<p>KBR Park Elevated Corridors: హైదరాబాద్‌లోని జూబ్లీహిల్స్, బంజారాహిల్స్‌లలో ట్రాఫిక్ రద్దీని తగ్గించేందుకు జీహెచ్‌ఎంసీ, రాష్ట్ర ప్రభుత్వం ప్రతిష్టాత్మక ప్రణాళికను సిద్ధం చేశాయి. కేబీఆర్‌ పార్కు చుట్టూ దాదాపు రూ.1,090 కోట్లతో హెచ్‌సీటీ ప్రాజెక్ట్‌ రద్దు కావడంతో, దానికి ప్రత్యామ్నాయంగా ఎలివేటెడ్‌ కారిడార్ నిర్మించాలని అధికారులు నిర్ణయించారు. </p>
<p>రూ.1,090 కోట్ల వ్యయంతో </p>
<p>నాగార్జున సర్కిల్‌ నుంచి జూబ్లీహిల్స్‌ చెక్‌పోస్టు వరకు సుమారు 4.3 కిలోమీటర్ల మేర కొత్త ఎలివేటెడ్‌ కారిడార్‌ను నిర్మించనున్నారు. ఈ ప్రాజెక్ట్ ద్వారా బంజారాహిల్స్ నుంచి హైటెక్ సిటీ, మైండ్ స్పేస్ వైపు వెళ్లే ప్రయాణికులకు ట్రాఫిక్ కష్టాలు తగ్గనున్నాయి. </p>
<h3>ప్రముఖులతో భూసేకరణ ఒప్పందం</h3>
<p>ఈ ఎలివేటెడ్ కారిడార్ పరిధిలోని ప్రధాన కూడళ్లను విస్తరించేందుకు భూసేకరణ చేపట్టాల్సి వచ్చింది. నగర ట్రాఫిక్ ఇబ్బందులు తగ్గించడం, మౌలిక వసతుల కల్పనను దృష్టిలో ఉంచుకుని పలువురు ప్రముఖులు తమ స్థలాలను అప్పగించేందుకు ముందుకు వచ్చారు.</p>
<h3>రోడ్ నంబరు 45 కూడలి.. బాలకృష్ణ నివాసం </h3>
<p>బంజారాహిల్స్ నుంచి హైటెక్ సిటీకి వెళ్లే అత్యంత కీలకమైన రోడ్డు నెంబర్ 45 జంక్షన్ అభివృద్ధికి సినీ నటుడు, ఎమ్మెల్యే నందమూరి బాలకృష్ణ తన నివాసంలోని 862.77 చదరపు గజాల స్థలాన్ని ఇచ్చేందుకు అంగీకరించారు. దీంతో ఆయన నివాసాన్ని వేరే ప్రాంతానికి మార్చనున్నారు. ఎన్టీఆర్ ఇక్కడే అభిమానులను కలిసేవారని, ఈ నివాసంతో కుటుంబానికి ఎంతో సెంటిమెంట్ అనుబంధం ఉందని పార్టీ వర్గాలు చెబుతున్నాయి.</p>
<h3>శబ్దాలయ స్టూడియో జంక్షన్ </h3>
<p>శబ్దాలయ స్టూడియో, ప్రసాద్ ల్యాబ్స్, కేబీఆర్ పార్క్ మెయిన్ గేటును కలిపే జంక్షన్‌కు శబ్దాలయ స్టూడియోకి చెందిన 608 గజాల స్థలం అవసరమని గుర్తించారు. దీని అంచనా విలువ రూ.30.40 కోట్లు కాగా, శబ్దాలయ సంస్థ అధినేత శ్యాంప్రసాద్‌రెడ్డి ఇందుకు టీడీఆర్ పొందేందుకు అంగీకరించారు. <br /><br />Also Read: <a title=" హైదరాబాద్‌లో 'పీఆర్‌టీ' రవాణా వ్యవస్థ.. మూడు కారిడార్లకు సీఎం రేవంత్ రెడ్డి గ్రీన్‌సిగ్నల్!" href="https://telugu.abplive.com/telangana/new-personal-rapid-transit-system-in-hyderabad-cm-revanth-reddy-gives-nod-to-three-corridors-261282" target="_self"> హైదరాబాద్‌లో 'పీఆర్‌టీ' రవాణా వ్యవస్థ.. మూడు కారిడార్లకు సీఎం రేవంత్ రెడ్డి గ్రీన్‌సిగ్నల్!</a></p>
<h3>ఫిల్మ్‌నగర్ జంక్షన్ </h3>
<p>ఈ కీలక జంక్షన్ అభివృద్ధికి భవ్య కన్‌స్ట్రక్షన్స్‌కు చెందిన 341.33 చదరపు గజాల స్థలాన్ని సేకరించాల్సి రాగా, సంస్థ యజమాని ఆనంద్‌ప్రసాద్‌ కూడా సానుకూలంగా స్పందించి భూమిని ఇచ్చేందుకు అంగీకరించారు.</p>
<h3>టీడీఆర్‌ (TDR) అంటే ఏమిటి?</h3>
<p>నగరంలో రహదారుల విస్తరణ లేదా జంక్షన్ల అభివృద్ధి కోసం ప్రైవేట్ భూములను సేకరించినప్పుడు ప్రభుత్వం నగదు పరిహారానికి ప్రత్యామ్నాయంగా TDR (ట్రాన్స్‌ఫరబుల్ డెవలప్‌మెంట్ రైట్స్) సర్టిఫికేట్లను జారీ చేస్తుంది. భూమి యజమానులు ఈ సర్టిఫికేట్‌ను ఉపయోగించి ఇతర ప్రాంతాల్లో అదనంగా భవన నిర్మాణ అంతస్తులకు అనుమతి పొందవచ్చు లేదా ఇతర బిల్డర్లకు అమ్ముకోవచ్చు. ఇది భూసేకరణ ప్రక్రియను వేగవంతం చేయడంతో పాటు ప్రభుత్వ ఖజానాపై ఆర్థిక భారాన్ని తగ్గిస్తుంది.</p>
<p>Also Read: <a title="రాజకీయాల్లో దూకుడు - పథకాల అమల్లో ఆలస్యం - రేవంత్ పాలనలో వెనుకబడుతున్నారా?" href="https://telugu.abplive.com/politics/political-moves-vs-administrative-delays-in-telangana-revanth-reddy-governance-261201" target="_self">రాజకీయాల్లో దూకుడు - పథకాల అమల్లో ఆలస్యం - రేవంత్ పాలనలో వెనుకబడుతున్నారా?</a></p>
2 weeks ago
2 
