<p>నర్సంపేట మాజీ ఎమ్మెల్యే పెద్ది సుదర్శన్ రెడ్డి తీవ్ర అనారోగ్యానికి గురయ్యారు. కార్డియాక్ అరెస్ట్ కావడంతో మెరుగైన వైద్య చికిత్స కోసం ఆయనను గ్రీన్ చానల్ ద్వారా వరంగల్ నుండి సికింద్రాబాద్‌లోని యశోద ఆసుపత్రికి తరలించారు. అత్యవసర పరిస్థితుల్లో బాధితుడిని వేగంగా తరలించేందుకు అధికారులు గ్రీన్ చానల్ ఏర్పాటు చేయగా, ఆయన ప్రయాణిస్తున్న అంబులెన్స్ వెంటే బిఆర్ఎస్ ముఖ్య నేతలు కేటీఆర్, హరీశ్ రావు బయలుదేరి వెళ్లారు.</p>
<p><strong>గంటసేపు సీపీఆర్ తరువాత రెస్పాండ్ అయిన సుదర్శన్ రెడ్డి</strong></p>
<p>ఉదయం రోహిణి ఆసుపత్రికి తీసుకువచ్చిన సమయంలో కార్డియాక్ అరెస్ట్‌కు గురైన సుదర్శన్‌రెడ్డికి వైద్య బృందం దాదాపు గంట సేపు శ్రమించి సీపీఆర్ (CPR) చేయగా ఆయన స్పందించారని డాక్టర్ మమతా రెడ్డి తెలిపారు. గుండెకు రక్తాన్ని తీసుకెళ్లే ఫల్మనో ఆర్ట్రీ రక్తనాళంలో రక్తం గడ్డకట్టడం వల్ల బ్లాక్‌లు ఏర్పడ్డాయి. వాటిని కరిగించడానికి ప్రత్యేక ఇంజెక్షన్ ఇచ్చినట్లు వెల్లడించారు. అనంతరం యాంజియోగ్రామ్ నిర్వహించగా ప్రస్తుతం పల్స్ సాధారణ స్థితికి వచ్చిందని, కుటుంబ సభ్యుల విజ్ఞప్తి మేరకు మెరుగైన వైద్యం కోసం వెంటిలేటర్ సహాయంతో గ్రీన్ ఛానెల్ ద్వారా హైదరాబాద్‌కు తరలిస్తున్నట్లు పేర్కొన్నారు. </p>
<p><iframe title="YouTube video player" src="https://www.youtube.com/embed/elzHfM4Fgn8?si=lmosUwVbPgG4198t" width="560" height="315" frameborder="0" allowfullscreen="allowfullscreen"></iframe></p>
<p>పెద్ది సుదర్శన్‌రెడ్డి గుండెపోటుకు గురయ్యారనే విషయం తెలియగానే బీఆర్‌ఎస్‌ కార్యనిర్వాహక అధ్యక్షుడు కేటీఆర్‌, మాజీ మంత్రి హరీశ్‌రావు వెంటనే ఆసుపత్రికి చేరుకున్నారు. సుదర్శన్‌రెడ్డి కుటుంబ సభ్యులను పరామర్శించి వారికి ధైర్యం చెప్పారు. అనంతరం ఆయన్ను పరీక్షించిన వైద్యులతో మాట్లాడి ఆరోగ్య పరిస్థితిపై వివరాలు అడిగి తెలుసుకున్నారు. మెరుగైన చికిత్స కోసం అంబులెన్స్ వెంటే కేటీఆర్, హరీశ్ రావులు కూడా హైదరాబాద్‌కు బయలుదేరి వెళ్లారు.</p>
<p>మాజీ ఎమ్మెల్యే సుదర్శన్ రెడ్డి ఆరోగ్యంపై బీఆర్ఎస్ డిప్యూటీ ఫ్లోర్ లీడర్ హరీష్ రావు స్పందించారు. పెద్ది సుదర్శన్ రెడ్డి ఆరోగ్యం స్థిరంగానే ఉందని, కానీ ఎలాంటి ఇబ్బంది తలెత్తకుండా ముందు జాగ్రత్తగా హైదరాబాద్‌కు తరలిస్తున్నామని మాజీ మంత్రి హరీష్ రావు తెలిపారు. మరోసారి ఇలాంటి పరిస్థితి రాకుండా మెరుగైన వైద్యం కోసం సికింద్రాబాద్ యశోదా ఆసుపత్రికి తరలిస్తున్నట్లు వెల్లడించారు. అయితే అంబులెన్స్‌కు ఎలాంటి అడ్డంకులు లేకుండా అందరూ సహకరించి, పక్కకు జరగాలని విజ్ఞప్తి చేశారు. </p>
<p>ఆదివారం ఉదయం మాజీ ఎమ్మెల్యే పెద్ది సుదర్శన్ రెడ్డి చనిపోయారని వార్తలు ప్రచారం అయ్యాయి. అయితే పెద్ది సుదర్శన్ రెడ్డి మృతి అని వస్తున్న వార్తలు అవాస్తవం అని, ప్రస్తుతం చికిత్స నడుస్తుంది.. వెంటిలేటర్ పైన ఉంచామని డాక్టర్ సుధాకర్ రెడ్డి తెలిపారు.</p>
3 months ago
7 
