<p><strong>Trump cyber agency chief Madhu Gottumukkala: </strong>అమెరికా సైబర్ భద్రతా సంస్థ తాత్కాలిక అధిపతిగా ఉన్న భారత సంతతి వ్యక్తి మధు గొట్టుముక్కల చుట్టూ ఇప్పుడు ఒక పెద్ద వివాదం నెలకొంది. అమెరికాలోని అత్యున్నత సైబర్ డిఫెన్స్ ఏజెన్సీ అయిన సైబర్ సెక్యూరిటీ అండ్ ఇన్‌ఫ్రాస్ట్రక్చర్ సెక్యూరిటీ ఏజెన్సీ యాక్టింగ్ డైరెక్టర్‌గా ఉన్న మధు గొట్టుముక్కల, ప్రభుత్వానికి సంబంధించిన కొన్ని సున్నితమైన ఫైళ్లను బహిరంగంగా అందుబాటులో ఉండే చాట్‌జీపీటీ వెర్షన్‌లో అప్‌లోడ్ చేసినట్లు వార్తలు వచ్చాయి. గతేడాది ఆగస్టులో జరిగిన ఈ పరిణామం వల్ల ప్రభుత్వ నెట్‌వర్క్‌లలో భద్రతా హెచ్చరికలు జారీ అయ్యాయి. అప్‌లోడ్ చేసిన ఫైళ్లు రహస్య విభాగంలోకి రాకపోయినప్పటికీ, అవి కేవలం అధికారిక అవసరాల కోసం మాత్రమే వాడాల్సిన కీలక పత్రాలని ప్రాథమిక దర్యాప్తులో తేలింది.</p>
<p><strong>మధు గొట్టుముక్కల ఎవరు?</strong></p>
<p>మధు గొట్టుముక్కల ఆంధ్రప్రదేశ్ మూలాలున్న భారత సంతతి వ్యక్తి. ఆయన ఆంధ్ర విశ్వవిద్యాలయం నుండి ఇంజనీరింగ్ పట్టా పొందారు. ఆ తర్వాత అమెరికాలో కంప్యూటర్ సైన్స్‌లో ఎంఎస్, ఎంబీఏ , ఇన్ఫర్మేషన్ సిస్టమ్స్‌లో పీహెచ్‌డీ పూర్తి చేశారు. సీఐఎస్‌ఏ ప్యూటీ డైరెక్టర్‌గా నియమితులవ్వడానికి ముందు ఆయన సౌత్ డకోటా రాష్ట్రానికి చీఫ్ ఇన్ఫర్మేషన్ ఆఫీసర్‌గా పనిచేశారు. ట్రంప్ ప్రభుత్వంలో సైబర్ భద్రతను పర్యవేక్షించే అత్యంత కీలకమైన బాధ్యతలను ఆయన ప్రస్తుతం నిర్వహిస్తున్నారు. </p>
<p><strong>వివాదానికి కారణం ఏంటి? </strong></p>
<p>నిజానికి డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ ఉద్యోగులందరికీ చాట్‌జీపీటీ వాడకంపై నిషేధం ఉన్నప్పటికీ, మధు గొట్టుముక్కల తన పదవిని ఉపయోగించి ప్రత్యేక అనుమతి పొందారని సమాచారం. ఇలా అనుమతి పొందిన తర్వాత, ప్రభుత్వ కాంట్రాక్టులకు సంబంధించిన పత్రాలను ఆయన ఏఐ టూల్‌లో అప్‌లోడ్ చేయడంతో వివాదం మొదలైంది. బహిరంగ ఏఐ వేదికలపై డేటాను అప్‌లోడ్ చేస్తే, ఆ సమాచారం సదరు సంస్థల సర్వర్లలో నిక్షిప్తమై ఇతర వినియోగదారులకు సమాధానాలుగా వెళ్లే ప్రమాదం ఉందని నిపుణులు హెచ్చరిస్తున్నారు. దేశ భద్రతను కాపాడాల్సిన వారే ఇలాంటి తప్పిదానికి పాల్పడటంపై విమర్శలు వ్యక్తమవుతున్నాయి. </p>
<blockquote class="twitter-tweet">
<p dir="ltr" lang="en">NEW - Head of the U.S. cyber defense agency CISA, Madhu Gottumukkala, uploaded sensitive contracting documents into a public version of ChatGPT, triggering a DHS security review — Politico <a href="https://t.co/sBFegSiiPT">pic.twitter.com/sBFegSiiPT</a></p>
— Disclose.tv (@disclosetv) <a href="https://twitter.com/disclosetv/status/2016609308637565177?ref_src=twsrc%5Etfw">January 28, 2026</a></blockquote>
<p><strong>తదుపరి పరిణామాలు</strong></p>
<p>ఈ ఘటనపై హోమ్‌ల్యాండ్ సెక్యూరిటీ అధికారులు అంతర్గత విచారణ చేపట్టారు. అయితే, ఆయన ఉపయోగించిన చాట్‌జీపీటీ వెర్షన్‌లో కొన్ని భద్రతా ప్రమాణాలు ఉన్నాయని, అది పరిమిత కాలం మాత్రమే వాడారని సీఐఎస్‌ఏ ప్రతినిధులు సమర్థించుకుంటున్నారు. కాగా, గొట్టుముక్కల గతంలో లై డిటెక్టర్ పరీక్షలో విఫలమయ్యారనే వార్తలు కూడా ఇప్పుడు మరోసారి చర్చనీయాంశమయ్యాయి. ట్రంప్ పాలనలో ఐటీ ఆధునీకరణ దిశగా అడుగులు వేస్తున్న సమయంలో, ఈ చాట్‌జీపీటీ ఉదంతం ఆయన నాయకత్వంపై ప్రశ్నలను లేవనెత్తుతోంది. </p>
<p><iframe class="vidfyVideo" style="border: 0px;" src="https://telugu.abplive.com/web-stories/amravati/iconic-towers-in-amaravati-are-being-built-using-the-diagrid-method-this-is-what-diagrid-means-236001" width="631" height="381" scrolling="no"></iframe></p>
2 months ago
7 
