<p><strong>Sathya Sai District Temple Land Encroachment: </strong>శ్రీసత్యసాయి జిల్లాలోని సుప్రసిద్ధ పుణ్యక్షేత్రం, కదిరి శ్రీ లక్ష్మీనరసింహ స్వామివారి ఆలయ కోనేరు భృగుతీర్థం పునర్నిర్మాణం , మరమ్మతుల పేరుతో కోట్ల రూపాయల నిధులు పక్కదారి పట్టాయంటూ అధికార కూటమికి చెందిన ప్రజాప్రతినిధులు, సీనియర్ నేతలు తీవ్ర ఆరోపణలు గుప్పించారు. బీజేపీ సీనియర్ నేత యస్. విష్ణువర్ధన్ రెడ్డి, జనసేన నాయకుడు బైరవ ప్రసాద్, తెలుగుదేశం పార్టీ నేతలు నాగేంద్ర ప్రసాద్ , సోమ్లా నాయక్‌లు కోనేరును సందర్శించారు. దేవుడి సొమ్మును అధికారులు, కాంట్రాక్టర్లు కుమ్మక్కై నిలువునా దోచేశారని మండిపడ్డారు.</p>
<p><strong>ఆలయ సొమ్ము రూ. ఆరు కోట్ల లూఠీ</strong></p>
<p>ఆలయ కోనేరు మరమ్మతుల పేరుతో రెండు దశల్లో దాదాపు రూ. 6 కోట్ల రూపాయల భక్తుల కానుకల నిధులను లూటీ చేశారు. సాధారణంగా ఆరు నెలల కాలంలో పూర్తి కావాల్సిన కోనేరు పనులను, గత ఆరు సంవత్సరాలుగా సాగదీస్తూ దేవాదాయ శాఖ అధికారులు, బినామీ కాంట్రాక్టర్ల అవతారమెత్తారని ధ్వజమెత్తారు. ఆలయంలో అదనపు నిర్మాణాల పేరిట నామినేషన్ పద్ధతిలో పనులను కట్టబెట్టి, కమీషన్ల కోసం నిత్యం దోపిడీకి తెరలేపారని ఆరోపించారు. చివరకు గతంలో వరదలు వచ్చినప్పుడు పనులు చేశామంటూ తప్పుడు బిల్లులు సృష్టించి ప్రభుత్వ నిధులను సైతం దుర్వినియోగం చేశారని ఆరోపించారు. </p>
<p><strong>పూర్తి కాని కోనేరు పనులు</strong></p>
<p>అధికారుల నిర్లక్ష్యం, కాంట్రాక్టర్ల అవినీతి కారణంగా పురాతన కోనేరు పనులు పూర్తి కాకపోగా.. ఆలయం చుట్టూ ఉన్న దేవుడి విలువైన ఆస్తులు, భూములు కబ్జా అవుతున్నా దేవాదాయ శాఖ అధికారులు నిమ్మకు నీరెత్తినట్లు వ్యవహరిస్తున్నారని నేతలు ఆగ్రహం వ్యక్తం చేశారు. సరైన డ్రైనేజీ , రక్షణ చర్యలు తీసుకోకపోవడం వల్లే, ఈ మధ్య కురిసిన భారీ వర్షపు నీరంతా ఏకంగా ప్రధాన ఆలయం లోకి చేరిందని, ఇది భక్తుల మనోభావాలను తీవ్రంగా గాయపరిచిందని ఆవేదన వ్యక్తం చేశారు. ఆలయంలో జరుగుతున్న అక్రమాలపై సమాచార హక్కు చట్టం కింద పది మందికి పైగా భక్తులు వివరాలు కోరినా, అధికారులు సమాచారం ఇవ్వకుండా దాటవేస్తున్నారని దుయ్యబట్టారు. కేవలం నిర్మాణాల్లోనే కాకుండా, స్వామివారి నిత్య నైవేద్యం మరియు ప్రసాదాల పంపిణీ విషయంలోనూ అనేక అవకతవకలు జరుగుతున్నాయని ఆరోపించారు.</p>
<p><strong>విజిలెన్స్ విచారణ చేయించాలని డిమాండ్ </strong></p>
<p>ఈ చారిత్రాత్మక ఆలయ పవిత్రతను కాపాడటానికి , భక్తుల కానుకల నిధుల దోపిడీపై రాష్ట్ర ప్రభుత్వం వెంటనే స్పందించి ‘విజిలెన్స్ అండ్ ఎన్‌ఫోర్స్‌మెంట్’ విచారణకు ఆదేశించాలని కూటమి నేతలు ఒకేతాటిపై డిమాండ్ చేశారు. దేవుడి సొమ్మును అక్రమంగా తిన్న బినామీ అధికారులు, కాంట్రాక్టర్లపై కఠిన చర్యలు తీసుకోవాలని స్పష్టం చేశారు. కదిరి క్షేత్రంలో జరుగుతున్న ఈ మొత్తం అవినీతి అక్రమాలపై పూర్తి నివేదికతో త్వరలోనే రాష్ట్ర ముఖ్యమంత్రి నారా <a title="చంద్రబాబు" href="https://telugu.abplive.com/topic/Chandrababu" data-type="interlinkingkeywords">చంద్రబాబు</a> నాయుడు, దేవాదాయ శాఖ మంత్రిని కలిసి అధికారికంగా ఫిర్యాదు చేయనున్నట్లు బీజేపీ, జనసేన, <a title="టీడీపీ" href="https://telugu.abplive.com/topic/tdp" data-type="interlinkingkeywords">టీడీపీ</a> నేతలు ప్రకటించారు. </p>
<p><iframe class="vidfyVideo" style="border: 0px;" src="https://telugu.abplive.com/web-stories/health/people-with-fatty-liver-issues-must-do-this-without-fail-in-the-morning-249969" width="631" height="381" scrolling="no"></iframe></p>
4 months ago
6 
