<p><strong>Former Indian Opener Wasim Jaffer Alleges Unfair Treatment Behind Star Batter Premature Red Ball Exit: </strong>భారత క్రికెట్ దిగ్గజాలు విరాట్ కోహ్లీ, రోహిత్ శర్మ గత ఏడాది వారం రోజుల వ్యవధిలోనే టెస్ట్ ఫార్మాట్‌కు గుడ్‌బై చెప్పి అభిమానులను తీవ్ర దిగ్భ్రాంతికి గురిచేసిన సంగతి తెలిసిందే. ఐపీఎల్ 2025 జరుగుతున్న సమయంలో రోహిత్ శర్మ టెస్ట్ రిటైర్మెంట్ ప్రకటించగా, ఆ వెంటనే కొద్ది రోజులకే కోహ్లీ కూడా సుదీర్ఘ ఫార్మాట్‌కు వీడ్కోలు పలికాడు. ముఖ్యంగా ఐపీఎల్ ముగిసిన వెంటనే భారత జట్టు ఐదు మ్యాచ్‌ల టెస్ట్ సిరీస్ కోసం ఇంగ్లాండ్ పర్యటనకు వెళ్లాల్సి ఉన్న తరుణంలో కోహ్లీ తీసుకున్న ఆకస్మిక నిర్ణయం అప్పట్లో పెద్ద సంచలనంగా మారింది. ఆ సమయంలో చీఫ్ సెలెక్టర్‌గా ఉన్న అజిత్ అగార్కర్ వ్యవహారశైలి వల్లే కోహ్లీ అర్ధాంతరంగా వైదొలిగాడన్న వార్తలు బలంగా వినిపించాయి. ఈ సున్నితమైన అంశంపై భారత మాజీ ఓపెనర్ వసీం జాఫర్ తన యూట్యూబ్ ఛానల్‌లో స్పందిస్తూ సంచలన విషయాలు బయటపెట్టాడు. </p>
<p>Read Also: <a title="Tilak Varma Dismissal Drama: బౌండరీ అనుకుని ఫిస్ట్ బంప్, క‌ట్ చేస్తే రనౌట్.. తిలక్ నిర్లక్ష్యంపై ర‌చ్చ‌, ఫీల్డింగ్‌లో అరుదైన రికార్డు" href="https://telugu.abplive.com/sports/cricket/tilak-varma-achieves-elite-catching-feat-despite-bizarre-run-out-in-indore-t20i-261297" target="_self">Tilak Varma Dismissal Drama: బౌండరీ అనుకుని ఫిస్ట్ బంప్, క‌ట్ చేస్తే రనౌట్.. తిలక్ నిర్లక్ష్యంపై ర‌చ్చ‌, ఫీల్డింగ్‌లో అరుదైన రికార్డు</a></p>
<p>సెలెక్టర్లు తనతో వ్యవహరించిన తీరు పట్ల కోహ్లీ తీవ్రమైన అసంతృప్తి, చేదు భావనతో ఉన్నాడని, ఆ ఆవేదనతోనే అతడు ఆటకు వీడ్కోలు చెప్పి ఉంటాడని జాఫర్ పేర్కొన్నాడు. "సెలెక్షన్ కమిటీ అతడితో నడుచుకున్న తీరుతో విరాట్ నొచ్చుకున్నట్లు అనిపించింది. కోహ్లీ లాంటి స్టార్ ఆటగాడు మైదానంలో ఉంటే ప్రేక్షకులు స్టేడియాలకు పోటెత్తుతారు. అతడికి ప్రపంచవ్యాప్తంగా అపారమైన ఫాలోయింగ్ ఉంది. అతడు కచ్చితంగా మరికొంత కాలం టెస్ట్ క్రికెట్ ఆడే సత్తా కలిగినవాడు. విరాట్ స్వయంగా నోరు విప్పి చెప్పే వరకు అసలు నిజాలు పూర్తిగా బయటకు రావు. ఇంగ్లాండ్ టూర్ కోసం అతడు తీవ్రంగా సన్నాహాలు చేసుకున్నాడు" అని జాఫర్ వివరించాడు.</p>
<p>Read Also: <a title="IND Beat WI In 3rd T20: టీమిండియా థ్రిల్లింగ్ విక్ట‌రీ.. 3వ టీ20లో పోరాడి ఓడిన విండీస్.. స‌త్తా చాటిన అభిషేక్, అర్ష‌దీప్" href="https://telugu.abplive.com/sports/cricket/india-beat-west-indies-in-indore-t20-261264" target="_self">IND Beat WI In 3rd T20: టీమిండియా థ్రిల్లింగ్ విక్ట‌రీ.. 3వ టీ20లో పోరాడి ఓడిన విండీస్.. స‌త్తా చాటిన అభిషేక్, అర్ష‌దీప్</a></p>
<p><strong>అందని మైలురాళ్లు.. 10 వేల పరుగులకు అడుగు దూరంలో..</strong><br />టెస్ట్ క్రికెట్ చరిత్రలో పలు అరుదైన రికార్డులకు అతి సమీపంలో ఉండగానే కోహ్లీ నిష్క్రమించాడు. దిగ్గజ బ్యాటర్ సునీల్ గవాస్కర్ ఆడిన 125 టెస్టుల రికార్డును సమం చేయడానికి అతడికి కేవలం రెండు టెస్టులు మాత్రమే తక్కువయ్యాయి. అంతేకాకుండా టెస్టుల్లో 10,000 పరుగుల మైలురాయిని అందుకోవడానికి కోహ్లీకి కేవలం 770 పరుగులు మాత్రమే అవసరమయ్యాయి. ఆ ఘనత సాధించి ఉంటే సచిన్ టెండూల్కర్, రాహుల్ ద్రవిడ్, సునీల్ గవాస్కర్ తర్వాత ఆ ఫీట్ సాధించిన నాల్గో భారత బ్యాటర్‌గా నిలిచేవాడు. మరో ఐదు సెంచరీలు సాధించి ఉంటే టెస్టుల్లో 35 సెంచరీలు పూర్తి చేసుకున్న ప్రపంచంలో ఎనిమిదో బ్యాటర్‌గా రికార్డుల్లోకెక్కేవాడు.</p>
<p><strong>ఆస్ట్రేలియా పర్యటనలో ఫామ్ లేమి.. టెస్ట్ ముగింపు</strong><br />2025 ఆరంభంలో ఆస్ట్రేలియా గడ్డపై జరిగిన టెస్ట్ సిరీస్‌లో కోహ్లీ తీవ్రంగా తడబడ్డాడు. ఐదు టెస్టుల్లో కేవలం 23.75 సగటుతో 190 పరుగులు మాత్రమే సాధించాడు. అయినప్పటికీ ఇంగ్లాండ్ పరిస్థితుల్లో అతడి అనుభవం జట్టుకు ఎంతో అవసరమని అంతా భావించిన సమయంలో రిటైర్మెంట్ ప్రకటించడం చర్చనీయాంశమైంది.</p>
<p><strong>అర్ధాంతర ముగింపుపై చర్చ.. భారత క్రికెట్‌లో శూన్యత</strong><br />అగార్కర్ కమిటీ వైఖరిపై ఇప్పటికీ అనుమానాలు కొనసాగుతుండగా, కోహ్లీ లాంటి దిగ్గజం కెరీర్ అర్ధాంతరంగా ముగియడంపై క్రికెట్ వర్గాల్లో చర్చ ఇంకా కొనసాగుతూనే ఉంది.</p>
2 weeks ago
2 
