<p>అమరావతి: ఏపీలో స్థానిక సంస్థల ఎన్నికలలో కూటమి పార్టీల మధ్య సీట్ల సర్దుబాటుపై నేడు కీలక సమావేశం జరగనుంది. <a title="టీడీపీ" href="https://telugu.abplive.com/topic/tdp" data-type="interlinkingkeywords">టీడీపీ</a>, జనసేన, <a title="బీజేపీ" href="https://telugu.abplive.com/topic/BJP" data-type="interlinkingkeywords">బీజేపీ</a> అధినేతలు చంద్రబాబు నాయుడు, పవన్ కళ్యాణ్, పీవీఎన్ మాధవ్ సోమవారం సాయంత్రం సమావేశమై రాష్ట్రంలోని 17 నగరపాలక సంస్థల మేయర్ స్థానాలతో పాటు మున్సిపాలిటీలు, జిల్లా పరిషత్‌లలో ఏ పార్టీ ఎన్ని చోట్ల పోటీ చేయాలనే అంశంపై చర్చించనున్నారు. దాంతో కూటమి పార్టీ నేతల్లో ఉత్కంఠ నెలకొంది. </p>
<p>నగర పాలక సంస్థల ఎన్నికల్లో భాగంగా జనసేన పార్టీ 4 మేయర్ స్థానాలను కోరుతున్నట్లు తెలుస్తోంది. విజయవాడ, మచిలీపట్నం, కాకినాడ స్థానాలను కేటాయించాలని <a title="జనసేన" href="https://telugu.abplive.com/topic/Janasena" data-type="interlinkingkeywords">జనసేన</a> కోరుతున్నట్లు ప్రచారం జరుగుతోంది. మరోవైపు తిరుపతి మేయర్ స్థానాన్ని కేటాయించే అంశంపైనా చర్చలు జరుగుతున్నాయి. స్థానిక రాజకీయ సమీకరణాలు, ఆయా ప్రాంతాల్లో కూటమి భాగస్వామ్య పక్షాలకు ఉన్న పట్టును ప్రాతిపదికగా తీసుకుని స్థానాల సర్దుబాటుపై కసరత్తు చేస్తున్నారు. కార్పొరేషన్లు, మున్సిపాలిటీలతో పాటు జిల్లా పరిషత్ ఛైర్మన్‌లు, జడ్పీటీసీలు, ఎంపీటీసీల సర్దుబాటు నేడు ఓ కొలిక్కి రానుంది. 2024 సార్వత్రిక ఎన్నికల్లో భారీ విజయం సాధించిన కూటమి, త్వరలో జరగనున్న స్థానిక సంస్థల ఎన్నికల్లోనూ మెరుగైన ఫలితాలు సాధించాలని భావిస్తోంది.</p>
<p><br />అధికారంలోకి వచ్చి రెండేళ్లు గడిచిన తరువాత సైతం ప్రజల్లో తమకు అదే స్థాయిలో ఆదరణ ఉందని, అభివృద్ధితో పాటు సంక్షేమ పథకాలకు ప్రాధాన్యత ఇవ్వడమే అందుకు కారణమని కూటమి నేతలు చెబుతున్నారు. మూడు పార్టీల నేతలు సమన్వయంతో వ్యవహరించాలని, గెలుపే ప్రాతిపదికగా సీట్ల సర్దుబాటు ఉంటుందని నేతలు, కార్యకర్తలకు సూచిస్తున్నారు. స్థానిక రాజకీయ సమీకరణాలు, ఆయా పార్టీలకు ఆయా ప్రాంతాల్లో ఉన్న పట్టు తదితర అంశాల ఆధారంగా ఏ పార్టీకి ఎన్ని సీట్లు, ఎక్కడెక్కడ సర్దుబాటు చేయాలని చంద్రబాబు, పవన్ కళ్యాణ్, పీవీఎన్ మాధవ్ కసరత్తు చేస్తున్నారు. సోమవారం సాయంత్రం వీరి భేటీ అనంతరం పొత్తులపై స్పష్టత వస్తుంది. </p>
<p>ఇదివరకే మూడు పార్టీల ముఖ్య నాయకులతో ఏర్పడిన రాష్ట్రస్థాయి సమన్వయ కమిటీ, లోక్‌సభ నియోజకవర్గ స్థాయి సమన్వయ కమిటీలు ఇప్పటికే క్షేత్రస్థాయి పరిస్థితులను పరిశీలించాయి. ఏ పార్టీకి ఎక్కడ విజయావకాశాలు ఉన్నాయో ప్రాథమిక జాబితాలు రూపొందించారు. ఇటీవల ఉండవల్లిలో సీఎం క్యాంప్ ఆఫీసులో <a title="చంద్రబాబు" href="https://telugu.abplive.com/topic/Chandrababu" data-type="interlinkingkeywords">చంద్రబాబు</a>తో డిప్యూటీ సీఎం <a title="పవన్ కల్యాణ్" href="https://telugu.abplive.com/topic/Pawan-Kalyan" data-type="interlinkingkeywords">పవన్ కల్యాణ్</a> సమావేశమై సీట్ల సర్దుబాటుపై చర్చలు జరిపారు. ఆ చర్చల్లో ప్రాథమికంగా ఒక అవగాహనకు వచ్చారని, నేటి సాయంత్రం జరిగే భేటీలో దీనిపై మరింత స్పష్టత వస్తుందని భావిస్తున్నారు.</p>
<p> </p>
<p> </p>
2 weeks ago
2 
