<p><strong>Karisma Kapoor ex-husbands property dispute:</strong> కరిష్మా కపూర్ మాజీ భర్త బిజినెస్ టైకూన్ సంజయ్ కపూర్ మరణం తర్వాత ఆయన వేల కోట్ల ఆస్తి చుట్టూ మొదలైన వారసత్వ యుద్ధం ఇప్పుడు సరికొత్త మలుపు తిరిగింది. సంజయ్ కపూర్ , నటి కరిష్మా కపూర్ల పిల్లలైన సమైరా, కియాన్ కపూర్‌లకు ఢిల్లీ హైకోర్టులో బిగ్ రిలీఫ్ లభించింది. సుమారు రూ. 30,000 కోట్ల విలువైన ఆస్తులను కాపాడాలని, వాటిని ఇతరులకు బదిలీ చేయకుండా నిలువరించాలని కోర్టు మధ్యంతర ఉత్తర్వులు జారీ చేసింది. </p>
<p><strong>ఫోర్జరీ వీలునామా.. అసలు వివాదం ఇదే! </strong></p>
<p>సంజయ్ కపూర్ మూడవ భార్య ప్రియా సచ్‌దేవ్ కపూర్ సమర్పించిన వీలునామా నకిలీదని, ఆమె దానిని ఫోర్జరీ చేసిందని కరిష్మా కపూర్ పిల్లలు కోర్టును ఆశ్రయించారు. ప్రియా కపూర్ కావాలనే సంజయ్ కపూర్‌కు చెందిన విలువైన ఆస్తులను వెల్లడించలేదని వారు ఆరోపిస్తున్నారు. కోర్టుకు సమర్పించిన జాబితాలో కోట్లాది రూపాయల విలువైన రోలెక్స్ వాచీలు, పోలో గుర్రాలు, అత్యంత ఖరీదైన కళాఖండాలు, స్థిరాస్తుల వివరాలను ఆమె దాచిపెట్టారని పిల్లల తరపు న్యాయవాదులు వాదించారు.</p>
<p><strong> కోర్టు కీలక ఆదేశాలు - ఆస్తుల ఫ్రీజ్ </strong></p>
<p>ఈ వాదనలను విన్న ఢిల్లీ హైకోర్టు, పిల్లల వైపు ప్రాథమిక వాస్తవం ఉందని గుర్తించింది. వీలునామా ప్రామాణికతపై అనుమానాలు ఉన్నందున, ఆస్తులు వేరొకరి పరం కాకుండా చూడాలని ఆదేశించింది. సంజయ్ కపూర్ బ్యాంక్ ఖాతాలను నిలిపివేయడంతో పాటు, ప్రియా కపూర్ ఆ ఆస్తులను అమ్మకుండా లేదా బదిలీ చేయకుండా మధ్యంతర స్టే విధించింది. ఈ వీలునామా నిజమైనదేనని నిరూపించుకోవాల్సిన బాధ్యత ఇప్పుడు ప్రియా కపూర్‌పైనే ఉందని కోర్టు స్పష్టం చేసింది.</p>
<p><strong> కుటుంబ సభ్యుల మధ్య పెరిగిన ఉద్రిక్తతలు </strong></p>
<p>కేవలం పిల్లలే కాకుండా, సంజయ్ కపూర్ తల్లి రాణి కపూర్, సోదరి మందిరా కపూర్ కూడా ఈ వివాదంలో తలదూర్చారు. రాణి కపూర్ ఏకంగా సుప్రీంకోర్టు వరకు వెళ్లడంతో, ఈ వ్యవహారం ముదిరి పాకాన పడింది. గత విచారణలో పిల్లలను సంపన్న ఆలివర్ ట్విస్ట్ అని అభివర్ణించడం ఈ వివాదం ఎంతటి తీవ్రస్థాయికి చేరిందో నిదర్శనంగా మారింది. ఆస్తుల పంపకాల విషయంలో కుటుంబ సభ్యుల మధ్య తీవ్రమైన వాగ్వాదాలు జరుగుతున్నట్లు ప్రచారం జరుగుతోంది. </p>
<p><strong>కరీనా కపూర్ స్పందన - న్యాయం గెలుస్తుంది! </strong></p>
<p>కోర్టు తీర్పు వెలువడిన వెంటనే నటి కరీనా కపూర్ ఖాన్ సోషల్ మీడియాలో స్పందిస్తూ ఒక ఆసక్తికర పోస్ట్ చేశారు. అక్కడ వెలుగు ఉంది.. న్యాయం, నిజం ఎప్పుడూ గెలుస్తాయి.. అంటూ ఆమె పేర్కొన్నారు. తన సోదరి కరిష్మా పిల్లలకు అనుకూలంగా తీర్పు రావడంతో కరీనా ఇలా పరోక్షంగా సంతోషం వ్యక్తం చేశారు. గత ఏడాది లండన్‌లో పోలో ఆడుతూ సంజయ్ కపూర్ ఆకస్మికంగా మరణించిన తర్వాత ప్రారంభమైన ఈ వారసత్వ పోరు ఇప్పుడు కోర్టు గదుల్లో కీలక దశకు చేరుకుంది. సంపన్న కుటుంబాల్లో ఆస్తుల కోసం జరిగే పోరాటాలు ఎంత దారుణంగా ఉంటాయో ఈ కేసు మరోసారి నిరూపించింది. కరిష్మా కపూర్ పిల్లల భవిష్యత్తు కోసం కోర్టు తీసుకున్న ఈ నిర్ణయం వారి హక్కులను కాపాడటంలో కీలకమైనదిగా భావించవచ్చు. రానున్న రోజుల్లో వీలునామా అసలైనదా కాదా అన్నది తేలాల్సి ఉంది. </p>
<p><iframe class="vidfyVideo" style="border: 0px;" src="https://telugu.abplive.com/web-stories/cinema/raashi-khanna-in-this-green-dress-you-can-t-look-away-246056" width="631" height="381" scrolling="no"></iframe></p>
1 month ago
5 
