<p><strong>IT Notice For UPI Transaction:</strong> విప్లవాత్మక మార్పు తెచ్చిన యూపీఐ లావాదేవీలు ఇప్పుడు ఆదాయపు పన్ను శాఖ నిఘాలో ఉన్నాయి. నిత్యం చిల్లర ఖర్చుల కోసం లేదా చిన్న వ్యాపారాల కోసం మనం చేసే యూపీఐ చెల్లింపులు, మన మొత్తం ఆర్థిక చిత్రాన్ని పారదర్శకంగా ఐటీ విభాగానికి అందిస్తున్నాయి. అయితే, ఈ డిజిటల్ సౌలభ్యం వెనుక దాగి ఉన్న పన్ను నిబంధనలను నిర్లక్ష్యం చేస్తే భారీ మూల్యం చెల్లించక తప్పదు.</p>
<h3>పాన్ కార్డుతో ప్రతిదీ లింక్ </h3>
<p>మీరు ఫోన్‌పే, గూగుల్‌పే లేదా పేటీఎం వంటి యూపీఐ యాప్‌లను ఉపయోగించినా, లేదా క్రెడిట్ కార్డులను వాడినా, మీ ప్రతి ఆర్థిక లావాదేవీ పాన్ కార్డుతో అనుసంధానమై ఉంటుంది. బ్యాంక్ ఖాతా తెరవాలన్నా కచ్చితంగా పాన్ కార్డు ఇవ్వాల్సిందే. ఈ పాన్ కార్డు ద్వారానే మీ జీతం, స్టాక్ మార్కెట్ పెట్టుబడులు, మ్యూచువల్ ఫండ్ లావాదేవీలు, మీ బ్యాంక్ ఖాతాలో పడే ప్రతి రూపాయి సమాచారం ఆదాయపు పన్ను శాఖకు చేరవేస్తుంది. ఈ ట్రాకింగ్ వ్యవస్థ అంతా ఆర్టిఫిషియల్ ఇంటెలిజెన్స్ (AI) లేదా 'బాట్' ద్వారా జరుగుతోంది.</p>
<h3>యూపీఐ ట్రాన్సాక్షన్ లిమిట్స్ ఏమిటి?</h3>
<p>సాధారణంగా, ఏడాది పొడవునా మీ యూపీఐ లావాదేవీల సంఖ్య 500 కంటే తక్కువగా ఉంటే ఆందోళన చెందాల్సిన అవసరం లేదు. అయితే, ఈ లావాదేవీల సంఖ్య 500 దాటి భారీ స్థాయికి చేరినట్లయితే, ఐటీ విభాగం మీ ఆదాయానికి, మీ ఖర్చులకు మధ్య మ్యాచ్ అవుతుందో లేదో పరిశీలిస్తుంది. ఈ రెండింటి మధ్య తేడా ఉంటే, మీకు నోటీసు వచ్చే ప్రమాదం పెరుగుతుంది.</p>
<p>ముఖ్యంగా, మీ వార్షిక యూపీఐ లావాదేవీలు ₹20 లక్షలు దాటితే, జీఎస్టీ (GST) విభాగం కూడా అప్రమత్తం అవుతుంది. ఎందుకంటే, ఇంత పెద్ద మొత్తంలో లావాదేవీలు వ్యాపార టర్నోవర్‌గా పరిగణిస్తారు. చిన్న చిన్న క్యాష్‌బ్యాక్‌లు లేదా రివార్డుల కోసం తరచుగా భారీ మొత్తంలో యూపీఐ లావాదేవీలు చేయడం ప్రమాదకరం.</p>
<h3>క్యాష్‌బ్యాక్ కూడా ఆదాయమే:</h3>
<p>చాలా మంది ప్రజలు యూపీఐ ద్వారా వచ్చే క్యాష్‌బ్యాక్‌లను లేదా రివార్డులను ఆదాయంగా పరిగణించరు. కానీ, మీరు ఏడాదిలో ₹5,000 కంటే ఎక్కువ క్యాష్‌బ్యాక్ లేదా రివార్డులు సంపాదిస్తే, అది కూడా మీ ఆదాయంగా పరిగణిస్తారు. దానికి పన్ను చెల్లించాల్సి ఉంటుంది. ఇది ఫిక్స్‌డ్ డిపాజిట్లపై వచ్చే వడ్డీ లాగే పన్ను పరిధిలోకి వస్తుంది.</p>
<h3>ఆదాయం కంటే ఖర్చు అధికమైతే:</h3>
<p>ఉదాహరణకు, మీ వార్షిక వేతనం నెలకు ₹42,000 ఉంది అనుకుందాం. కానీ మీరు ప్రతి నెలా యూపీఐ ద్వారా లక్ష రూపాయలు లేదా ₹1.5 లక్షలు ఖర్చు పెడుతున్నా లేదా లావాదేవీలు చేస్తున్నా, ఐటీ శాఖ దృష్టిలో మీరు అదనపు ఆదాయ వనరులను దాచిపెట్టిన వ్యక్తుల జాబితాలో చేరిపోతారు. మీ శాలరీ ఇన్కమ్ మాత్రమే చూపించి, రెంటల్ ఆదాయం, బిజినెస్ లేదా పాసివ్ ఇన్కమ్‌ లాంటి ఇతర ఆదాయ మార్గాలను ఐటీఆర్ ఫైలింగ్ సమయంలో చూపించకపోతే, ఈ వ్యత్యాసం నోటీసుకు దారి తీస్తుంది.</p>
<h3>వ్యాపారాలు జీఎస్టీ ట్రాకింగ్:</h3>
<p>వ్యాపార ఆదాయాన్ని సక్రమంగా చూపించకుండా, మీ వ్యక్తిగత సేవింగ్స్ ఖాతా ద్వారా భారీ యూపీఐ లావాదేవీలు నిర్వహిస్తే, ఐటీ శాఖ నోటీసులు పంపడానికి ఆటోమేటిక్ వ్యవస్థ సిద్ధంగా ఉంది. ఐటీఆర్ ఫైలింగ్ ద్వారా మీరు మీ ఆదాయ వనరులన్నింటినీ సక్రమంగా చూపించడం ద్వారా, తప్పు చేయకుండా ఉన్నంత వరకు మీరు ఎటువంటి జరిమానా చెల్లించాల్సిన అవసరం లేదు. కానీ మీ వద్ద సరైన ఆధారాలు లేకపోతే, 60% నుంచి 400% వరకు పెనాల్టీ కట్టాల్సి వస్తుంది. ఈ ఆటోమేటిక్ నోటీసులు చేసిన తప్పు జరిగిన ఎనిమిది సంవత్సరాలలో ఎప్పుడైనా రావచ్చు. కాబట్టి, ప్రతి ఒక్కరూ తమ డిజిటల్ లావాదేవీల పరిమితులు తెలుసుకోవడం అత్యంత అవసరం.</p>
2 months ago
3 
