<p><strong>Moringa Leaves Roti Pachadi With Peanuts :</strong> మునగాకుతో ఎన్నో రకాల వంటకాలు చేసుకోవచ్చు. పప్పు, కూరలతో పాటు మునగాకుతో చేసే పచ్చడి కూడా చాలా రుచిగా ఉంటుంది. ముఖ్యంగా పల్లీలు, ఎండు మిరపకాయలు వేసి ఆంధ్రా స్టైల్‌లో రోటి పచ్చడిలా చేసి.. అన్నంలో కలుపుకుని తింటే రుచి అదిరిపోతుంది. ఇంట్లో సులభంగా చేసుకోగలిగే ఈ మునగాకు రోటి పచ్చడి తయారీ విధానం, కావాల్సిన పదార్థాలు ఏంటో ఇప్పుడు చూసేద్దాం.</p>
<h3>కావాల్సిన పదార్థాలు</h3>
<p>మునగాకు - 2 కప్పులు</p>
<p>పల్లీలు - అర కప్పు</p>
<p>ఎండు మిరపకాయలు - 6 నుంచి 8</p>
<p>వెల్లుల్లి రెబ్బలు - 5</p>
<p>చింతపండు - చిన్న నిమ్మకాయంత</p>
<p>జీలకర్ర - అర టీస్పూన్</p>
<p><strong>Also Read : <a href="https://telugu.abplive.com/lifestyle/andhra-style-brinjal-potato-curry-recipe-vankaya-bangaladumpa-kura-259701" target="_blank" rel="noopener">వంకాయ, బంగాళదుంప కూర.. అన్నం, చపాతీల్లోకి తినేందుకు బెస్ట్ రెసిపీ ఇదే</a></strong></p>
<p>ఉప్పు - తగినంత</p>
<p>నూనె - 2 టేబుల్ స్పూన్లు</p>
<h3>తాలింపు కోసం</h3>
<p>నూనె - 1 టీస్పూన్</p>
<p>ఆవాలు - అర టీస్పూన్</p>
<p>మినప్పప్పు - అర టీస్పూన్</p>
<p>ఎండుమిర్చి - 1</p>
<p>కరివేపాకు - 1 రెబ్బ</p>
<p><strong>Also Read : <a href="https://telugu.abplive.com/lifestyle/viral-hyderabad-chicken-65-make-this-crispy-and-juicy-spicy-chicken-65-at-home-259605" target="_blank" rel="noopener">బయట క్రిస్పీగా.. లోపల జ్యూసీగా ఉండే హైదరాబాద్ చికెన్ 65.. రెసిపీ ఇదే</a></strong></p>
<h3>మునగాకు రోటి పచ్చడి తయారీ విధానం</h3>
<p>ముందుగా మునగాకును కాడల నుంచి వేరు చేసి శుభ్రంగా కడిగి నీరు లేకుండా ఆరబెట్టుకోవాలి. ఆకుల్లో నీరు ఎక్కువగా ఉంటే పచ్చడి త్వరగా పాడయ్యే అవకాశం ఉంటుంది. కాబట్టి నీరు లేకుండా చూసుకోవాలి. ఇప్పుడు స్టౌవ్ వెలిగించి కడాయి పెట్టాలి. దానిలో కొద్దిగా నూనె వేసి పల్లీలు వేయించుకోవాలి. అవి మంచి వాసన వచ్చే వరకు వేయించి పక్కన పెట్టుకోవాలి. చల్లారిన తర్వాత పొట్టు తీసుకుంటే పచ్చడి మరింత మెత్తగా అవుతుంది.</p>
<p>అదే కడాయిలో ఎండు మిరపకాయలు, జీలకర్ర వేసి కొద్దిసేపు వేయించాలి. తర్వాత వెల్లుల్లి రెబ్బలు వేసి ఒక నిమిషం పాటు వేయించి పక్కకు తీసుకోవాలి. ఇప్పుడు అదే కడాయిలో మిగిలిన నూనెలో మునగాకును వేసి మీడియం మంటపై వేయించాలి. ఆకుల్లోని తేమ పూర్తిగా పోయి, మునగాకు మెత్తగా అయ్యే వరకు వేయించాలి. మంట ఆపి చల్లారనివ్వాలి.</p>
<p><strong>Also Read : <a href="https://telugu.abplive.com/lifestyle/gongura-sesame-pickle-try-this-andhra-style-traditional-recipe-259498" target="_blank" rel="noopener">గోంగూర నిల్వ పచ్చడి నువ్వులతో (Gongura Sesame Pickle).. ఆంధ్రా స్టైల్ రెసిపీ</a></strong></p>
<p>ముందుగా వేయించిన ఎండు మిరపకాయలు, జీలకర్ర, వెల్లుల్లి, ఉప్పు, చింతపండు వేసి రోటిలో కాస్త మెత్తగా దంచుకోవాలి. తర్వాత వేయించిన పళ్లీలు వేసి మరీ మెత్తగా కాకుండా కొంచెం పొడిపొడిగా దంచాలి. చివరగా వేయించిన మునగాకును వేసి రోటిలోనే దంచుకుంటూ కలపాలి. పచ్చడి పూర్తిగా మెత్తగా కాకుండా చిన్న చిన్న ముక్కలుగా ఉండేలా దంచితే రోటి పచ్చడి రుచి బాగుంటుంది.</p>
<p>పచ్చడి సిద్ధమైన తర్వాత.. చిన్న కడాయిలో నూనె వేడి చేసి ఆవాలు, మినప్పప్పు వేయించాలి. తర్వాత ఎండుమిర్చి, కరివేపాకు వేసి వేగిన వెంటనే ఈ తాలింపును పచ్చడిపై పోయాలి. అంతే నోరూరించే మునగాకు రోటి పచ్చడి రెడీ. ఈ పచ్చడిని వేడి వేడి అన్నంలో కొద్దిగా నెయ్యి వేసుకుని కలుపుకుని తింటే చాలా రుచిగా ఉంటుంది. రాగి సంగటి, జొన్న రొట్టె, దోశ, ఇడ్లీతో కూడా తినొచ్చు. </p>
<h3>ఎక్కువ రోజులు నిల్వ ఉండాలంటే..</h3>
<p>పచ్చడి ఎక్కువ రోజులు నిల్వ ఉంచాలనుకుంటే నీరు కలపకుండా తయారు చేయడం మంచిది. అలాగే మునగాకును తేమ లేకుండా బాగా వేయించి, శుభ్రమైన పొడి గాజు సీసాలో నిల్వ చేసుకోవాలి. ఇలా పదిరోజుల వరకు పచ్చడి తాజాగా ఉంటుంది. </p>
<p><strong>Also Read : <a href="https://telugu.abplive.com/lifestyle/peanut-okra-fry-recipe-make-tasty-and-crispy-bhindi-at-home-258921" target="_blank" rel="noopener">పల్లీలతో బెండకాయ ఫ్రై.. జిగురు తగ్గి టేస్టీగా ఉండాలంటే ఇలా చేసుకోండి, రెసిపీ ఇదే</a></strong></p>
<p><iframe class="vidfyVideo" style="border: 0px;" src="https://telugu.abplive.com/web-stories/lifestyle/moringa-leaves-chutney-recipe-healthy-and-delicious-252096" width="631" height="381" scrolling="no"></iframe></p>
1 month ago
2 
