<p><strong>Pocharam Srinivas Reddy: </strong>తెలంగాణ రాజకీయాల్లో సీనియర్ నేత, బాన్సువాడ ఎమ్మెల్యే, ప్రస్తుత ప్రభుత్వ వ్యవసాయ సలహాదారు డాక్టర్ పోచారం శ్రీనివాస్‌ రెడ్డి చేసిన తాజా వ్యాఖ్యలు రాష్ట్రవ్యాప్తంగా చర్చనీయాంశమయ్యాయి. బీఆర్‌ఎస్‌ నుంచి గెలిచిన కాంగ్రెస్ గూటికి చేరిన ఆయన, పాత స్నేహాన్ని గుర్తు చేసుకుంటూనే ప్రస్తుత ప్రభుత్వంలోని లోపాలను ఎత్తిచూపారు. కామారెడ్డి జిల్లా బీర్కూర్‌ మండలం మంజీరా చెక్ డ్యాం వద్ద నిర్వహించిన కార్యకర్తల ఆత్మీయ సమ్మేళనంో ఆయన మాట్లాడిన మాటలు రాజకీయ వర్గాల్లో హాట్ టాపిక్‌గా మారాయి. </p>
<h2>అన్నం పెట్టిన వారిని మరచిపోలేను: పోచారం </h2>
<p>పోచారం శ్రీనివాస్ రెడ్డి తన ప్రసంగంలో మాజీ ముఖ్యమంత్రి కేసీఆర్ పట్ల తనకున్న కృతజ్ఞతను బహిరంగంగానే చాటుకున్నారు. అన్నం పెట్టిన వారిని మిచిపోలేం అంటూ ఆయన చేసిన వ్యాఖ్య రాజకీయంగా ప్రాధాన్యత సంతరించుకుంది. తన నియోజకవర్గమైన బాన్సువాడలో జరిగిన అభివృద్ధి అంతా కేసీఆర్ హయాంలోనే జరిగిందన, ఆ వాస్తవాన్ని చెప్పడానికి తాను ఏ మాత్రం వెనుకబాడబోనని ఆయన స్పష్టం చేశారు. <a title="కేసీఆర్" href="https://telugu.abplive.com/topic/kcr" data-type="interlinkingkeywords">కేసీఆర్</a>‌ను మోసం చేసి పార్టీ మారడం తనకు ఇష్టం లేదని, కానీ నియోజకవర్గంలో తలెత్తిన కొన్ని అనివార్య రాజకీయ పరిస్థితులు, ఇబ్బందులు వల్లే తాను కాంగ్రెస్‌తో చేతులు కలపాల్సి వచ్చిందని వివరించారు. తాను కేవలం నియోజకవర్గ ప్రయోజనాల కోసమే ఈ నిర్ణయం తీసుకున్నానని, ఏనాడు డబ్బులకు అమ్ముడుపోయే వ్యక్తిని కాదని ఆయన స్పష్టం చేశారు. </p>
<h2>పార్టీ ఎందుకు మారాల్సి వచ్చింది...</h2>
<p>పోచారం కాంగ్రెస్ పార్టీలోకి ఎందుకు వెళ్లాల్సి వచ్చిందనే అంశంపై క్లారిటీ ఇచ్చారు. దాదాపు రెండేళ్ల క్రితం మంత్రి పొంగులేటి శ్రీనివాస్ రెడ్డి తన ఇంటికి వచ్చి ముఖ్యమంత్రి రేవంత్ రెడ్డితో మాట్లాడించారని ఆయన గుర్తు చేసుకున్నారు. అనంతరం ముఖ్యమంత్రి స్వయంగా తన నివాసానికి వచ్చి, ఆరు నెలల కాలంలో నియోజకవర్గంలో పెండింగ్‌ సమస్యల పరిష్కారానికి నిధులు మంజూరు చేస్తామని హామీ ఇచ్చారని తెలిపారు. నియోజకవర్గ అభివృద్ధి జరుగుతుందనే ఏకైక ఆశతోనే తాను రేవంత్ రెడ్డికి మద్దతు ప్రకటించానని, కేవలం అభివృద్ధి కోసమే ఆనాడు తాను మూడు రంగుల జాతీయ కండువాను కప్పుకున్నానని ఆయన వెల్లడించారు. తాను పదవుల కోసమో, ఆర్థిక ప్రయోజనాల కోసమో పార్టీ మారలేదని, నియోజకవర్గ ప్రజల కోసమే ఈ అడుగులు వేశామని ఆయన పేర్కొన్నారు. </p>
<h2>మంత్రులపై అసంతృప్తి </h2>
<p>ముఖ్యమంత్రి తనకు గౌరవం ఉన్నప్పటికీ, ప్రభుత్వంలోని మంత్రుల తీరుపై పోచారం తీవ్ర అసహనం వ్యక్తం చేశారు. సీఎం <a title="రేవంత్ రెడ్డి" href="https://telugu.abplive.com/topic/Revanth-Reddy" data-type="interlinkingkeywords">రేవంత్ రెడ్డి</a> ఇచ్చిన హామీలు ఇప్పటికే నెరవేరలేదని ఆయన ఆవేదన వ్యక్తం చేశారు. మరీ ముఖ్యంగా తాను ఒక సీనియర్‌ ఎమ్మెల్యేగా, ప్రభుత్వం సలహాదారుగా ఉండి ఫోన్ చేసిన మంత్రులు తన కాల్స్‌ ఎత్తడం లేదని ఆయన బహిరంగంగా విమర్శించారు. ముఖ్యమంత్రి చెప్పినా మంత్రులు నా మాట వినడం లేదు అని ఆయన వ్యాఖ్యానించడం <a title="కాంగ్రెస్" href="https://telugu.abplive.com/topic/Congress" data-type="interlinkingkeywords">కాంగ్రెస్</a> ప్రభుత్వంలోని అంతర్గత సమన్వయ లోపాన్ని ఎత్తి చూపుతోంది. ఈ కమ్యూనికేషన్ గ్యాప్‌ వల్ల నియోజకవర్గంలో పనులు కుంటుపడుతున్నాయని ఆయన ఆందోళన వ్యక్తం చేశారు. </p>
<h2>నియోజకవర్గ అభివృద్ధిపై ప్రభావం </h2>
<p>మంత్రుల సహకారం లేకపోవడం, నిధుల విడుదలలో జాప్యం జరగడం వల్ల బాన్సువాడ నియోజకవర్గంలో పలు అభివృద్ధి పనులు సగంలోనే నిలిచిపోయాయని పోచారం తెలిపారు. గతంలో ప్రారంభమైన పనులకు బిల్లులు రాకోవడంతో కాంట్రాక్టర్లు పనులను పక్కన పెట్టేశారని, ఇది ప్రజలకు ఇబ్బందికరంగా మారిందని ఆయన వివరించారు. ఉన్నది ఉన్నట్టుగా మాట్లాడటం తన నైజామని, రాజకీయ రహస్యాలు ఏవీ తన మాటాల్లో లేవని ఆయన స్పష్టం చేశారు. </p>
2 months ago
4 
