<p>JD Vance Clarifies Visa Remarks: హెచ్-1బీ వీసా ఉద్యోగులను 'బానిసలు' అంటూ అమెరికా వైస్ ప్రెసిడెంట్ జేడీ వాన్స్ చేసిన వ్యాఖ్యలు తీవ్ర దుమారం రేపాయి. అయితే, తన కామెంట్స్‌పై వివరణ ఇస్తూ అలా మాట్లాడి ఉండకూడదని వాన్స్ అన్నారు. తాను చేసిన వ్యాఖ్యలను విదేశీ కార్మికులపై కాదని, వారిని దోపిడీ చేసే అమెరికన్ కంపెనీలు, లొసుగులున్న వీసా వ్యవస్థపైనేనని స్పష్టం చేశారు. ఈ సందర్భంగా తన భార్య ఉషా వాన్స్ భారతీయ మూలాలను, తన అత్తమామలపై ఉన్న ప్రేమను ఆయన గుర్తుచేసుకున్నారు.</p>
<h3>ఆ వ్యాఖ్యలు కంపెనీల దోపిడీ గురించే </h3>
<p>మిచిగాన్‌లోని ఫ్లాట్ రాక్‌లో జరిగిన సీబీఎస్ న్యూస్ టౌన్ హాల్‌లో జేడీ వాన్స్ మాట్లాడుతూ.. "నేను వాడిన బానిసలు పదం సరైంది కాకపోవచ్చు, అది పొరపాటున జరిగింది. కానీ నేను 'బానిసలు' అని H-1B వీసాదారులను విమర్శించలేదు. విదేశీ ఉద్యోగులను దోచుకునే కంపెనీల గురించి విమర్శించాను" అని చెప్పారు.</p>
<h3>భారతీయ అత్తమామల గురించి</h3>
<p>వలస విధానాలపై మాట్లాడుతున్న క్రమంలో జేడీ వాన్స్ తన కుటుంబం గురించి ప్రస్తావిస్తూ భావోద్వేగానికి లోనయ్యారు. తన కుటుంబం ఎక్కడి నుండి వచ్చిందో అందరికీ తెలుసన్నారు. సౌత్ ఇండియా నుంచి అమెరికాకు వచ్చి ఇక్కడ స్థిరపడిన తన అత్త, మామను తాను ఎంతగానో ప్రేమిస్తానని తెలిపారు. అమెరికాలోనే పుట్టి పెరిగిన వారి కుమార్తె (ఉషా వాన్స్) ఇవాళ అమెరికా 'సెకండ్ లేడీ'గా ఉన్నారన్నారు. ఆమెను చూసి తాను ఎంతో గర్వపడుతున్నానని, ఆమెను ఎంతో ప్రేమిస్తున్నానని చెప్పుకొచ్చారు.<br /><br />Also Read: <a title="అమెరికాలోని ప్రతి బిడ్డకు స్పేస్‌ఎక్స్ షేరు.. ఎలాన్ మస్క్ సంచలన ప్రకటన" href="https://telugu.abplive.com/news/world/elon-musk-pledges-spacex-shares-to-every-american-child-in-10-5-billion-dollars-plan-261888" target="_self">అమెరికాలోని ప్రతి బిడ్డకు స్పేస్‌ఎక్స్ షేరు.. ఎలాన్ మస్క్ సంచలన ప్రకటన</a></p>
<h3>వీసా వ్యవస్థలో మార్పులు అవసరం </h3>
<p>అమెరికన్లకు న్యాయం జరిగేలా, అదే సమయంలో దేశానికి ఉపయోగపడే నిపుణులైన విదేశీయులకు స్వాగతం పలికేలా వీసా విధానంలో మార్పులు అవసరమని వాన్స్ అభిప్రాయపడ్డారు. కొన్ని అమెరికన్ కంపెనీలు స్థానికులను తొలగించి, తక్కువ వేతనాలకే పనిచేసే విదేశీయులను నియమించుకుంటున్నాయని విమర్శించారు.H-1B వీసాపై వచ్చే విదేశీయులు తమ మనుగడ కోసం పూర్తిగా యజమానులపైనే ఆధారపడాల్సి వస్తుందని, కంపెనీలను ప్రశ్నిస్తే ఉద్యోగాలు పోయి తీవ్ర పరిణామాలు ఎదుర్కోవాల్సి వస్తుందనే భయంతో బానిసలాలా మిగిలిపోతున్నారని వాన్స్ ఆవేదన వ్యక్తం చేశారు.</p>
<p>విదేశీ ఉద్యోగుల గ్రీన్ కార్డుల కోసం అప్లై చేసుకునే కొన్ని ప్రోగ్రామ్‌ల నుంచి ఇండియన్ ఐటీ కంపెనీలతో సహా పలు సంస్థలను అమెరికా ఇటీవల సస్పెండ్ చేసింది. ఈ విధానం వల్ల స్థానిక అమెరికన్లకు ఉద్యోగాలు దక్కడం లేదని వాదిస్తూ.. వాన్స్ H-1B ఉద్యోగులను బానిసలు అంటూ మాట్లాడారు. దీనిపై పెద్ద ఎత్తున విమర్శలు రావడంతో తాజాగా ఆయన ఈ విధంగా క్లారిటీ ఇచ్చారు. <br /><br />Also Read: <a title=" అమెరికా వదిలి భారత్‌కు ఐటీ నిపుణులు - 2026లో ఆల్‌టైమ్ రికార్డు.. అసలు కారణాలివే!" href="https://telugu.abplive.com/news/us-tech-professionals-return-to-india-2026-h1b-visa-layoffs-reverse-brain-drain-261894" target="_self"> అమెరికా వదిలి భారత్‌కు ఐటీ నిపుణులు - 2026లో ఆల్‌టైమ్ రికార్డు.. అసలు కారణాలివే!</a></p>
1 week ago
2 
