<p><strong>President Droupadi Murmu AP Visit: </strong> విజయవాడలో విజయవాడ కనకదుర్గమ్మ సన్నిధిలో, దేవీ శరన్నవరాత్రుల శుభవేళ స్వయం సహాయక సంఘాల జాతీయ సరస్ మేళా–2026 అత్యంత వైభవంగా ప్రారంభమైంది. దేశ రాజధాని న్యూఢిల్లీ వెలుపల తొలిసారిగా కేంద్ర గ్రామీణాభివృద్ధి శాఖ ఈ ప్రతిష్టాత్మక మేళాను ఆంధ్రప్రదేశ్ వేదికగా నిర్వహించడం చారిత్రాత్మక పరిణామంగా నిలిచింది. ఈ ప్రారంభోత్సవ కార్యక్రమానికి దేశ ప్రథమ పౌరురాలు, రాష్ట్రపతి ద్రౌపదీ ముర్ము ముఖ్య అతిథిగా హాజరై ప్రసంగించగా, ఆంధ్రప్రదేశ్ గవర్నర్ జస్టిస్ అబ్దుల్ నజీర్, ముఖ్యమంత్రి నారా చంద్రబాబు నాయుడు, కేంద్ర గ్రామీణాభివృద్ధి శాఖ మంత్రి శివరాజ్ సింగ్ చౌహన్ పాల్గొని నారీ శక్తికి దిశానిర్దేశం చేశారు.</p>
<p>కార్యక్రమంలో మాట్లాడిన రాష్ట్రపతి ద్రౌపదీ ముర్ము, గ్రామీణ మహిళల ఆర్థిక సాధికారతకు ప్రధాని <a title="నరేంద్ర మోదీ" href="https://telugu.abplive.com/topic/narendra-modi" data-type="interlinkingkeywords">నరేంద్ర మోదీ</a> ప్రత్యేక చర్యలు చేపట్టారని కొనియాడారు. మహిళలను ఇకపై కేవలం లఖ్‌పతి దీదీలుగానే కాకుండా కరోడ్‌పతి దీదీలు గా తీర్చిదిద్దే దిశగా ప్రభుత్వాలు అడుగులు వేయాలి. స్వయం సహాయక సంఘాల ద్వారా దేశవ్యాప్తంగా మహిళల్లో అద్భుతమైన ఆర్థిక, సామాజిక చైతన్యం వచ్చింది. వారి ఉత్పత్తులకు సరైన బ్రాండింగ్, ప్యాకింగ్, , డిజిటల్ మార్కెటింగ్ నెట్‌వర్కింగ్ కల్పించడం ద్వారా మధ్యవర్తుల వ్యవస్థను పూర్తిగా తొలగించాలి. వికసిత్ భారత్ సాధనలో మహిళల భాగస్వామ్యం అత్యంత కీలకం అని రాష్ట్రపతి స్పష్టం చేశారు. </p>
<p>ముఖ్యమంత్రి నారా చంద్రబాబు నాయుడు ... ఢిల్లీ వెలుపల తొలిసారిగా నిర్వహిస్తున్న ఈ సరస్ మేళాకు విజయవాడ వేదిక కావడం ఏపీకే గర్వకారణమని హర్షం వ్యక్తం చేశారు. ఉమ్మడి రాష్ట్రంలో తాము ప్రారంభించిన డ్వాక్రా పొదుపు ఉద్యమం నేడు దేశానికే ఆదర్శంగా నిలిచిందని గుర్తుచేశారు. ఆంధ్రప్రదేశ్‌లో 11 లక్షల స్వయం సహాయక సంఘాలు ఏకంగా రూ.69,000 కోట్ల టర్నోవర్‌ సాధించి దేశంలోనే అగ్రస్థానంలో నిలిచాయి. ఇప్పటికే ఏడాది కాలంలో లక్ష మంది మహిళలను పారిశ్రామికవేత్తలుగా తీర్చిదిద్దాం. రాబోయే రోజుల్లో 10 లక్షల మంది మహిళలను ఎంట్రప్రెన్యూర్లుగా మార్చడమే మా లక్ష్యం. పొదుపు సంఘాలు నేడు వ్యాపార సంస్థలుగా ఎదిగాయి, త్వరలోనే ఇవి అంతర్జాతీయ బ్రాండ్లుగా అవతరిస్తాయి అని ధీమా వ్యక్తం చేశారు. </p>
<blockquote class="twitter-tweet">
<p dir="ltr" lang="te">జాతీయ సరస్ మేళా-2026లో పాల్గొన్న రాష్ట్రపతి శ్రీమతి ద్రౌపది ముర్ము గారు, ముఖ్యమంత్రి శ్రీ నారా చంద్రబాబు నాయుడు గారు @అమరావతి https://t.co/NSlMyz8PxT</p>
— Telugu Desam Party (@JaiTDP) <a href="https://x.com/JaiTDP/status/2110608411289375066?ref_src=twsrc%5Etfw">October 15, 2026</a></blockquote>
<p>అంతేకాకుండా, ఏపీలోని మహిళా సంఘాల ఉత్పత్తుల గ్లోబల్ మార్కెటింగ్ కోసం ప్రత్యేకంగా రూపొందించిన స్వయం ఏపీ బ్రాండ్‌ను ముఖ్యమంత్రి చంద్రబాబు ప్రకటించారు. ఇకపై ప్రముఖ ఈ-కామర్స్, ఆన్‌లైన్ షాపింగ్ వేదికల్లో స్వయం ఏపీ పేరుతోనే మహిళల ఉత్పత్తులు విక్రయానికి అందుబాటులోకి వస్తాయని తెలిపారు. రాష్ట్రంలో సంక్షేమంతో పాటు మహిళల ఆర్థిక భరోసా కోసం తల్లికి వందనం, స్త్రీశక్తి ఉచిత బస్సు ప్రయాణ పథకాలను అమలు చేస్తున్నామని, సేవింగ్ మనీ స్థాయి నుంచి మేకింగ్ మనీ స్థాయికి మన మహిళలు ఎదిగారని సీఎం కొనియాడారు. స్వర్ణాంధ్ర 2047 లక్ష్య సాధనలో ప్రతి ఎస్ హెచ్ జీ ఒక ఆర్థిక శక్తిగా మారనుందని ఉద్ఘాటించారు.</p>
<p>కేంద్ర గ్రామీణాభివృద్ధి శాఖ మంత్రి శివరాజ్ సింగ్ చౌహన్ ప్రధాని మోదీ కన్న 6 కోట్ల లఖ్‌పతి దీదీల కల సాకారంలో ఆంధ్రప్రదేశ్ ప్రభుత్వం చూపుతున్న చొరవ అభినందనీయమన్నారు. సీఎం <a title="చంద్రబాబు" href="https://telugu.abplive.com/topic/Chandrababu" data-type="interlinkingkeywords">చంద్రబాబు</a> సాంకేతికతను జోడించి డ్వాక్రా మహిళలను సరికొత్త పారిశ్రామికవేత్తలుగా తీర్చిదిద్దుతున్నారని ప్రశంసించారు. మహిళలు తయారు చేసిన ఉత్పత్తుల విక్రయాల కోసం పెద్ద ఎత్తున షీ మార్టులు ఏర్పాటు చేస్తామని, మహిళా ఉత్పత్తుల మార్కెటింగ్‌లో ఆంధ్రప్రదేశ్ అమలు చేస్తున్న వినూత్న మోడల్‌ను దేశవ్యాప్తంగా ఇతర రాష్ట్రాల్లోనూ విస్తరిస్తామని మంత్రి శివరాజ్ సింగ్ చౌహన్ స్పష్టం చేశారు.</p>
<p>ఈ జాతీయ సరస్ మేళా–2026 ద్వారా దేశంలోని విభిన్న రాష్ట్రాలకు చెందిన రూరల్ ఎంట్రప్రెన్యూర్లు, చేతివృత్తుల కళాకారులు తమ ఉత్పత్తులను ప్రదర్శించే గొప్ప అవకాశం లభించింది. విజయవాడ వేదికగా ప్రారంభమైన ఈ మేళా గ్రామీణ మహిళా రైతులు, వ్యాపారవేత్తల ఆదాయ మార్గాలను పెంచడమే కాకుండా, వికసిత్ భారత్ స్వప్నానికి సరికొత్త ఊపిరి పోస్తుందని హాజరైన ప్రముఖులంతా ఆకాంక్షించారు.</p>
2 weeks ago
2 
