<p><strong>Why Modi Cabinet Reshuffle Delayed : </strong> కేంద్ర మంత్రివర్గ విస్తరణ, మార్పు చేర్పులపై గత కొన్ని వారాలుగా దేశ రాజధాని ఢిల్లీలో జోరుగా ప్రచారం సాగింది. కొందరు మంత్రుల రాజీనామాలు, మరికొందరి నయా ఎంట్రీలపై పొలిటికల్ సర్కిల్స్‌లో లీకులు కూడా వచ్చాయి. అయితే, అనూహ్యంగా కేంద్ర పార్లమెంటరీ వ్యవహారాల మంత్రి కిరణ్ రిజిజు జూలై 20 నుండి ఆగస్టు 13, 2026 వరకు పార్లమెంట్ వర్షాకాల సమావేశాలు జరగనున్నట్లు తేదీలను అధికారికంగా ప్రకటించారు. 19 సిట్టింగులతో సాగనున్న ఈ సమావేశాల షెడ్యూల్ వచ్చినా.. క్యాబినెట్ మార్పులపై మాత్రం ప్రధాని <a title="నరేంద్ర మోదీ" href="https://telugu.abplive.com/topic/narendra-modi" data-type="interlinkingkeywords">నరేంద్ర మోదీ</a> యంత్రాంగం వ్యూహాత్మక మౌనం వహించింది. దీంతో, మోదీ మంత్రివర్గ విస్తరణ నిర్ణయం నుండి వెనక్కి తగ్గారా? లేక దీని వెనుక ఏదైనా బలమైన రాజకీయ వ్యూహం ఉందా? అనే చర్చలు మొదలయ్యాయి.</p>
<p><a title="కేబినెట్ మార్పు చేర్పులు వాయిదా" href="https://telugu.abplive.com/politics/modi-cabinet-reshuffle-2026-monsoon-session-constitutional-amendments-delimitation-252338" target="_self">కేబినెట్ మార్పు చేర్పులు వాయిదా</a></p>
<p> ప్రధాని మోదీ మంత్రివర్గ విస్తరణను పక్కనబెట్టలేదు, కేవలం వాయిదా వేశారు. ప్రస్తుతం ఎన్డీయే ప్రభుత్వం ముందు మంత్రి పదవుల పంపకం కంటే.. దేశ భవిష్యత్తును మార్చే అత్యంత కీలకమైన, చారిత్రాత్మక రాజ్యాంగ సవరణ బిల్లులను పార్లమెంట్‌లో ఆమోదింపజేసుకోవడం అత్యంత అవసరంగా మారింది. ఈ వర్షాకాల సమావేశాల్లో ప్రభుత్వం భారీ శాసన అధికార అజెండాతో ముందుకు వెళ్తోంది. ఇలాంటి సందిగ్ధ సమయంలో మంత్రివర్గ మార్పులు చేపడితే.. పదవులు దక్కని అసంతృప్త నేతల వల్ల పార్లమెంట్‌లో బిల్లుల ఓటింగ్ సమయంలో ఇబ్బందులు వచ్చే ప్రమాదం ఉంది. అందుకే, ముసాయిదా బిల్లుల ప్రక్రియ ముగిసేవరకు ఈ గందరగోళం వద్దని మోదీ భావిస్తున్నారు.<br /> <br /><strong> సభలో మూడింట రెండు వంతుల మెజారిటీ టార్గెట్ </strong></p>
<p> రాజ్యాంగ సవరణ బిల్లులు పాస్ కావాలంటే ఉభయ సభల్లో 2/3 వంతు సభ్యుల మద్దతు అవసరం. అందుకే ఎన్డీయే కూటమిలోని మిత్రపక్షాలన్నింటినీ ఏకతాటిపై ఉంచేందుకే క్యాబినెట్ మార్పులను ప్రస్తుతానికి హోల్డ్‌లో పెట్టారు. ఈ వర్షాకాల సమావేశాల్లో మోదీ ప్రభుత్వం ప్రవేశపెట్టబోయే బిల్లుల్లో అత్యంత ప్రాధాన్యత కలిగింది 131వ రాజ్యాంగ సవరణ బిల్లు . దీని ప్రకారం లోక్‌సభ స్థానాల సంఖ్యను ప్రస్తుతం ఉన్న 543 నుండి ఏకంగా 816 కి పెంచనున్నారు. నియోజకవర్గాల పునర్విభజనతో పాటు చారిత్రాత్మక మహిళా రిజర్వేషన్ యాక్ట్‌ను క్షేత్రస్థాయిలో అమలు చేయడానికి ఈ బిల్లు అత్యంత కీలకం. ఇటీవలే కేంద్ర హోంమంత్రి అమిత్ షా సభలో మాట్లాడుతూ ఈ బిల్లు వల్ల దక్షిణాది రాష్ట్రాలకు ఎలాంటి అన్యాయం జరగదని, ఏపీ సీట్లు 25 నుండి 38 కి, తెలంగాణ సీట్లు కూడా భారీగా పెరుగుతాయని స్పష్టం చేశారు. ఈ మెగా బిల్లును విజయవంతంగా పాస్ చేయించుకోవడమే మోదీ టీమ్ ముందున్న మైలురాయి.</p>
<p><a title="వన్ నేషన్ - వన్ ఎలక్షన్ బిల్లును కూడా తెస్తారా? " href="https://telugu.abplive.com/astro/pm-modi-kundli-july-2026-astrology-challenges-education-inflation-america-iran-252175" target="_self">వన్ నేషన్ - వన్ ఎలక్షన్ బిల్లును కూడా తెస్తారా? </a></p>
<p>దీనితో పాటు, దేశవ్యాప్తంగా ఒకేసారి ఎన్నికలు నిర్వహించే అత్యంత ప్రతిష్టాత్మకమైన వన్ నేషన్ - వన్ ఎలక్షన్ బిల్లు ను కూడా ఈ సమావేశాల్లోనే టేబుల్ పైకి తెచ్చేందుకు కసరత్తు జరుగుతోంది. అలాగే, ఇటీవల వివాదాస్పదంగా మారిన 130వ రాజ్యాంగ సవరణ కింద రానున్న PM-CMs Jail Bill కూడా చర్చకు వచ్చే అవకాశం ఉంది. దీని ప్రకారం ఏదైనా కేసులో ప్రధాని, సీఎంలు లేదా కేంద్ర మంత్రులు 31 రోజులకు పైగా జ్యుడీషియల్ కస్టడీలో ఉంటే.. వారు స్వయంచాలకంగా తమ పదవులను కోల్పోతారు. ఇలాంటి సెన్సేషనల్ బిల్లులపై విపక్షాల నుండి తీవ్ర ప్రతిఘటన ఎదురయ్యే అవకాశం ఉన్నందున, మోదీ ప్రభుత్వం తన పూర్తి శక్తి సామర్థ్యాలను పార్లమెంట్ వ్యూహాలకే పరిమితం చేసింది.</p>
<p><strong>సెప్టెంబర్‌లోనే కేబినెట్ మార్పు చేర్పులు</strong></p>
<p> ఈ సుదీర్ఘ వర్షాకాల సమావేశాల పర్వం ముగిసిన తర్వాతే, అంటే ఆగస్టు మూడో వారం లేదా సెప్టెంబర్ మొదటి వారంలో కేంద్ర మంత్రివర్గ పునర్వ్యవస్థీకరణ ఉండే అవకాశం స్పష్టంగా కనిపిస్తోంది. పార్లమెంట్‌లో ప్రభుత్వం అనుకున్న వ్యూహాలు ఫలించి, రాజ్యాంగ సవరణ బిల్లులు విజయవంతంగా ఆమోదం పొందితే.. ఆ ఉత్సాహంతోనే మోదీ తన టీమ్‌లోకి కొత్త ముఖాలను తీసుకుంటారు. రాబోయే ఐదు రాష్ట్రాల అసెంబ్లీ ఎన్నికలను, సమీకరణాలను దృష్టిలో ఉంచుకుని అప్పుడే తుది జాబితాను ప్రకటిస్తారని అంటున్నారు. </p>
<p><iframe class="vidfyVideo" style="border: 0px;" src="https://telugu.abplive.com/web-stories/health/adulterated-milk-causes-these-health-problems-252679" width="631" height="381" scrolling="no"></iframe></p>
3 months ago
8 
