<ul style="list-style-type: square;">
<li>యూట్యూబ్‌ చరిత్రలో 50 కోట్ల సబ్‌స్క్రైబ్లను సాధించిన మొదటి వ్యక్తిగత క్రియేటర్‌గా జిమ్మీ డొనాల్డ్‌సన్ ప్రపంచ రికార్డు</li>
<li>కేవలం వీడియోలే కాకుండా ఫీస్టబుల్స్, బీస్ట్ బర్గర్ వంటి వ్యాపారాల ద్వారా ఏడాదికి 600-700 మిలియన్ డాలర్ల ఆదాయం ఆర్జిస్తున్నాడు. </li>
<li>టీమ్ ట్రీస్, టీమ్‌ సీస్, టీమ్ వాటర్ వంటి భారీ కార్యక్రమాల ద్వారా పర్యావరణ, సామాజిక సేవ కోసం వందల కోట్లు వెచ్చిస్తున్నాడు. </li>
</ul>
<p>జూన్ 12న డిజిటల్ ప్రపంచం ఒక అద్భుతమైన క్షణానికి సాక్ష్యంగా నిలిచింది. జిమ్మీ డొనాల్డ్ సన్ ప్రపంచవ్యాప్తంగా మిస్టర్ బీస్ట్‌గా పిలుచుకునే యువకుడు, యూట్యూబ్‌లో 500 మిలియన్ల సబ్‌స్క్రైబర్‌ల మార్కును దాటారు. ఈ ఘనత సాధించిన మొదటి వ్యక్తిగత క్రియేటర్‌గా రికార్డు సృష్టించారు. లైవ్ స్ట్రీమ్ ద్వారా ఈ చారిత్రాత్మక లక్షలాది మంది వీక్షించారు. యూట్యూబ్‌ ప్రారంభమైనప్పటి నుంచి ఏ ఇతర వ్యక్తిగత ఛానెల్‌ కూడా ఈ స్థాయికి చేరుకోలేదు. ఇది కేవలం ఒక అంకం మాత్రమేకాదు ఒక కొత్త డిజిటల్ యుగానికి ఆరంభం. </p>
<h2>13 ఏళ్ల వయసులో ప్రారంభం...</h2>
<p>2012లో కేవలం 13 ఏళ్ల వయసులో జిమ్మీ తన యూట్యూబ్ ప్రయాణాన్ని ప్రారంభించారు. మొదట్లో MrBeast6000 పేరుతో చిన్న చిన్న వీడియోలు చేసేవారు. అయితే 2017లో ఆయన చేసిన నే లక్ష వరకు లెక్కపెట్టాను అనే వీడియో ఆయన జీవితాన్ని మార్చేసింది. దాదాపు 40 గంటల పాటు సాగిన ఆ వీడియో వైరల్‌గా మారింది. యూట్యూబ్ అల్గారిథమ్‌ ఎలా పని చేస్తుందో అర్థం చేసుకోవడానికి జిమ్మీ రోజుకు పది గంటలకుపైగా శ్రమించే వారు. వైరాలిటీ వెనుక ఉన్న సీక్రెట్స్ శోధించడమే ఆయన విజయానికి కారణం. </p>
<h2>బీస్ట్ ఇండస్ట్రీస్ </h2>
<p>మిస్టర్ బీస్ట్‌ కేవలం ఒక యూట్యూబర్ మాత్రమే కాదు. ఒక విజయవంతమైన వ్యాపారవేత్త. ఆయన స్థాపించిన బీస్ట్ ఇండస్ట్రీస్‌ విలువ ప్రస్తుతం 5బిలియిన్ డాలర్లుగా అంచనా. ఆయన చాక్లెట్ బ్రాండ్ ఫీస్టబుల్ ఏటా 200 మిలియన్ డాలర్లకు పైగా ఆదాయాన్ని తెచ్చిపెడుతోంది. ఇది వాల్ మార్ట్ వంటి భారీ స్టోర్లలో అందుబాటులో ఉంది. దీంతోపాటు మిస్టర్ బీస్ట్ బర్గర్, కొత్తగా లాంచ్ చేసిన లంచ్లీ ఫుడ్ సెక్టార్‌లో సంచలనంగా మారింది. </p>
<h2>ఆదాయం ఎలా ఖర్చు చేస్తున్నట్టు?</h2>
<p>చాలా మందికి వచ్చే సందేహం, జిమ్మీకి అంత డబ్బు ఎక్కడి నుంచి వస్తుంది అని ప్రకటనలు, బ్రాండ్స్ స్పాన్సర్‌షిప్‌ల ద్వారా ఆయన భారీగా సంపాదిస్తారు. కానీ ఆయన ప్రత్యేకత ఏంటంటే, వచ్చిన ఆదాయంలో 80-90శాతం తిరిగి వీడియోల తయారీకే ఖర్చు చేస్తారు. ఒక్కో వీడియోకు మిలియన్ల కొద్దీ డాలర్లు వెచ్చిస్తారు. పెద్ద పెద్ద సెట్లు నిర్మించడం, భారీ బహుమతులు ఇవ్వడం ద్వారా ఆయన తన కంటెంట్ నాణ్యత పెంచుకుంటూ పోతున్నారు. ఇదే ఆయనను ఇతరులకు భిన్నంగా నిలబెడుతోంది. </p>
<h2>సేవలోనూ బీస్ట్ మార్క్ </h2>
<p>జిమ్మీ హృదయం కూడా ఆయన వీడియోలంతే పెద్దది. బీస్ట్ ఫిలాంత్రోఫి ద్వారా ఆయన వేలాది మందికి సహాయం చేస్తున్నారు. వెయ్యి మంది అంధులకు చూపు తెప్పించారు. ఆఫ్రికాలో 100 బావులు తవ్వించారు. పర్యావరణ కోసం టీమ్‌ ట్రీస్, టీమ్‌ సీస్‌ , టీమ్ వాటర్ ప్రచారాల ద్వారా వందల కోట్లు నిధులు సేకరించి మార్పు తెచ్చే ప్రయత్నం చేస్తున్నారు. </p>
<h2>వివాదాల్లోనూ బీస్ట్ </h2>
<p>జిమ్మీ వద్ద పని వాతావరణం సరిగా లేదని కొందరు మాజీ ఉద్యోగులు ఆరోపించారు. అమెజాన్ ప్రైమ్ కోసం రూపొందించిన బీస్ట్ గేమ్సక్ విషయంలోనూ కొన్ని న్యాయపరమైన సమస్యలు ఎదురయ్యాయి.మెక్సికోలోని మాయన్ శిథిలాల వద్ద అనుమతి లేకుండా షూటింగ్ చేశారనే విమర్శలు ఉన్నాయి. </p>
<h2>భవిష్యత్‌ లక్ష్యం ఏంటీ?</h2>
<p>జిమ్మీ లక్ష్యం కేవలం 50 కోట్లే కాదు, భవిష్యత్‌లో వంద కోట్ల సబ్‌స్క్రైబర్లను చేరుకోవాలనే ఆయన కల. సాధారణ మధ్యతరగతి కుటుంబం నుంచి నేడు బిలియనీర్‌గా ఎదిగిన జమ్మీ ప్రయాణం కోట్లాది మంది క్రియేటర్లకు స్ఫూర్తిదాయకం. </p>
2 hours ago
1 