<p><strong>Podarillu Serial Today Episode:</strong> స్టార్ మా ఛానెల్‌లో అత్యంత ప్రేక్షక ఆదరణతో దూసుకుపోతున్న పొదరిల్లు సీరియల్‌లో ఈరోజు ఎపిసోడ్ ఆసక్తిగా సాగుతుంది. గ్రామదేవత మొక్కు తీర్చుకోవడానికి రుద్రవరం వెళ్లడానికి మాధవ్‌తోపాటు అన్నదమ్ములంతా నిర్ణయించుకుంటారు. నారాయణ వద్దని చెబుతున్నా వినిపించుకోకుండా బయలుదేరతారు. మార్గమధ్యలోనే రౌడీలు నారాయణపై హత్యాయత్నం చేయగా...కొడుకులు కాపాడతారు. తీరా రుద్రవరం వెళ్లిన తర్వాత అక్కడ గాయత్రి, వాళ్ల అమ్మ కూడా మొక్కు తీర్చుకోవడానికి రావడం చూసి మాధవ్‌ ఆశ్చర్యపోతాడు.<br /><strong>గుడికి బయలుదేరిన కుటుంబం</strong><br /> గ్రామదేవత ఎవరో తెలిసిపోవడంతో అందరూ కలిసి మొక్కు తీర్చుకోవడానికి రుద్రవరం వెళ్లాలని నిర్ణయించుకుంటారు. ఆ ఊరి పేరు చెప్పగానే నారాయణ వద్దని చెబుతున్నా వినకుండా అన్నయ్య మొక్కు తీర్చుకోవాలని కదా అని చక్రి చెప్పడంతో మీ ఇష్టమని చెప్పి నారాయణ బయటకు వెళ్లిపోతారు. మనం అందరం వెళ్లిపోతే మనీషా ఒక్కతే ఇంట్లో ఉంటే ఇబ్బంది అవుతుందని భావించిన చక్రి...ఆమెను కూడా మనతోనే తీసుకెళ్తామని చెబుతాడు. దీనికి మనీషా కూడా సరేనంటుంది. తెల్లారిన తర్వాత అందరూ కలిసి కారులో రుద్రవరం బయలుదేరతారు. మొదట రానని చెప్పినా నారాయణ కూడా వాళ్లతో పాటు గుడికి బయలుదేరి వెళ్తాడు.<br /><strong>నారాయణపై హత్యాయత్నం</strong><br /> రుద్రవరం పొలిమేరల్లోకి వెళ్లగానే కొందరు దారికాచి కారుకు అడ్డంగా చెట్టుపడేస్తారు. నారాయణ కిందకు దిగి తీస్తానని చెబుతున్న అంత పెద్ద చెట్టు నువ్వు ఎలా తీయగలవని అంటూ నలుగురు కొడుకులు కిందకు దిగి కొమ్మలు పక్కన పడేస్తారు. అప్పటికీ నారాయణ కీడు శంకిస్తుంటాడు. కారు దిగి చాలా కంగారుపడుతుంటాడు. మహాలక్ష్మీ, మనీషా కూడా కిందకు దిగి ఫొటోలు దిగుతుండగా...పొదలు చాటు నుంచి ముగ్గురు రౌడీలు కత్తులు, గొడ్డళ్లతో నారాయణను చంపడానికి మీదకు వస్తారు. అప్పుడే చక్రి, మాధవ్‌, కేశవ్ వాళ్లను అడ్డుకుని పిచ్చికొట్టుడు కొడతారు. అయినా సరే నారాయణను చంపడానికే ప్రయత్నిస్తుండగా మహా కూడా వాళ్లను కొడుతుంది. పట్టుకుని వాళ్లు ఎవరో ఆరా తీయడానికి ప్రయత్నించగా తప్పించుకుని పారిపోతారు. వీళ్లను కూడా వీళ్ల అన్న రమణయ్యే పంపించి ఉంటాడని చక్రి అంటాడు. ఇది వాళ్లపనికాదని...ఎవరో దారిదోపిడీ మఠా అని నారాయణ అంటాడు. ఇక్కడ ఉండటం మంచిది కాదని వెళ్లిపోదామని చెబుతాడు.<br /><strong>చక్రి మేనమామ కుట్ర</strong><br /> నారాయణపై హత్యాయత్నం చేసి తప్పించుకుని పారిపోయిన రౌడీలు వాళ్ల బావమరిది దగ్గరకు వెళ్లి విషయం మొత్తం చెబుతారు. మీ బావతో పాటు నలుగురు కొడుకులు కోడళ్లు వచ్చారని అందుకే చంపలేకపోయామని చెబుతారు. ఇన్నాళ్లకు నిన్ను చంపిన వాడి రక్తం కళ్లచూద్దామనుకుంటే కుదరలేదు అక్కా అంటూ వాళ్ల అక్క ఫొటోకు దణ్ణం పెట్టుకుని...ఖచ్చితంగా ఆ నారాయణను ఇక్కడి నుంచి తిరిగి ప్రాణాలతో పంపించనని శపథం చేస్తాడు. ఆ తర్వాత రమణయ్యకు ఫోన్ చేసి తిడతాడు. ఆ నారాయణ ఒక్కడే వస్తున్నాడని చెప్పావు కదా...మళ్లీ వీళ్లంతా ఎందుకు వచ్చారని అంటాడు. వాడిని చంపడం నీకు చేతగాక నన్ను అంటావేంటని అంటాడు. అయినా నారాయణను చంపితే నీకు వచ్చే లాభం ఏంటని అంటే...వాడు చస్తే ఆ బృందావనం నాది అవుతుందని, మీ అక్కను చంపినందుకు నీ పగ కూడా చల్లారుతుందని అంటాడు. <br /><strong>దేవుడి మొక్కుకోసం వచ్చిన గాయత్రి</strong><br /> అమ్మవారి గుడికి ఉదయం వెళ్లనుండటంతో ఈరోజు రాత్రి బసకు చక్రి ఫ్రెండ్‌ సతీష్‌ ఓ సత్రానికి వాళ్లందరినీ తీసుకెళ్తాడు. అయితే అప్పటికే అక్కడ తాయరు, గాయత్రి ఉంటారు. వాళ్లను చూసిన మాధవ్‌ మీరు ఇక్కడ ఏం చేస్తున్నారని అడిగితే...మొక్కు ఉందని మా అమ్మ తీసుకొచ్చిందని చెబుతుంది.మరి నేను అడిగితే నీకు గ్రామ దేవత ఊరు తెలియదని చెప్పావు కదా అని మహా నిలదీస్తుంది. నిజంగా నాకు కూడా తెలియదని...మా అమ్మే తీసుకొచ్చిందని చెప్పడంతో ఈరోజు ఎపిసోడ్ ముగిసిపోతుంది.</p>
<p> </p>
2 months ago
4 
