<p><strong>Maha Mrityunjaya Mantra</strong></p>
<p><strong>ఓం త్రయంబకం యజామహే </strong><br /><strong>సుగంధిం పుష్టి వర్ధనం </strong><br /><strong>ఉర్వారుక మివ బంధనాత్ </strong><br /><strong>మృత్యోర్ ముక్షీయ మామృతాత్ </strong></p>
<p>మనిషికి ఆయురారోగ్యాన్ని, సౌభాగ్యాన్ని దీర్ఘాయువును, ప్రశాంతతను, సంతోషాన్ని ఇచ్చేదే మహా మృత్యుంజయమంత్రం. శైవులు దీనిని రుద్రాభిషేకంలో, వైష్ణవులు పాంచరాత్రం దీక్షలో హోమ భస్మధారణ మంత్రంగా చెప్పుకుంటారు. ఈ మంత్రం పరమ పవిత్రమైనది, అత్యంత ప్రాచుర్యమైనది. క్షీర సాగర మథనంలో వచ్చిన విషాన్ని పరమేశ్వరుడు దిగమింగి మృత్యుంజయుడు అయ్యాడు. అందుకే ఈ మంత్రం జపించిన వారంతా ఆ పరమేశ్వరుడి ఆశీస్సులు పొందుతారని భక్తుల విశ్వాసం. </p>
<p>మహా మృత్యుంజయ మంత్రాన్ని సంజీవని మంత్రం అని, మార్కండేయ మంత్రం అని కూడా అంటారు. అనుకోని ఆపదలు చుట్టుముట్టినప్పుడు, బతుకుపై విరక్తి కలిగిప్పుడు..కాసేపు ఈ మంత్రాన్ని పఠిస్తే మానసిక ప్రశాంతత లభిస్తుందని పండితులు చెబుతారు.</p>
<p>సకల రోగాల నుంచి ఉపశమనం కల్పించి, అపమృత్యు భయాన్ని తొలగించి, ప్రమాదాల నుంచి రక్షించే శక్తి ఈ మంత్రానికి ఉంటుందంటారు. </p>
<p><strong>అర్థ ఏంటంటే </strong><br />అందరికి శక్తి నిచ్చే ముక్కంటి, సుగంధ భరితుడు అయిన శివుడిని నేను పూజిస్తున్నాను. దోస పండును తొడిమ నుంచి వేరు చేసినట్టు మృత్యు బందనం నుంచి నన్ను విడిపించి అమరత్వాన్ని ప్రసాదించగాక..</p>
<p><strong>Also Read: <a title="విష్ణువుకే కాదు శివుడుకీ దశావతారాలున్నాయి - అవేంటంటే!" href="https://telugu.abplive.com/astro/maha-shivaratri-special-dasa-avatars-of-lord-shiva-in-telugu-know-about-the-10-incarnations-of-lord-shiva-198527" target="_self">విష్ణువుకే కాదు శివుడుకీ దశావతారాలున్నాయి - అవేంటంటే!</a></strong></p>
<p>ఈ మంత్రాన్ని నిత్యం 3 సార్లు, 9 సార్లు కుదిరితే 108 సార్లు పారాయణం చేస్తారు. ఈ మంత్రాన్ని భక్తిపూర్వకంగా జపిస్తే దైవ ప్రకంపనలు మొదలై, చుట్టూ ఆవరించి ఉన్న దుష్ట శక్తులు మాయమవుతాయి. ఎందుకంటే ఈ మంత్రాన్ని పఠించిన వారి చట్టూ ఓ శక్తివంతమైన వలయం ఏర్పడుతుందని చెబుతారు. అందుకే ప్రమాదాల బారినుంచి , దురదృష్టం నుంచి బయటపడేందుకు మృత్యుంజయ మంత్రాన్ని పఠిస్తారు. ప్రాతః కాలంలో అయినా సంధ్యా సమయంలో అయినా ఎప్పుడైనా మహా మృత్యుంజయ మంత్రాన్ని పఠించవచ్చు. </p>
<p><strong>ఓం</strong></p>
<p>భగవంతుడు సూక్ష్మ జ్యోతిగా వెలిగిన వెంటనే ఓం నాదం వినబడిందనీ అదే ప్రణవ నాదమని, అదే ఓంకారమని చెబుతారు. ఇదొక శక్తి స్వరూప ధ్వని. అ-ఉ-మ సంగమమే ఓంకారం. ఋగ్వేదం నుంచి ‘అ‘ కారం. యజుర్వేదం నుంచి ‘ఉ‘ కారం, సామవేదం నుంచి ‘మ‘ కారాలు .. ఈ మూడింటి సంగమంతో ఉద్భవించిన ఓంకారం అత్యంత శక్తివంతం. అందుకే ప్రతి మంత్రం ఓం అని ప్రారంభమవుతుంది. ఓంకారం శుభాన్ని కలిగిస్తుంది. </p>
<p><strong>త్ర్యంబకం</strong></p>
<p>భూత, భవిష్యత్, వర్తమానాలకు ప్రతిరూపం త్రినేత్రం. శివుని నుదుటి మధ్యలో ఉన్న సూక్ష్మరూప నేత్రం మూడవది. దీనినే జ్యోతిర్మఠం అంటారు. శివుడు మూడో కన్నుకి దాహకశక్తి, సంజీవన శక్తి రెండూ ఉన్నాయి.అందకే త్యంబకం అని కీర్తిస్తున్నాం.</p>
<p><strong>Also Read: <a title="శివుడు స్మశానంలో ఎందుకు ఉంటాడు .. శివాలయాలు శ్మసానంతో సమానమా!" href="https://telugu.abplive.com/spirituality/maha-shivaratri-2025-why-because-shiva-is-called-layakarudu-and-reasons-for-lord-shiva-lives-in-smasanam-198314" target="_self">శివుడు స్మశానంలో ఎందుకు ఉంటాడు .. శివాలయాలు శ్మసానంతో సమానమా!</a></strong></p>
<p><strong>యజామహే</strong></p>
<p>యజామహే అంటే..ధ్యానిస్తున్నా అని అర్థం. సర్వవేళలా మనకు రక్షగా ఉన్న స్వామిని మనస్ఫూర్తిగా ధ్యానిస్తే అంతకు మించిన శుభం ఏముంది. పాలసముద్రం నుంచి బయటకు వచ్చిన విషం ప్రపంచాన్ని నాశనం చేయకుండా తన గొంతులో దాచుకున్న స్వామిని ప్రార్థించడం కన్నా ఈ జన్మకు ధన్యం ఏముంటుంది.</p>
<p><strong>సుగంధిం</strong></p>
<p>సు అంటే మంచిదైన, గంధ అంటే సువాసన ద్రవ్యాన్ని వెదజల్లినట్టు తన భక్త వాత్సస్యంతో సుగంధాన్ని వెదజల్లుతున్నాడు శంకరుడు. ఆయనకు పిల్లలంటే ఎంతో ప్రేమ. అందుకే మందిరం అడగడు, అలంకారాలు అడగడు, భారీ పూజలు అడగడు. ఓ చెట్టుకింద శివలింగం పెట్టి చెంబుడు నీళ్లు, బిల్వదళాలు వేస్తే చాలు పొంగిపోతాడు<br /> <br /><strong>పుష్టి వర్థనం</strong></p>
<p>సకలచరాచరా సృష్టంతా శివుడి అధీనంలోనే ఉంది. ఆయనే అందర్నీ కాపాడుతాడు. అందుకు ఉదాహరణే గుహుడి కథ. గుహుడనే వేటగాడు ఓ రోజు వేటకు వెళ్లి అలసిపోయాడు. చీకటి పడినా కానీ ఒక్క జంతువు దొరకలేదు. ఈలోగా పులి గాండ్రింపు వినపడడంతో చెట్టెక్కాడు. అది మారేడు వృక్షం. ఆ పులి చెట్టుకిందే ఉండంతో దానిని అదిలించేందుకు ఆకులు తెంపి విసరడం మొదలుపెట్టాడు. ఆ కిందనే శివలింగం ఉందని ఆ వేటగాడికి తెలియదు. ఆ రోజు శివరాత్రి. పులి ఉందని ఆకులు వేయడం ఆపలేదు..వేటగాడు దిగివస్తాడని పులి అక్కడి నుంచి కదల్లేదు. తెల్లారిపోయింది. అలా తెలియకుండా వేటగాడు, పులి చేసిన దీక్షకు మోక్షం ప్రసాదించాడు. </p>
<p><strong>ఉర్వారుక మివ బంధనాత్ </strong></p>
<p>దోసకాయ పక్వానికి వచ్చిన వెంటనే తొడిమను తెంపాల్సిన అవసరం లేదు. దానంతట అదే విడిపోతుంది. అలా భగవానుడిని మనం అడగాల్సిన అవసరం లేదు..భక్తితో ప్రార్థితే సమస్యల నుంచి ఆయనే గట్టెక్కించేస్తాడు</p>
<p><strong>Also Read: <a title="విందు భోజనానికి పిలవరు.. విషాహారానికి అగ్రస్థానం ఇస్తారు- ఎట్టాగయ్యా శివా!" href="https://telugu.abplive.com/spirituality/maha-shivaratri-devotional-story-about-siva-tatwam-know-in-telugu-198498" target="_self">విందు భోజనానికి పిలవరు.. విషాహారానికి అగ్రస్థానం ఇస్తారు- ఎట్టాగయ్యా శివా!</a></strong></p>
<p><strong>మృతోర్ముక్షీయ</strong></p>
<p>అపమృత్యు భయాన్ని తొలగించి, మృత్యువు నుంచి కాపాడే సర్వేశ్వరుడు శంకరుడే. మృత్యువు అంటే భౌతిక మరణం కాదు ఆధ్యాత్మికంగా చేతనం లేకపోవడం కుడా మృత్యు సమానమే. భక్తి లేని ఈ జీవితం నిర్జీవమే. </p>
<p><strong>అమృతాత్ </strong></p>
<p>ఆయన శిరస్సు పైన కాసిని నీళ్లు చిలకరించినా వాటిని అమృతంగా మార్చి అందిస్తాడు. అందుకే శ్రీనాథుడు ఇలా స్తుతించాడు</p>
<p><strong>శివుని శిరమున కాసిన్ని నీళ్ళు జల్లి</strong><br /><strong>పత్తిరిసుమంత నెవ్వడు పార వైచు</strong><br /><strong>కామధేను వతడింట గాడి పసర</strong><br /><strong>మల్ల సురశాఖి వానింట మల్లె చెట్టు</strong></p>
<p><strong><iframe class="vidfyVideo" style="border: 0px;" src="https://telugu.abplive.com/web-stories/spirituality/mahashivratri-2025-significance-and-important-of-panchamrutham-in-puja-198253" width="631" height="381" scrolling="no"></iframe></strong></p>
9 months ago
7 
