<p><strong>Petrol & Diesel Price: </strong>2026 జూలై 8న, టర్కీ రాజధాని అంకారాలో జరుగుతున్న నాటో శిఖరాగ్ర సమావేశంలో అమెరికా అధ్యక్షుడు డొనాల్డ్ ట్రంప్ చేసిన ప్రకటన ప్రపంచ మార్కెట్లను కుదిపేసింది. "ఇరాన్‌తో కాల్పుల విరమణ ఒప్పందం రద్దైంది. నేను ఇకపై ఇరాన్‌తో ఎలాంటి ఒప్పందాలు చేసుకోవాలనుకోవడం లేదు," అని ట్రంప్ ప్రకటించారు. ఇరాన్‌పై మంగళవారం రాత్రి దాడి చేసినట్టు కూడా ట్రంప్ వెల్లడించారు. ఈ దెబ్బకు చమురు, గ్యాస్ ధరలు ఆకాశాన్నంటాయి. మార్కెట్‌లు కుప్పకూలాయి. ఈ పరిస్థితులు కారణంగా భారత్‌లో చమురు, గ్యాస్ ధరలు మరింత పెరుగుతాయా?</p>
<h2>ట్రంప్ ప్రకటనతో వచ్చిన మార్పులు ఇవే! </h2>
<h3>మొదటి ప్రభావం: చమురు ధరలలో తక్షణ పెరుగుదల</h3>
<p>ట్రంప్ ప్రకటన వెలువడిన వెంటనే, అంతర్జాతీయ మార్కెట్లో ముడి చమురు ధరలు ఒక్కసారిగా పెరిగాయి. బ్రెంట్ ముడి చమురు ధరలు 5 శాతానికిపైగా పెరిగి బ్యారెల్‌కు 78 డాలర్లను దాటాయి. డబ్ల్యూటీఐ ముడి చమురు ధర కూడా బ్యారెల్‌కు 74 డాలర్లకు చేరుకుంది. ఇదే కంటిన్యూ అయితే, హోర్ముజ్ జలసంధి పూర్తిగా మూసుకుపోతే, ముడి చమురు ధరలు బ్యారెల్‌కు 85 నుంచి 90 డాలర్ల వరకు చేరవచ్చని నిపుణులు అంటున్నారు.</p>
<p>భారత్‌ తన ముడి చమురు అవసరాల్లో దాదాపు 90 శాతాన్ని దిగుమతిపైనే ఆధారపడి ఉంది. అందుకే ప్రపంచ చమురు ధరలు పెరిగితే, భారత్‌ దానిని కొనడానికి ఎక్కువ చెల్లించాల్సి వస్తుంది. ఇది నేరుగా ప్రజల జేబులపై ప్రభావం చూపుతుంది. దీంతో పెట్రోల్, డీజిల్ నుంచి CNG వరకు, చివరికి నిత్యావసర వస్తువుల వరకు అన్నింటి ధరలు పెరుగుతాయి. </p>
<h3>రెండో ప్రభావం: భారత స్టాక్ మార్కెట్‌పై ఒత్తిడి </h3>
<p>ట్రంప్ ప్రకటన భారత స్టాక్ మార్కెట్‌పై వెంటనే ప్రభావాన్ని చూపింది. సెన్సెక్స్ 1,600 పాయింట్లకుపైగా పడిపోగా, నిఫ్టీ 2శాతానికి పైగా కుప్పకూలింది. ఈ పతనానికి కారణాలు స్పష్టంగా ఉన్నాయి:</p>
<p>ఇరాన్‌తో శాంతిపై ఆశలు ఆవిరైపోవడంతో పెట్టుబడిదారుల విశ్వాసం సన్నగిల్లింది. </p>
<p>ముడి చమురు ధరలు ఒక్కసారిగా పెరిగాయి.</p>
<p>చమురు ధరల పెరుగుదల కారణంగా భారత్‌ ఎక్కువ డాలర్లను కొనుగోలు చేయాల్సి వస్తోంది. దీనివల్ల రూపాయి బలహీనపడుతుంది.</p>
<p>సీనియర్ మార్కెట్ విశ్లేషకుడు తిలోక్‌చంద్ గగ్లానీ ప్రకారం "ఒకవేళ హోర్ముజ్ జలసంధి మూసుకుపోతే, ముడి చమురు ధర బ్యారెల్‌కు 85-90 డాలర్లకు చేరవచ్చు. భారత్‌ తన సరఫరా మార్గాలను విస్తరించింది. వ్యూహాత్మక నిల్వలను ఏర్పాటు చేసుకుంది. అందుకే పెద్దగా ప్రభావం ఉండదు" అని ఆయన అన్నారు.</p>
<h3>మూడో ప్రభావం: ద్రవ్యోల్బణం పెరిగే ప్రమాదం</h3>
<p>2026 మే నెలలో, ఇరాన్ యుద్ధ సమయంలో, దేశంలో టోకు ద్రవ్యోల్బణం (WPI) 2026 ఫిబ్రవరిలోని 2.2% నుంచి 9.7%కి పెరిగింది. దీని అర్థం టోకు ధరలు 9.7% పెరిగాయని, ఇది సామాన్యుడికి ఒక పెద్ద దెబ్బ.</p>
<p>ట్రంప్ మళ్లీ ఉద్రిక్తతలు పెంచారు. అందుకే ఈ పరిస్థితి ఇలాగే కొనసాగితే భారత్‌ ముడి చమురు దిగుమతుల విలువ బ్యారెల్‌కు 75 డాలర్లను దాటవచ్చని నిపుణులు ఆందోళన చెందుతున్నారు. దీనివల్ల దిగుమతుల బిల్లు పెరిగి, ద్రవ్యోల్బణం అధికమై, కరెంట్ ఖాతా లోటు మరింత తీవ్రమై, కార్పొరేట్ లాభాలపై ఒత్తిడి పెరుగుతుంది. అయితే, భారత్‌కు ఉన్న ప్రత్యామ్నాయాలు ఈ ప్రభావాన్ని కొంతమేర తగ్గించగలదు.</p>
<h3>నాల్గో ప్రభావం: రూపాయిపై ఒత్తిడి పెరగడం</h3>
<p>ముడి చమురు ధర ఎక్కువగా ఉన్నప్పుడు, దానిని కొనడానికి మరిన్ని డాలర్లు అవసరమవుతాయి. దీనివల్ల డాలర్లకు డిమాండ్ పెరిగి, రూపాయి బలహీనపడుతుంది. రూపాయి బలహీనపడటం వల్ల విదేశాల నుంచి దిగుమతి అయ్యే ప్రతి వస్తువు ధర పెరుగుతుంది. అంతేకాకుండా, విదేశాల్లో చదువుకుంటున్న విద్యార్థులు, విదేశాలకు ప్రయాణించేవారు మరింత ఖర్చు చేయాల్సి ఉంటుంది. </p>
<h2>ఐదో ప్రభావం: పెట్రోల్, డీజిల్, సిఎన్‌జి ధరలు ఎప్పుడు, ఎంత పెరుగుతాయి?</h2>
<h3>ప్రతిఒక్కరి మైండ్‌లో ఇప్పుడు మెదులుతున్న అతిపెద్ద ప్రశ్న ఇదే...</h3>
<p>ధరలు పెరుగుతాయని, కానీ వెంటనే కాదని నిపుణులు అంటున్నారు. 2026 మేలో ఇరాన్ యుద్ధం ప్రారంభమైనప్పుడు, ప్రభుత్వ ఆధ్వర్యంలోని చమురు కంపెనీలు పెట్రోల్, డీజిల్ ధరలను లీటరుకు 3 రూపాయలు, సీఎన్‌జీ ధరను కిలోగ్రాముకు 2 రూపాయలు పెంచాయి. </p>
<p>ప్రస్తుతం, ఒకటి రెండు దాడుల వల్ల ధరలు తక్షణమే పెరగవు, కానీ ఉద్రిక్తతలు ఎక్కువ కాలం కొనసాగితే, హోర్ముజ్ నుంచి రవాణా నిలిచిపోతే లేదా ప్రపంచ ఎల్ఎన్జీ ధరలు ఎక్కువ కాలం పాటు అధికంగా ఉంటే, అప్పుడు భారత్‌లో కూడా చమురు, గ్యాస్ ధరలపై ప్రభావం చూపుతాయి.</p>
<p>విదేశీ వ్యవహారాల నిపుణుడు, జేఎన్‌యూ ప్రొఫెసర్ అయిన డాక్టర్ రాజన్ కుమార్, భారత్‌లో చమురు ధరలు ముడి చమురు ధరపై ఆధారపడి ఉంటాయని అంటున్నారు. ముడి చమురు ధర 75-78 డాలర్ల వద్ద కొనసాగితే, 2-4 వారాల్లో ధరలు పెరగవచ్చు. ఒకవేళ హోర్ముజ్ జలసంధి మూసుకుపోయి, ముడి చమురు ధర 85-90 డాలర్లకు చేరితే, ఈ పెరుగుదల మరింత ఎక్కువగా ఉండవచ్చు అన్నారు. </p>
<h2>ఈ పరిస్థితిని ఎదుర్కోవడానికి భారత్‌ సిద్ధంగా ఉందా?</h2>
<p>దీనికి సమాధానం రెండు విధాలుగా చెప్పవచ్చు. ఇందులో ఒకటి శుభవార్త ఉంటే మరొకటి విచారకరమైనది ఉంది. </p>
<h2>భారీగా భారత్‌ చమురు నిల్వ </h2>
<p>2026 జూన్ చివరి నాటికి భారత్‌ వద్ద మొత్తం 104 మిలియన్ బ్యారెళ్ల ముడి చమురు నిల్వలు ఉన్నాయి, ఇది గత ఏడాదిలో అత్యధికం. ఇందులో వ్యూహాత్మక పెట్రోలియం నిల్వలు (SPR), వాణిజ్య నిల్వలు, రిఫైనరీ నిల్వలు ఉన్నాయి.</p>
<p>భారత్‌ వ్యూహాత్మక పెట్రోలియం నిల్వల సామర్థ్యం 39 మిలియన్ బ్యారెళ్లు. అంటే, విశాఖపట్నం, మంగళూరు, పడూర్ అనే మూడు వ్యూహాత్మక నిల్వలు మొత్తం 39 మిలియన్ బ్యారెళ్ల చమురును నిల్వ చేయగలవు. ఈ వ్యూహాత్మక నిల్వలు భారత్‌కు సుమారు 9.5 రోజుల దిగుమతుల అవసరాలను తీరుస్తాయి. అంటే, ఒకవేళ ఏ కారణం చేతనైనా చమురు సరఫరాకు పూర్తిగా అంతరాయం ఏర్పడితే, ఈ నిల్వలు దేశానికి 9.5 రోజులపాటు అవసరాలను తీర్చగలవు.</p>
<p>దీనికి అదనంగా, ప్రభుత్వ రంగ చమురు కంపెనీల వద్ద 64.5రోజుల దిగుమతులకు సరిపడా ముడి చమురు, పెట్రోలియం ఉత్పత్తుల నిల్వలు ఉన్నాయి. పెట్రోలియం మంత్రిత్వ శాఖ గణాంకాల ప్రకారం, మొత్తం మీద భారత్‌ వద్ద సుమారు 74 రోజుల దిగుమతులకు సరిపడా ముడి చమురు, పెట్రోలియం ఉత్పత్తుల నిల్వలు ఉన్నాయి.</p>
<h2>నిల్వలు చైనా కంటే తక్కువగా ఉండటం ఆందోళనకరం</h2>
<p>ఆసియాలో రెండో అతిపెద్ద ఇంధన వినియోగదారు అయిన చైనాతో పోలిస్తే భారత్‌ వ్యూహాత్మక నిల్వలు చాలా తక్కువగా ఉన్నాయి. చైనా వద్ద ఉన్న నిల్వలతో అది తన ముడి చమురు దిగుమతులను భారీగా తగ్గించుకోగలదు. ఇరాన్ యుద్ధం భారత్‌ పరిమిత వ్యూహాత్మక చమురు నిల్వ సామర్థ్యాన్ని బహిర్గతం చేసింది. అందువల్ల, మంగళూరులో ₹15,000 కోట్ల విలువైన కొత్త వ్యూహాత్మక నిల్వను నిర్మించమని ప్రభుత్వం ఓఎన్‌జీసీని కోరింది.</p>
<p>చండిఖోల్, బినా, బికనీర్‌లలో కొత్త నిల్వ సౌకర్యాల ఏర్పాటుకు, అలాగే మంగళూరు-పదూర్‌లో సామర్థ్యాన్ని విస్తరించడానికి కేంద్ర ప్రభుత్వం ప్రణాళికలు రచిస్తోంది. ఈ ప్రాజెక్టులు పూర్తయిన తర్వాత, 40 రోజుల దిగుమతులకు సమానమైన వ్యూహాత్మక నిల్వ సామర్థ్యం పెరుగుతుంది.</p>
3 months ago
9 
