<p>ఉత్తర్ప్రదేశ్ ప్రయాగ్‌రాజ్‌లో మహా కుంభమేళా అట్టహాసంగా జరుగుతోంది. ఇక్కడి గంగ, యుమునా నదుల త్రివేణి సంగమం వద్దకు ప్రతిరోజు లక్షలాది మంది భక్తులు చేరుకొని స్నానమాచరిస్తున్నారు. అనేక దేశాల నుంచి కూడా జనం తరలివస్తున్నారు. ఇదిలా ఉండగా.. కుంభమేళాలో ఓ ఆసక్తికర ఘటన చోటుచేసుకుంది. మేళాకు వచ్చిన ఓ గ్రీక్ యువతికి, భారత యువకుడి మధ్య ప్రేమ చిగురించింది. అంతేకాదు త్రివేణి సంగమం సాక్షిగా వారు ఒక్కటయ్యారు.</p>
<p>ఇరు కుటుంబాల సమక్షంలో పెళ్లి<br />కుంభమేళాను తిలకించి పవిత్ర సంగమంలో స్నానం చేసేందుకు గ్రీక్ నుంచి పెనెలోప్ అనే యువతి కొద్దిరోజుల క్రితం కుటుంబసభ్యులతో కలిసి వచ్చింది. ఈ క్రమంలోనే ప్రయాగ్రాజ్లో ఆమెకు సిద్ధార్థ్ అనే యువకుడు పరిచయమయ్యాడు. ఈ పరిచయం కాస్తా ప్రేమగా మారింది. ఈ బంధాన్ని కలకాలం కొనసాగించాలని భావించిన జంట.. తమ ప్రేమ చిగురించిన సంగమ క్షేత్రం వద్దే పెళ్లి చేసుకోవాలని నిర్ణయించింది. విషయాన్ని పెద్దలకు చెప్పగా ఇరు కుటుంబాల సమక్షంలో వారి వివాహం సంప్రదాయబద్ధంగా జరిగింది.</p>
<p>వివాహానికి భారత్ కంటే గొప్ప వేదిక లేదు<br />పెనెలోప్ తల్లి, బంధువుల సమక్షంలో జునా అఖారాలోని మహామండలేశ్వర్ స్వామి యతీంద్రానంద గిరి ఆ యువతికి కన్యాదానం చేశారు. తన వివాహాన్ని పెనెలోప్ పార్టీలు, తాగడానికి అవకాశంగా ఉపయోగించుకోలేదని.. అందుకు అతీతంగా దైవిక, ఆధ్యాత్మిక మార్గాన్ని ఎంచుకుందని స్థానికులు ఆనందం వ్యక్తం చేశారు. ఈ జంట తమ వివాహ ఆచారాలను అత్యంత ప్రామాణికమైన పద్ధతిలో నిర్వహించాలని నిర్ణయించుకున్నారని అన్నారు. వివాహం చేసుకోవడానికి భారతదేశం, మహా కుంభమేళా కంటే గొప్ప ప్రదేశాలు లేవని భావించామని సిద్ధార్థ్ తెలిపాడు.</p>
<p>ఇంతకంటే సంతోషం మరొకటి లేదు<br />వరుడు సిద్ధార్థ్ మాట్లాడుతూ.. ‘ఈ సంగమం ప్రపంచంలోనే ఉత్తమమైన ప్రదేశం అని మాకు తెలుసు. ఇక్కడ అనేక మంది గొప్పవారిని చూసి, కలిసే అవకాశం దక్కింది. స్వామి యతీంద్రానంద గిరి ఆశీస్సులు తీసుకున్నం. ఇంతకంటే సంతోషం మరొకటి లేదు. ఇదో గొప్ప వేదిక’ అన్నాడు.</p>
<p>వివాహం పవిత్ర ఘట్టమని ప్రజలు మర్చిపోతున్నారు<br />సిద్ధార్థ్ మాట్లాడుతూ వివాహం అనేది పవిత్రమైన ఘట్టమని, ప్రజలు మర్చిపోతున్నారని అన్నాడు. ‘ప్రాచీన సంప్రదాయాన్ని అనుసరించడంలో మొహమాటపడాల్సిన పని లేదు. ప్రపంచంలోని పురాతన నాగరికతలలో మనది ఒకటి. ఇది సనాతన ధర్మం మాత్రమే కాదు, ప్రపంచంలోని ఇతర ప్రాంతాలకు దిక్సూచి’ అని పేర్కొన్నాడు. పెనెలోప్‌ ఎన్నడూ భారతీయ వివాహానికి హాజరుకాలేదని, ఈ అనుభవం ఆమెకి మాటలకు మించిన అద్భుతమని సిద్ధార్థ్ అన్నాడు. </p>
<p>మాటల్లో చెప్పలేనంత అద్భుతం<br />వధువు పెనెలోప్ ఆనందం వ్యక్తం చేసింది. మాటల్లో చెప్పలేనంత అద్భుతంగా ఉందని పేర్కొంది. దైవిక శక్తిని అనుభవిస్తున్నామని చెప్పింది. తన వివాహాన్ని గ్రీక్లో కంటే భారత్లో చేసుకోవడాన్నే తాను ఇష్టపడుతున్నానని తెలిపింది. అంతకుముందు తాను బౌద్ధ మతాన్ని ఆచరించానని.. కానీ సనాతన ధర్మం నుంచి అన్నీ ఉద్భవించాయని గ్రహించానని పేర్కొంది.</p>
10 months ago
8 
