<p>Police file new petition in Ibomma Ravi case: సినిమా పైరసీ కేసులో ప్రధాన నిందితుడు ఇమ్మడి రవిపై సైబర్ క్రైమ్ పోలీసులు మూడోసారి కస్టడీ కోరుతూ పిటిషన్ దాఖలు చేశారు. నాంపల్లి కోర్టు మూడు రోజుల అనుమతి ఇచ్చినప్పటికీ ఆశ్చర్యకరంగా, పోలీసులు రవిని కస్టడీలోకి తీసుకోకుండా మరో పిటిషన్ వేశారు. మూడు రోజులు సరిపోదని మరికొద్ది రోజుల పాటు అవసరం అని పిటిషన్ వేసారు. ఈ యూటర్న్ ' వెనుక రవి బెయిల్ పొందకుండా చేయాలనే వ్యూహమే ఉందని అతని తరపు న్యాయవాదులు అనుమానం వ్యక్తం చేస్తున్నారు.</p>
<p>ఐబొమ్మ, బప్పం టీవీ వంటి అక్రమ వెబ్‌సైట్‌ల ద్వారా తెలుగు సినిమాలను పైరసీ చేసిన ఆరోపణలపై రవిని అక్టోబర్ 17న హైదరాబాద్ కుకట్‌పల్లిలో అరెస్టు చేశారు. ఇప్పటివరకు రెండుసార్లు కస్టడీకి తీసుకుని పోలీసులు అతన్ని ప్రశ్నించారు. మొత్తం ఎనిమిది రోజుల ప్రశ్నల సమయంలో రవి తన సహచరులను కాపాడుకోవాలనే ఉద్దేశంతో పైరసీ , బెట్టింగ్ ప్రమోషన్‌కు స్వయంగా ఒప్పుకున్నాడని పోలీసులు పేర్కొన్నారు. అయితే, టెక్నికల్ అంశాలతో ముడిపడిన ఈ కేసులో బలమైన ఆధారాలు లభించాయా లేదా అనేది ఇంకా స్పష్టంగా లేదు.</p>
<p>పోలీసులు మూడోసారి కస్టడీ అనుమతి పొందినా, రవిని జైలు నుంచి తీసుకెళ్లకుండా మరో పిటిషన్ వేయడం విచిత్రమని అతని తరపు లాయర్లు అంటున్నారు. కస్టడీకి అనుమతి వచ్చినా మరిన్ని రోజుల అవసరం అని కస్టడీకి తీసుకోకపోవడం బెయిల్ విచారణను ఆలస్యం చేయాలనే ప్రయత్నమేనని భావిస్తున్నారు. ఈ పైరసీ కేసు కూడా టెలిగ్రామ్‌లో కొనుగోలు చేసిన మూలాలపై ఆధారపడి ఉంది. రవి పైరసీ చేయలేదని ఆయన టెలిగ్రామ్‌లోనే సినిమాలు కొన్నాడని పోలీసులు కూడా చెబుతున్నారు. అందుకే ఎక్కువ కాలం జైలులో ఉంచాలనే ఉద్దేశంతో పోలీసులు ఇలాంటి పిటిషన్లు వేస్తున్నారని అంటున్నారు. </p>
<p>ఇప్పటికే ఇమ్మడి రవి లాయర్లు కోర్టులో బెయిల్ పిటిషన్ దాఖలు చేశారు. కోర్టు మూడు రోజుల కస్టడీ అనుమతి ఇచ్చిన సమయంలోనే, కస్టడీ పూర్తయిన తర్వాత రవి బెయిల్ పిటిషన్‌పై విచారణ చేస్తామని స్పష్టం చేసింది. ఈ అనుమతి మేరకు పోలీసులు రవిని శనివారం నుంచి మూడు రోజుల పాటు ప్రశ్నించాల్సి ఉంది. అయితే, పోలీసులు ఈ అవకాశాన్ని వాడుకోకుండా, మరో నాలుగు కేసుల్లో అదనపు కస్టడీ కోరుతూ పిటిషన్ దాఖలు చేశారు. రవి నడిపిన పైరసీ నెట్‌వర్క్ పెద్దది. 65కి పైగా మిర్రర్ సైట్‌లు, హై-డెఫినిషన్ ప్రైవేట్ లీక్‌లు ఉన్నాయి. పూర్తి విచారణ కోసం మరిన్ని రోజులు అవసరం అని పోలీసులు చెబుతున్నారు. <br /> <br />ఈ కేసుపై అనేక రకాల చర్చలు జరుగుతున్నాయి. ఈ కేసు నిలబడదని కొంత మంది.. ఆధారాలు చూపించలేరని మరికొంత మంది చెబుతున్నారు. కానీ పోలీసులు మాత్రం సీరియస్ గా దర్యాప్తు చేస్తున్నారు. </p>
<p><iframe class="vidfyVideo" style="border: 0px;" src="https://telugu.abplive.com/web-stories/business/gratuity-even-after-working-for-a-year-here-are-the-new-calculations-229628" width="631" height="381" scrolling="no"></iframe></p>
1 hour ago
1 
