<p><strong>Nizamabad Riyaz Encounter News: </strong>నిజామాబాద్ రియాజ్ ఎన్ కౌంటర్ తెలుగు రాష్ట్రాల్లో తీవ్ర సంచలనంగా మారింది.ఈనెల 17 తేదిన సీరియల్ అఫెండర్ రియాజ్ ను అరెస్ట్ చేసి, బైక్ పై తీసుకెళుతుండగా, కత్తితో కానిస్టేబుల్ ప్రమోద్ పై కిరాతంగా దాడిచేసి ప్రాణాలు తీశాడు. ఈ ఘటనను తెలంగాణ పోలీసుశాఖ చాలా సీరియస్ గా తీసుకోవడమేకాదు, రియాజ్ ను పట్టుకోవడం ఇజ్జత్ కా సవాల్ గా భావించి, ఏకంగా 50వేల రివార్డ్ ను ప్రకటించింది. మొత్తానికి సారంగపూర్ శివారులో రియాజ్‌ను గుర్తించి, పట్టుకునే ప్రయత్నం చేస్తే , దాడిచేసి,తాళ్లతో కట్టి మరీ ఆసుపత్రికి చేర్చారు పోలీసులు. ఇక్కడ ట్విస్ట్ ఏంటంటే.. రియాజ్‌ను పట్టుకున్న సమయంలోనే ఎన్ కౌంటర్ చేశారనే టాక్ గట్టిగా వినిపించింది. మీడియా ఛానెల్స్ సైతం రియాజ్ ఎన్ కౌంటర్ అనే వార్తలను ప్రసారం చేశాయి. ఎన్ కౌంటర్ కాకముందే ఇది ఎలా సాధ్యం. ఎన్ కౌంటర్ అనే వార్తలు ఎవరు లీక్ చేశారు. కారణాలేంటి. ఎన్ కౌంటర్ చేద్దామని ఫిక్స్ అవ్వడం వల్లనే ఇలా ముందుగా లీకులు ఇచ్చారనే అనే వాదనలు వినిచించాయి. </p>
<p>రియాజ్‌ను ఆసుపత్రిలో చేర్చిన క్షణం నుంచి ఏం జరుగుతుందోననే ఉత్కంఠత సర్వత్రా నెలకొంది. కోర్టుకు తీసుకెళతారా, ఆసుపత్రిలోనే లేపేస్తారా అనే ఊహాగానాలు వినిపించాయి. అంతా అనుకున్నట్లు అరెస్ట్ జరిగిన కొద్ది గంటల్లోనే రియాజ్ ఎన్ కౌంటర్ అనే అధికారిక ప్రకటన రానే వచ్చింది. ఆసుపత్రిలో రియాజ్ గలాటా చేస్తున్నాడు, తలుపులు బద్దలు కొడుతున్నాడు. అడ్డుకునేందుకు ఆర్ ఐ, ఎసై ,కానిస్టేబుల్ లోపలికి వెళ్లారు. కానిస్టేబుల్ వద్ద గన్ లాక్కున్న రియాజ్ ట్రిగర్ నొక్కి కాల్పులు జరిపే ప్రయత్నం చేయబోయాడు. ఇంతలో ఆత్మరక్షణలో భాగంగా అక్కడే ఉన్న ఆర్ ఐ రియాజ్ పై కాల్పులు జరపడంతో ప్రాణాలు కోల్పోయాడంటూ ఉన్నతాధికారులు ప్రకటించారు. ఇలా రియాజ్ కథ ముగిసింది. </p>
<p>కానిస్టేబుల్ ప్రమోద్ ను రియాజ్ చంపడం దారుణం. రియాజ్ ను ఎన్ కౌంటర్ చేయడంతో న్యాయం జరిగిందని, సరైన శిక్ష వేశారని,పోలీసులపై ప్రశంసల వర్షం కురిపించడం సోషల్ మీడియా వేదికగా చకచకా జరిగిపోయాయి. ఇక్కడి వరకూ అంతా బాగానే ఉంది. అయితే ఈ ఘటన అనేక ప్రశ్నలను సంధిస్తోంది. దీనిపైనే జాతీయ మానవహక్కుల కమిషన్‌ స్పందించింది. అనేక అనుమానాలు వ్యక్తం చేస్తూ పోలీసులకు నోటీసులు ఇచ్చింది. వాటిని నివృత్తి చేయాలని పేర్కొంది. మరో వర్గం కూడా రియాజ్ ది ఫేక్ ఎన్ కౌంటర్ విమర్శిస్తున్నారు. </p>
<p>రియాజ్ సీరియల్ గజదొంగని పోలీసులకు తెలిసినా, అతని అరెస్ట్ విషయంలో కానిస్టేబుల్ ఒక్కడు మాత్రమే వెళ్లడం ఎంత వరకు కరెక్టని ప్రశ్నించే వాళ్లు ఉన్నారు. అరెస్ట్ సమయంలో అనుసరించాల్సిన ప్రొటో కాల్ ను ఉల్లంఘించారని మాజీ పోలీసు అధికారులు చెబుతున్న మాట. ఒక్క కానిస్టేబుల్ రియాజ్ అరెస్ట్ కు వెళ్లడం, అందులోనూ పోలీసు వాహనంలో కాకుండా తన సొంత బైక్ పై కరుడుగట్టిన నేరస్తుడ్ని తీసుకురావడం ఇలా ఇవన్నీ పోలీసుల వైఫల్యం కాదా అనే ప్రశ్నలు తలెత్తుతున్నాయి. పోలీసుల వాహనంలో వెపన్ తో ఎసై, ఇద్దరు కానిస్టేబుల్స్ కలసి అరెస్ట్ సమయంలో పాటించాల్సిన ప్రొటోకాల్ ను పాటిస్తే ప్రమోద్ ప్రాణాలు కోల్పోయేవాడు కాదనే వాదనలు వినిపిస్తున్నాయి.</p>
<p>ఇదిలా ఉంటే రియాజ్ అరెస్ట్, ఆ తరువాత పరిణామాల్లో సైతం పోలీసుల తీరుపై అనే ప్రశ్నలు తలెత్తుతున్నాయి. రియాజ్ ఉన్నాడనే సమాచారంతో సారంగాపూర్ వెళ్లిన పోలీసులు అక్కడ కూడా రియాజ్ ఎదురుదాడికి పాల్పడే పరిస్దితిని ఊహించకపోవడం విడ్డూరంగా ఉందని అంటున్నారు. తాళ్లతో రియాజ్ ను కట్టేసి ,దాడి చేసి మరీ ఆసుపత్రికి తీసుకెళ్లారనే వార్తలు వచ్చాయి. దొరికిన స్పాట్ లోనే ఎన్ కౌంటర్ చేశారనే ప్రచారం జరిగింది. </p>
<p>అరెస్ట్ తరువాత బేడీలు వేసిన రియాజ్ ను ఆసుపత్రిలో చేర్చినట్టు పోలీసులు ప్రకటించారు. ఉదయం అక్కడ తలుపులు బద్దలు కొడుతున్నాడు, ఆసుపత్రిలో గలాటా చేస్తున్నాడనే సమాచారంతో లోపలికి వెళ్లినట్టు చెబుతున్నారు. ఇంత కరుడుగట్టిన నేరస్తుడికి బేడీలు వేసి చికిత్స అందించలేదా అని మరికొందరు సంధిస్తున్న ప్రశ్న. ఒకవేళ కాళ్లకు చేతులకు బేడీలు ఉంటే తలుపులు ఎలా బద్దలు కొడతాడు? ఒకవేళ బేడీలు తొలిగిస్తున్నప్పడు , అవసరమైన జాగ్రత్తలు ఎందుకు తీసుకోలేదు? అనే అనుమాన పడుతున్నారు. </p>
<p>ఇదిలా ఉంటే కానిస్టేబుల్ వద్ద గన్ లాక్కున్నాడని చెబుతున్నారు. ఆసుపత్రిలో ఈ మొత్తం వ్యవహారం చూసిన సాక్షులు ఎవరు? అలా ఉంటే ఇప్పటి వరకూ ఎవరూ బయటకు రాలేదు. కనీసం గన్‌షాట్‌ సౌండ్‌ ఎవరూ వినలేదా, వింటి మీడియా ముందుకు ఎవరూ ఎందుకు రాలేదు. ఇవన్నీ కూడా రేపు జాతీయ మానవహక్కుల సంఘం నుంచి ఎదుర్కోవాల్సిన ప్రశ్నలు. అన్నింటికీ పోలీసులు సమాధానం చెప్పాల్సి ఉంటుంది. అప్పుడే ఇది నిజమైన ఎన్‌కౌంటర్ అని రుజువు అవుతుంది. లేకుంటే పోలీసుల ఖాతాలో మరో బ్లాక్ మార్క్ పడే ప్రమాదం ఉందని మాజీ పోలీసు అధికారులు అభిప్రాయపడుతున్నారు. <img src="https://feeds.abplive.com/onecms/images/uploaded-images/2025/10/21/1b687686208e07d756959605b6e7f3261761038995416479_original.jpeg" /></p>
1 month ago
2 
