<p>AP Chief Information Commissioner | మేడికొండూరు: గుంటూరు జిల్లా మేడికొండూరు పోలీస్ స్టేషన్‌లో ఆంధ్రప్రదేశ్ రాష్ట్ర ప్రధాన సమాచార కమిషనర్ (సీఐసీ) వజ్జ శ్రీనివాసరావు నిర్వహించిన ఆకస్మిక తనిఖీ తీవ్ర వివాదానికి దారితీసింది. సమాచార హక్కు చట్టం (RTI) అమలును పరిశీలించేందుకు వెళ్లిన సీఐసీని పోలీస్ సిబ్బంది లోపలికి వెళ్లకుండా అడ్డుకున్నారు. ప్రభుత్వ కార్యాలయాల్లో ఆర్టీఐ నిబంధనల అమలును అంచనా వేసేందుకు రాష్ట్రవ్యాప్తంగా చేపట్టిన తనిఖీల్లో భాగంగా సోమవారం (జులై 13) ఆయన ఈ పోలీస్ స్టేషన్‌కు వచ్చారు. అయితే, జిల్లా ఎస్పీ అనుమతి ఉంటేనే లోపలికి రావాలంటూ అక్కడ ఉన్న సబ్-ఇన్‌స్పెక్టర్, సర్కిల్ ఇన్‌స్పెక్టర్ ఆయనను గేటు వద్దే నిలిపివేశారు. దీంతో పోలీసులతో ఎలాంటి వాదనకు దిగకుండానే సీఐసీ అక్కడ నుంచి వెనుతిరిగి, సమీపంలోని తహసిల్దార్, ఎంపీడీఓ కార్యాలయాల్లో తనిఖీలను కొనసాగించారు.</p>
<p>రాష్ట్రంలోని 18 జిల్లాల్లో గల 258 ప్రభుత్వ కార్యాలయాల్లో క్షేత్రస్థాయిలో ఆర్టీఐ చట్టం అమలుపై ఏపీ ఇన్ఫర్మేషన్ కమిషన్ 2 రోజుల పాటు విస్తృత తనిఖీలు నిర్వహించిన సమయంలో జరిగిన ఈ ఘటన ప్రాధాన్యత సంతరించుకుంది. సీఐసీ వజ్జ శ్రీనివాసరావుతో పాటు సమాచార కమిషనర్లు రెహానా బేగం, చావలి సునీల్, పి. సింహాచలం నాయుడు, వంతేరు రవిబాబు, గాజుల అడెన్న, వి.ఎస్.సి.కె. చక్రవర్తిల నేతృత్వంలోని ప్రత్యేక బృందాలు ఈ తనిఖీల్లో పాల్గొన్నాయి. ఆయా కార్యాలయాల్లో ప్రజా సమాచార అధికారులు, మొదటి అప్పీలేట్ అధికారులు రికార్డులను సరిగ్గా మెయింటైన్ చేస్తున్నారా, రూల్స్ ప్రకారం సమాచార బోర్డులను ఏర్పాటు చేశారా అనే అంశాలను పరిశీలించారు.</p>
<p>ఈ తనిఖీలకు సంబంధించి మంగళగిరిలోని రాష్ట్ర సమాచార కమిషన్ కార్యాలయంలో మంగళవారం సాయంత్రం సమీక్షా సమావేశం జరిగింది. ఈ సందర్భంగా ఆర్టీఐ చట్టంలోని సెక్షన్ 4(1)(b) నిబంధనలు పెద్ద ఎత్తున ఉల్లంఘనకు గురైనట్లు కమిషన్ గుర్తించింది. రికార్డుల నిర్వహణ లోపాలు, పీఐఓల వివరాల బోర్డులు లేకపోవడాన్ని గమనించిన కమిషన్, నిబంధనలు పాటించని 162 మంది ప్రజా సమాచార అధికారులకు షోకాజ్ నోటీసులు జారీ చేసింది. ముఖ్యంగా గ్రామ, వార్డు సచివాలయాల్లో ఆర్టీఐ నిబంధనలు దాదాపుగా అమలు కావడం లేదని స్పష్టం చేసింది.</p>
<p>అధికారికంగా తనిఖీ చేయడానికి వెళ్లిన ఏపీ సీఐసీ వజ్జ శ్రీనివాసరావుని మేడికొండూరు పోలీస్ స్టేషన్‌లోకి రానివ్వకపోవడాన్ని సమాచార కమిషన్ అత్యంత తీవ్రంగా పరిగణించింది. సంబంధిత పోలీస్ అధికారులు చట్టానికి లోబడి ఉండేలా చూసేందుకు తగిన చర్యలు తీసుకోవాలని నిర్ణయించింది. ఈ ఘటనపై శ్రీనివాసరావు స్పందిస్తూ, పోలీసులు గేటు వద్ద అడ్డుగా నిలబడటంతో తాను గొడవ పడకుండా వెనుతిరిగినట్లు పేర్కొన్నారు. కాగా, రాష్ట్రవ్యాప్త తనిఖీల నివేదికను, ఆర్టీఐ చట్టాన్ని అన్ని ప్రభుత్వ శాఖల్లో కఠినంగా అమలు చేయడానికి అవసరమైన సిఫార్సులతో కూడిన వివరణాత్మక నివేదికను గవర్నర్‌కు, రాష్ట్ర ప్రభుత్వానికి సమర్పించనున్నట్లు కమిషన్ తెలిపింది.</p>
<p><strong>డీజీపీకి లేఖ రాసిన రాష్ట్ర ప్రధాన సమాచార కమిషనర్</strong><br />మేడికొండూరు పోలీస్ స్టేషన్‌లో ఆర్టీఐ చట్టం అమలు పరిశీలనకు వెళ్లిన తనను అడ్డుకోవడంపై సీఐసీ వజ్జ శ్రీనివాసరావు డీజీపీకి లేఖ రాశారు. ఎస్పీ అనుమతి లేదంటూ స్టేషన్ లోకి వెళ్లడానికి తమకు ప్రవేశాన్ని నిరాకరించారని లేఖలో పేర్కొన్నారు. సుప్రీంకోర్టు ఆదేశాల ప్రకారం జరుగుతున్న ఈ చట్టబద్ధమైన తనిఖీలను అడ్డుకోవడం రాజ్యాంగబద్ధ సంస్థ విధులకు ఆటంకం కలిగించడమేనని, ఇది పారదర్శకతకు విరుద్ధమని స్పష్టం చేశారు. ప్రభుత్వ విధుల నిర్వహణను రోధించడం భారతీయ న్యాయ సంహిత కింద నేరమని పేర్కొంటూ, బాధ్యులైన పోలీసులపై తక్షణ శాఖాపరమైన విచారణ జరిపి చర్యలు తీసుకోవాలని సీఐసీ డిమాండ్ చేశారు.</p>
3 months ago
8 
