదరాబాద్ మెట్రో రైల్ ఫేజ్-1ను ప్రైవేట్ సంస్థ ఎల్‌అండ్‌టీ నుండి తెలంగాణ ప్రభుత్వం రూ. 15,000 కోట్ల ప్యాకేజీతో పూర్తిగా స్వాధీనం చేసుకునేందుకు సిద్ధమైంది. ఇందులో భాగంగా పాత అప్పులను తక్కువ వడ్డీతో రీఫైనాన్స్ చేయడానికి ఐఆర్‌ఎఫ్‌సీ సంస్థ రూ. 13,538.53 కోట్ల లోన్ మంజూరు చేసింది. రాష్ట్ర ప్రభుత్వం తన వాటా కింద రూ. 1,461.47 కోట్లు ఎస్క్రో ఖాతాలో జమ చేయడంతో పాటు ముందస్తు ఫీజుగా రూ. 84.32 కోట్లు ఐఆర్‌ఎఫ్‌సీకి చెల్లించింది. అయితే, జూన్ 15, 2026 నాడే ఈ నిధుల మొదటి విడత విడుదల కావాల్సి ఉన్నా.. కేంద్ర ప్రభుత్వం దీనిని సాంకేతిక కారణాల నెపంతో హోల్డ్‌లో పెట్టడం తీవ్ర వివాదానికి దారితీసింది.</p>
<p><strong> నిధుల బ్లాకింగ్ వెనుక కిషన్ రెడ్డి రేవంత్ రెడ్డి సంచలన ఆరోపణలు! </strong></p>
<p>ఈ నిధుల నిలిపివేత వెనుక రాజకీయ కుట్ర దాగి ఉందని సీఎం రేవంత్ రెడ్డి బహిరంగంగానే ఆరోపిస్తున్నారు. తెలంగాణలో కాంగ్రెస్ ప్రభుత్వానికి మైలేజ్ రాకూడదనే ఉద్దేశంతోనే.. కేంద్ర మంత్రి కిషన్ రెడ్డి తన తోటి కేబినెట్ మంత్రులపై ఒత్తిడి తెచ్చి ఐఆర్‌ఎఫ్‌సీ నిధులను రాకుండా అడ్డుకున్నారని రేవంత్ ఆరోపించారు. జపాన్ సంస్థ నుంచి ఐఆర్‌ఎఫ్‌సీకి అందిన నిధులను రాష్ట్రానికి బదిలీ చేయకుండా తొక్కిపెట్టారని మండిపడ్డారు. అయితే, దీనిపై కిషన్ రెడ్డి స్పందిస్తూ.. మెట్రో ఆదాయాన్ని అప్పుల చెల్లింపుల కంటే ముందుగా ఆపరేషన్స్ కు వాడాలనే నిబంధనల వల్లే ఆలస్యమవుతోందని, ఇందులో ఎలాంటి రాజకీయం లేదని కౌంటర్ ఇచ్చారు. </p>
<blockquote class="twitter-tweet">
<p dir="ltr" lang="en">Hon’ble Chief Minister Shri <a href="https://x.com/revanth_anumula?ref_src=twsrc%5Etfw">@revanth_anumula</a> has written to Union Minister Shri <a href="https://x.com/kishanreddybjp?ref_src=twsrc%5Etfw">@kishanreddybjp</a> seeking his support in arranging a meeting with Hon’ble Union Railway Minister Shri <a href="https://x.com/AshwiniVaishnaw?ref_src=twsrc%5Etfw">@AshwiniVaishnaw</a> ji, to discuss key pending issues concerning the Hyderabad Metro Rail project.… <a href="https://t.co/JDNSEWfyl7">pic.twitter.com/JDNSEWfyl7</a></p>
— Telangana CMO (@TelanganaCMO) <a href="https://x.com/TelanganaCMO/status/2068324180475666748?ref_src=twsrc%5Etfw">June 20, 2026</a></blockquote>
<p><strong> నో అబ్జెక్షన్ సర్టిఫికేట్ ఇస్తే 100% మేమే కడతాం </strong></p>
<p>రూ. 38,595 కోట్ల అంచనా వ్యయంతో చేపట్టే 122.9 కిలోమీటర్ల మెట్రో ఫేజ్-2 విస్తరణపై కేంద్రం లూప్‌హోల్స్ వెతకడంపై రేవంత్ రెడ్డి మరింత దూకుడు పెంచారు. ఒకవేళ కేంద్ర ప్రభుత్వం 50:50 భాగస్వామ్యానికి సిద్ధంగా లేకపోతే.. స్పష్టంగా ‘నో అబ్జెక్షన్ సర్టిఫికేట్’ ఇవ్వాలని, తామే సొంత వనరులతో 100% నిధులను భరించి ప్రాజెక్ట్ పూర్తి చేస్తామని సవాల్ విసిరారు. గత బీఆర్‌ఎస్ ప్రభుత్వ హయాంలో ఎలాంటి పూచీకత్తులు లేకుండా పీఎఫ్‌సీ, ఆర్‌ఎఫ్‌సీల ద్వారా రూ. 3.15 లక్షల కోట్ల అప్పులకు అనుమతులిచ్చిన కేంద్రం.. ఇప్పుడు తక్కువ వడ్డీకి వచ్చే మెట్రో లోన్‌ను ఎందుకు అడ్డుకుంటోందని ప్రశ్నిస్తూ పొలిటికల్ మైలేజ్ సాధించే వ్యూహంలో <a title="కాంగ్రెస్" href="https://telugu.abplive.com/topic/Congress" data-type="interlinkingkeywords">కాంగ్రెస్</a> ఉంది.</p>
<p><strong> దిల్లీ వేదికగా తేలనున్న మెట్రో భవిష్యత్తు! </strong></p>
<p>ముఖ్యమంత్రి <a title="రేవంత్ రెడ్డి" href="https://telugu.abplive.com/topic/Revanth-Reddy" data-type="interlinkingkeywords">రేవంత్ రెడ్డి</a> రాసిన తాజా అధికారిక లేఖ కిషన్ రెడ్డిని , <a title="బీజేపీ" href="https://telugu.abplive.com/topic/BJP" data-type="interlinkingkeywords">బీజేపీ</a> కూటమిని ఒక రకమైన డిఫెన్స్‌లోకి నెట్టింది. కేంద్ర మంత్రిగా ఉంటూ తెలంగాణకు వచ్చే నిధులను అడ్డుకుంటున్నారనే ముద్ర పడకుండా కిషన్ రెడ్డి ఈ జాయింట్ మీటింగ్‌కు చొరవ చూపించాల్సిన పరిస్థితి ఏర్పడింది. </p>
<p><iframe class="vidfyVideo" style="border: 0px;" src="https://telugu.abplive.com/web-stories/tech/5-special-tips-to-earn-lakhs-from-youtube-251025" width="631" height="381" scrolling="no"></iframe></p>
4 months ago
11 
