<p><strong>Cleaning Home After Floods :</strong> భారీ వర్షాలు, వరదల కారణంగా చాలామందికి ఇళ్లలోకి నీరు చేరుతూ ఉంటుంది. అయితే వరద నీరు తగ్గిన వెంటనే ఇంట్లోకి వెళ్లి శుభ్రం చేయడం ప్రమాదకరం కావచ్చు. ఎందుకంటే వరద నీటిలో బ్యాక్టీరియా, వైరస్‌లు, ఫంగస్, రసాయనాలు ఉండే అవకాశం ఉంది. అందుకే ఇంటిని శుభ్రం చేసే సమయంలో కొన్ని జాగ్రత్తలు తప్పనిసరిగా పాటించాలని నిపుణులు సూచిస్తున్నారు. మరి వరద నీరు తగ్గాక ఇంటిని ఎలా శుభ్రం చేయాలో తెలుసుకుందాం. </p>
<h3>ఇంట్లోకి వెళ్లే ముందు</h3>
<p>వరద నీరు తగ్గిన తర్వాత ఇంట్లోకి వెళ్లే ముందు గోడలు, పైకప్పు, మెట్లు దెబ్బతిన్నాయేమో చెక్ చేసుకోండి. విద్యుత్ సరఫరా పూర్తిగా ఆగిందో లేదో నిర్ధారించుకోండి. గ్యాస్ లీకేజీ వాసన వస్తే వెంటనే సంబంధిత అధికారులకు సమాచారం ఇవ్వాలి.</p>
<h3>గ్లవ్స్, బూట్లు, మాస్క్ </h3>
<p>వరద నీటిలో హానికరమైన సూక్ష్మజీవులు ఉండే అవకాశం ఉంది. కాబట్టి చేతులకు రబ్బర్ గ్లవ్స్, కాళ్లకు వాటర్‌ప్రూఫ్ బూట్లు, ముక్కు-నోటికి మాస్క్ ధరించి మాత్రమే ఇంటిని శుభ్రపరిచే పనులు ప్రారంభించాలి. మీకు ఏమైనా గాయాలు ఉంటే వాటిని పూర్తిగా కవర్ చేసి పనులు చేసుకోవాలి. </p>
<p><strong>Also Read : <a href="https://telugu.abplive.com/lifestyle/kitchen-cleaning-tips-7-secrets-to-make-your-kitchen-shine-during-the-festive-and-monsoon-season-214377" target="_blank" rel="noopener">కిచెన్ క్లీనింగ్ టిప్స్.. పండుగల సీజన్లో వంటగదిని మెరిసేలా చేసే 7 చిట్కాలివే</a></strong></p>
<h3>నిల్వ నీరు</h3>
<p>ఇంట్లో నిల్వ ఉన్న నీటిని పంపు లేదా బకెట్ల సహాయంతో తొలగించండి. నీరు ఎక్కువసేపు నిల్వ ఉంటే దోమలు, దుర్వాసన, ఫంగస్ పెరిగే ప్రమాదం ఉంటుంది.</p>
<h3>బురద, చెత్త క్లీనింగ్ </h3>
<p>నేల, గోడలు, ఫర్నిచర్‌పై పేరుకున్న బురదను ముందుగా తొలగించాలి. తర్వాత సబ్బు నీటితో బాగా కడిగి శుభ్రం చేయాలి.</p>
<h3>కెమికల్స్తో శుభ్రత </h3>
<p>ఫ్లోర్లు, గోడలు, తలుపులు, బాత్రూమ్ వంటి ప్రాంతాలను క్రిమిసంహారక ద్రావణంతో శుభ్రం చేయాలి. తయారీదారు సూచించిన విధంగా కెమికల్స్ ఉపయోగించడం మంచిది. శుభ్రపరిచే సమయంలో గదుల్లో గాలి బాగా వచ్చేలా కిటికీలు తెరిచి ఉంచండి.</p>
<h3>తడిసిన వస్తువులు</h3>
<p>పరుపులు, దిండ్లు, కార్పెట్లు, చెక్క ఫర్నిచర్ ఎక్కువసేపు తడిగా ఉంటే ఫంగస్ పెరిగే అవకాశం ఉంటుంది. కాబట్టి వాటిని పూర్తిగా ఆరబెట్టుకోవాలి. ఎండని వస్తువులను మళ్లీ ఉపయోగించవద్దు. అవసరమైతే మార్చడం మంచిది.</p>
<h3>ఆహార పదార్థాలు</h3>
<p>వరద నీటిలో ఉండిపోయిన ఆహార పదార్థాలు, లేదా తెరిచి ఉన్న ప్యాకెట్లు, మందులు ఉపయోగించకండి. అనుమానం ఉన్న ఆహారాన్ని పారేయడమే మంచిది.</p>
<p><strong>Also Read : <a href="https://telugu.abplive.com/lifestyle/simple-tips-to-clean-your-water-tank-and-keep-water-safe-step-by-step-guide-to-cleaning-241717" target="_blank" rel="noopener">ఇంట్లో వాటర్ ట్యాంక్ ఇలా క్లీన్ చేయండి.. స్టెప్ బై స్టెప్ గైడ్</a></strong></p>
<h3>తాగునీరు</h3>
<p>వరదల సమయంలో తాగునీరు కలుషితమై ఉండే అవకాశం ఉంది. కాబట్టి మరిగించిన లేదా సురక్షితమైన తాగునీటినే ఉపయోగించండి. నీటి ట్యాంకులు కూడా శుభ్రం చేసిన తర్వాతే వినియోగించాలి.</p>
<h3>పూర్తిగా ఆరబెట్టండి</h3>
<p>కిటికీలు, తలుపులు తెరిచి గాలి ప్రసరణ ఉండేలా చూడండి. ఇంటిని పూర్తిగా ఆరబెట్టుకోవాలి. ఫ్యాన్లు లేదా డీహ్యూమిడిఫైయర్ ఉంటే దానిని కూడా ఆన్ చేయాలి. తేమ ఎక్కువకాలం ఉంటే ఫంగస్ పెరిగే అవకాశం ఉంది.</p>
<h3>అనారోగ్య లక్షణాలు ఉంటే..</h3>
<p>వరదల తర్వాత చాలామంది జ్వరం, విరేచనాలు, వాంతులు, చర్మ దద్దుర్లు, శ్వాస సమస్యలు వంటి సమస్యలతో ఇబ్బంది పడతారు. ఈ లక్షణాలు కనిపిస్తే ఆలస్యం చేయకుండా వైద్యుడిని సంప్రదించాలి. వరదల తర్వాత నీటి ద్వారా వ్యాపించే వ్యాధుల ప్రమాదం ఎక్కువగా ఉంటుంది.</p>
<p><strong>Also Read : <a href="https://telugu.abplive.com/auto/car-washing-mistakes-avoid-damaging-paint-and-body-with-proper-cleaning-methods-242079" target="_blank" rel="noopener">ఇంట్లో కారు వాష్ చేస్తున్నారా? అయితే ఈ తప్పులు చేయకండి.. పర్ఫెక్ట్ క్లీనింగ్ ప్రాసెస్ ఇదే</a></strong></p>
<p>వరద నీరు తగ్గిన తర్వాత ఇంటిని శుభ్రం చేయడం కేవలం పరిశుభ్రత కోసమే కాదు, కుటుంబ సభ్యుల ఆరోగ్యాన్ని కాపాడేందుకు చేయాల్సిన ముఖ్యమైన విషయం. భద్రతా జాగ్రత్తలు పాటిస్తూ, క్రిమిసంహారక పద్ధతిలో ఇంటిని శుభ్రం చేయడం ద్వారా ఇన్‌ఫెక్షన్లు, ఫంగస్, దుర్వాసన వంటి సమస్యలను గణనీయంగా తగ్గించవచ్చు. ఇంట్లో చిన్నపిల్లలు, వృద్ధులు లేదా దీర్ఘకాలిక వ్యాధులు ఉన్నవారు ఉంటే పరిశుభ్రత విషయంలో మరింత అప్రమత్తంగా ఉండటం అవసరం.</p>
<p><iframe class="vidfyVideo" style="border: 0px;" src="https://telugu.abplive.com/web-stories/lifestyle/essential-tips-to-keep-your-kids-healthy-during-the-rainy-season-252642" width="631" height="381" scrolling="no"></iframe></p>
3 months ago
7 
