<p><strong>KumbhMela Viral Girl: </strong>ప్రయాగ్‌రాజ్ మహాకుంభమేళాలో రుద్రాక్ష మాలలు విక్రయిస్తూ తన నీలిరంగు కళ్లతో సోషల్ మీడియాను ఊపేసిన వైరల్ గాళ్ మోనాలిసా బోస్లే జీవితం గందరగోళంగా మారింది. కేరళకు చెందిన తన ప్రేమికుడు ఫర్మాన్ ఖాన్‌ను వివాహం చేసుకున్న తర్వాత కుటుంబం నుంచి ప్రాణహాని ఎదుర్కొంటున్న ఆమె, ఆదివారం సాయంత్రం తన న్యాయవాదితో కలిసి ఎర్నాకుళం సెంట్రల్ పోలీస్ స్టేషన్‌ను ఆశ్రయించింది. తన తండ్రి నుంచి తీవ్ర బెదిరింపులు వస్తున్నాయని, తనకు , తన భర్తకు తక్షణమే పోలీసు రక్షణ కావాలని కోరుతూ కొత్తగా రాతపూర్వక ఫిర్యాదు సమర్పించింది.</p>
<p> ఈ వివాదం కేవలం ఒక ప్రేమ వివాహానికి మాత్రమే పరిమితం కాలేదు. మధ్యప్రదేశ్ కోర్టులో తన వయస్సును నిరూపించుకోవడానికి అత్యంత కీలకమైన పాస్‌పోర్ట్‌ను తండ్రి బలవంతంగా స్వాధీనం చేసుకున్నాడని మోనాలిసా ఆరోపించింది. అంతేకాకుండా, తన ఖాతాలో ఉన్న దాదాపు 10 లక్షల రూపాయలను ఆయన అక్రమంగా విత్‌డ్రా చేసుకున్నాడని ఆవేదన వ్యక్తం చేసింది. మధ్యప్రదేశ్ పోలీస్ స్టేషన్‌లో మోనాలిసా తండ్రి ఆమెను మైనర్ గా చూపుతూ, ఆమె భర్త ఫర్మాన్ ఖాన్‌పై కిడ్నాప్ కేసుతో పాటు పోక్సో, ఎస్సీ, ఎస్టీ అట్రాసిటీ కేసులు నమోదు చేయించాడు. </p>
<p>అయితే వయస్సు వివాదంపై సంచలన నిజాలు బయటకు వస్తున్నాయి. మోనాలిసా వద్ద ఉన్న ఆధార్ కార్డ్, పాన్ కార్డ్, ఓటర్ ఐడీల ప్రకారం ఆమె పుట్టిన తేదీ జనవరి 1, 2008 అని, దీని ప్రకారం ఆమె మేజర్ అని కేరళ హైకోర్టు ప్రాథమికంగా గుర్తించింది. కానీ, మధ్యప్రదేశ్ నేషనల్ కమీషన్ ఫర్ షెడ్యూల్డ్ ట్రైబ్స్ సేకరించిన ఆసుపత్రి రికార్డుల్లో మోనాలిసా పుట్టిన తేదీ 2009గా ఉందంటూ తండ్రి కోర్టుకు చెబుతున్నారు. దీనిపై స్పందించిన మోనాలిసా.. ఆ ఆసుపత్రి రికార్డులు తన తమ్ముడివని, తాను ఇంట్లోనే జన్మించానని, తండ్రి ఉద్దేశపూర్వకంగానే ఫోర్జరీ డాక్యుమెంట్లతో తన భర్తను జైలుకు పంపాలని చూస్తున్నాడని మీడియాకు వివరించింది.</p>
<p>ఈ కేసులో గతంలో కేరళ హైకోర్టు ఇచ్చిన మధ్యంతర రక్షణ ఉత్తర్వులు జులై 10న సాంకేతిక కారణాలతో ఉపసంహరించుకోవాల్సి వచ్చింది. భద్రత కల్పించేందుకు పోలీసులు యత్నించిన సమయంలో మోనాలిసా ఇచ్చిన చిరునామాలో దంపతులు అందుబాటులో లేకపోవడంతో, హైకోర్టు తాత్కాలికంగా ఆ ఉత్తర్వులను పక్కనపెట్టింది. అయితే, ఆమె మళ్లీ లిఖితపూర్వకంగా పోలీసులను ఆశ్రయిస్తే భద్రత కల్పించవచ్చని స్పష్టం చేయడంతో, మోనాలిసా నేరుగా ఎర్నాకుళం సెంట్రల్ పీఎస్‌కు వచ్చి కొత్త అడ్రస్‌తో ఫిర్యాదు చేసింది.</p>
<p>మరోవైపు మధ్యప్రదేశ్ పోలీసులు నమోదు చేసిన కిడ్నాపింగ్ కేసులో మోనాలిసా భర్త ఫర్మాన్ ఖాన్‌కు కేరళ హైకోర్టు ఇచ్చిన ట్రాన్సిట్ బెయిల్ ముగియడంతో అతనిపై అరెస్ట్ ప్రమాదం పొంచి ఉంది. మధ్యప్రదేశ్ వస్తే చంపేస్తామని, ముక్కలుగా నరికేస్తామని రోజూ బెదిరింపు కాల్స్ వస్తున్నాయి అని దంపతులు ఆవేదన వ్యక్తం చేస్తున్నారు. ఎర్నాకుళం సీపీ పరిధిలోని పోలీసులు ఈ వ్యవహారంలో చట్టపరమైన చర్యలు చేపడుతూ, దంపతులకు రక్షణ కల్పించేందుకు సన్నాహాలు చేస్తున్నారు.</p>
<p><iframe class="vidfyVideo" style="border: 0px;" src="https://telugu.abplive.com/web-stories/business/here-is-how-to-get-a-business-loan-without-collateral-253824" width="631" height="381" scrolling="no"></iframe></p>
3 months ago
8 
