Kumuram Bheem Asifabad Latest News: కుమ్రం భీం ఆసిఫాబాద్ జిల్లా దిందాలో రణరంగం! ప్లాంటేషన్ అడ్డుకున్న రైతులు! 

<p><strong>Kumuram Bheem Asifabad Latest News:&nbsp;</strong>అది ఒక ప్రశాంతమైన అడవీ ప్రాంతం గ్రామం. కానీ మంగళవారం ఉదయం ఒక్కసారిగా ఆ ప్రశాంతత చెదిరిపోయింది. అటవీ శాఖ వాహనాలు సైరన్లు, రైతుల ఆక్రందనలు, అధికారుల హెచ్చరికలతో కుమ్రం భీం ఆసిఫాబాద్ జిల్లా చింతలమానేపల్లి మండలం దిందా గ్రామం రణరంగంగా మారింది. దశాబ్దాలుగా సాగు చేసుకుంటున్న భూమి తమదని రైతులు, లేదు ఇది అటవీ సంరక్షణ ప్రాంతమని అధికారులు, ఈ రెండు వర్గాల మధ్య తలెత్తిన పోడు చిచ్చు జిల్లా వ్యాప్తంగా చర్చనీయాంశమైంది.&nbsp;</p> <h2>తీవ్ర ఉద్రిక్తత</h2> <p>ఉదయం అటవీశాఖాధికారులు అటవీ పునరుద్ధరణ కార్యక్రమంలో భాగంగా మొక్కలు నాటేందుకు భారీగా సిబ్బందితో దిందా గ్రామానికి చేరుకున్నారు. అధికారులు భూముల్లోకి ప్రవేశించి ప్లాంటేషన్ పనులు చేపట్టేందుకు ప్రయత్నించగా, స్థానిక రైతులు వారిని అడ్డుకున్నారు. ఇది కాస్త తీవ్ర వాగ్వాదానికి, ఆపై తోపులాటలకు దారి తీసింది.&nbsp;</p> <p>పరిస్థితి ఎంత దారుణంగా తయారైందని, కొందరు గ్రామస్తులు, మహిళా రైతులు అటవీశాఖ వాహనాలకు అడ్డంగా పడుకున్నారు. మా భూములు మాకు వదిలేయండి అంటూ వారు చేసిన నిరసనతో అటవీ ప్రాంతం దద్దరిల్లింది. పరిస్థితి అదుపు తప్పుతుండటంతో పోలీసులు రంగ ప్రవేశం చేసి నిరసనకారులను అదుపులోకి తీసుకున్నారు. వారిని బలవంతంగా వాహనాల్లోకి ఎక్కించి కాగజ్&zwnj;నగర్&zwnj; ఫారెస్టు డివిజన్ కార్యాలయానికి తరలించారు.&nbsp;</p> <h2>తాతల కాలం నాటి భూమి అంటున్న రైతులు&nbsp;</h2> <p>ఈ పోరాటంలో అరెస్టు అయిన రైతులు తమ గోడును వెళ్లగక్కుతున్నారు. ముఖ్యంగా మహిళలు, వృద్ధులు అని కూడా చూడకుండా అధికారులు తమపై అమానుషంగా ప్రవర్తించారని ఆవేదన వ్యక్తం చేస్తున్నారు. తాము తమ తాతల కాలం నుంచి, అంటే ఎన్నో దశాబ్దాలుగా ఈ భూములను నమ్ముకొని సాగు చేసుకుంటూ జీవనం సాగిస్తున్నామని రైతులు వాదిస్తున్నారు. మాకు సాగు హక్కులు కల్పించి, పట్టాలు మంజూరు చేయాలి అన్నదే వారి ఏకైక డిమాండ్. ప్రభుత్వం తమ సమస్యను గుర్తించి న్యాయం చేసే వరకు పోరాటం ఆపేది లేదని రైతులు స్పష్టం చేస్తున్నారు&nbsp;</p> <h2>31శాతం ఆక్రమణ అని అటవీశాఖ వాదన&nbsp;</h2> <p>మరోవైపు అటవీ శాఖ అధికారులు తమ చర్యలను సమర్థించుకుంటున్నారు. కాగజ్&zwnj;నగర్&zwnj; ఎఫ్&zwnj;డీవో అప్పయ్య అందించిన సమాచారం ప్రకారం ఆ ప్రాంతంలో అటవీ భూములు పరిరక్షణ అత్యంత కీలకంగా మారింది. చింతలమనేపల్లి మండలం కర్జెల్లీ రేంజ్ పరిధిలో సుమారు 31శాతం అటవీ భూమి ఆక్రమణకు గురైందని అధికారులు గుర్తించారు. ఒక్క దిందా ప్రాంతంలోనే 1600 ఎకరాల అటవీ &nbsp;భూమి ఆక్రమణలో ఉందన్నారు.</p> <p>వివాదాస్పదమైన 1600 ఎకరాల్లో మానవతా దృక్పథంతో సుమారు 800 ఎకరాల్లో స్థానిక రైతులు తాత్కాలికంగా వ్యవసాయం చేసుకునేందుకు అధికారులు గతంలో అనుమతి ఇచ్చారు. &nbsp;ఒక్కో కుటుంబానికి గరిష్టంగా నాలుగు ఎకరాల చొప్పున పోడు సాగు చేసుకునే అవకాశం కల్పించినప్పటికీ, రైతులు అంతకు మించి సాగు చేయాలని చూడటం వల్లే సమస్య తలెత్తుతోందని అధికారులు అంటున్నారు.&nbsp;</p> <h2>ఎందుకు ఈ వివాదం ముదురుతోంది?</h2> <p>గత కొంతకాలంగా ఈ పోడు భూముల అంశంపై అధికారులు, రైతుల మధ్య పచ్చగడ్డి వేస్తే భగ్గుమనేలా పరిస్థితులు ఉన్నాయి. అటవీ భూములు సంరక్షణలో భాగంగా అధికారులు సరిహద్దులు నిర్ణయించడం, కందకాలు తవ్వడం వంటి పనులు చేపట్టడం రైతులకు ఆగ్రహం కలిగిస్తోంది. ప్రతి ఏటా విత్తనాలు నాటే సమయం రాగానే ఇరు వర్గాల మధ్య ఈ ఘర్షణలు పునరావృతమవుతాయి. అటవీ భూములను కాపాడాలని అధికారులు, జీవనాధారమైన భూమిని వదులుకోలేమని రైతులు మొండిగా ఉండటంతో ఈ సమస్య ఒక కొలిక్కి రావడం లేదు. సమస్యను ఉన్నతాధికారుల దృష్టికి తీసుకెళ్లి పరిష్కారానికి కృషి చేస్తామని ఎఫ్&zwnj;డీవో అప్పయ్య హామీ ఇచ్చారు.&nbsp;</p> <p>ప్రస్తుతానికి దిందా గ్రామంలో భారీగా అటవీ సిబ్బందిని మోహరించారు. గ్రామంలో ఆందోళనకర వాతావరణం నెలకొన్నప్పటికీ అటవీ శాఖ తన ప్లాంటేషన్ పనులను కొనసాగించేందుకు ప్రయత్నిస్తోంది. ప్రభుత్వం, ఉన్నతాధికారులు జోక్యం చేసుకొని, అటవీ సంరక్షణకు భంగం కలగకుండా రైతులకు న్యాయం చేసే దిశగా అడుగులు వేయాలని స్థానికులు కోరుతున్నారు.&nbsp;</p>