<p>Hyderabad Adulterated Food News | హైదరాబాద్: ఇతర రాష్ట్రాల వారితో పాటు విదేశీ పర్యాటకులకు సైతం హైదరాబాద్ పేరు చెప్పగానే బిర్యానీ, ఇతర వంటకాలు గుర్తుకొస్తాయి. కానీ నగరంలో జరుగుతున్న ఆహార కల్తీ, కుళ్లిన మాంసం గురించి తెలిస్తే ఇంకోసారి రెస్టారెంట్, హోటల్స్‌ పేరు చెబితనే వణికిపోతారు. సిటీ ప్రజల ఆరోగ్యాన్ని దెబ్బతీసే ఆహార కల్తీ ముఠాలపై హైదరాబాద్ సిటీ పోలీస్ ప్రత్యేక విభాగం హెచ్-ఫాస్ట్ (Hyderabad Food Adulteration Surveillance Team) ఉక్కుపాదం మోపుతోంది. అధిక లాభార్జన కోసం పాలు, అన్నం, పసిబిడ్డల పాలపొడితో సహా నిత్యావసరాలన్నింటినీ కల్తీ చేస్తున్నారు. </p>
<p><strong>ఆహార కల్తీపై హెచ్‌-ఫాస్ట్‌ ఉక్కుపాదం</strong></p>
<p>ప్రజల ఆయుష్షును తగ్గిస్తున్న ఈ ముఠాల ఆటకట్టించేందుకు ఈ ఏడాది మార్చి 19న హెచ్-ఫాస్ట్ రంగంలోకి దిగింది. జీహెచ్‌ఎంసీ, ఫుడ్‌ సేఫ్టీ, వెటర్నరీ విభాగాల అధికారులతో సంపూర్ణ సమన్వయం చేసుకుంటూ నిరంతర దాడులు, ఆకస్మిక తనిఖీలతో ఈ ప్రత్యేక విభాగం విజయవంతంగా 100 రోజులు పూర్తి చేసుకుంది. టాస్క్ ఫోర్స్ డీసీపీ నేతృత్వంలో 36 మంది సుశిక్షితులైన సిబ్బందితో సాగిన ఈ వంద రోజుల సమరంలో నగరవ్యాప్తంగా మొత్తం 185 కేసులు నమోదు చేసి, సుమారు 121.87 టన్నుల ప్రమాదకరమైన కల్తీ ఆహార పదార్థాలను స్వాధీనం చేసుకున్నారు.</p>
<p><strong>పండ్ల నుంచి అల్లం పేస్ట్ వరకు మొత్తం కల్తీనే..</strong><br />ఈ దాడుల్లో వెలుగుచూసిన నిజాలు నగరవాసులను విస్తుపోయేలా చేస్తున్నాయి. స్వార్థపరులు ప్రజల ప్రాణాలతో ఎలా ఆడుకుంటున్నారో స్వాధీనం చేసుకున్న పదార్థాల వివరాలే స్పష్టం చేస్తున్నాయి. పోలీసులు అత్యధికంగా రాజేంద్రనగర్ జోన్‌లో 55 కేసులు, గోల్కొండలో 44, సికింద్రాబాద్‌లో 35 చొప్పున కేసులు నమోదు చేశారు. ఇందులో నిత్యం వాడే కల్తీ అల్లం వెల్లుల్లి పేస్ట్‌కు సంబంధించి 27,024 కేజీల నకిలీ నిల్వలను, కృత్రిమ రసాయనాలతో పండ్లను మగ్గబెట్టే ముఠాల నుండి 25,845 కేజీల పండ్లను సీజ్ చేశారు. అలాగే 60 టన్నుల కంటే ఎక్కువ చికెన్ వ్యర్థాలు, 15 టన్నుల నాణ్యత లేని మాంసం, కల్తీ కోవా, నకిలీ టీ పొడి, కల్తీ పనీర్, నెయ్యి వంటి ఎన్నో ప్రమాదకర పదార్థాలను స్వాధీనం చేసుకున్నారు. వీటితో పాటు తదుపరి చర్యల నిమిత్తం మరో 247 కేసులను జీహెచ్‌ఎంసీ ఫుడ్ సేఫ్టీ విభాగానికి బదిలీ చేశారు. ఇందులో పనీర్ అవుట్‌లెట్లు, సమోసా కేంద్రాలు, వాటర్ ప్లాంట్లు ఉన్నాయి.</p>
<p>కల్తీ నిరోధంలో భాగంగా హైదరాబాద్ కమిషనరేట్ పరిధిలోని హోటళ్లు, రెస్టారెంట్లు, బేకరీల వ్యాపారులతో పోలీస్ ఉన్నతాధికారులు ఒక ప్రత్యేక సమావేశాన్ని ఏర్పాటు చేసి కఠినమైన మార్గదర్శకాలను జారీ చేశారు. ఫుడ్ మేనేజ్‌మెంట్స్, వ్యాపారులు ఎఫ్ఎస్ఎస్ఏఐ (FSSAI) లైసెన్స్ కలిగి ఉండాలని, సిబ్బంది గ్లౌజులు, మాస్కులు ధరించాలని, నిల్వల్లో First In, First Out పద్ధతిని పాటించాలని స్పష్టం చేశారు. ముఖ్యంగా హోటళ్లలో వాడిన నూనెను పదే పదే వాడకూడదని హెచ్చరించారు. ఈ తక్కువ రోజుల్లోనే హెచ్-ఫాస్ట్ బృందం దేశంలోనే ప్రత్యేక గుర్తింపు తెచ్చుకుందని హైదరాబాద్ సీపీ సజ్జనార్ అభినందించారు. ప్రస్తుతం ప్రజల నుండి కూడా పెద్ద ఎత్తున మద్దతు లభిస్తోందని, ప్రతి రోజు సగటున 15 వరకు కల్తీ ఆహార సమాచారాన్ని అందిస్తున్నారని ఆయన తెలిపారు.</p>
<p><strong>8712661212 కు వాట్సాప్ లేదా ఫోన్ చేయండి..</strong><br />ఆహార కల్తీని కేవలం ఒక వ్యాపార మోసంగా చూడలేమని, ఇది ప్రజల ప్రాణాలతో ఆడుకునే ఒక ఘోరమైన హత్యాయత్నం లాంటిదని సజ్జనార్ తీవ్రంగా హెచ్చరించారు. ప్రజల కిడ్నీలను పాడుచేస్తూ, క్యాన్సర్, గుండె జబ్బుల వంటి తీవ్రమైన వ్యాధులను పంచుతున్న కల్తీ మాఫియాపై అవసరమైతే పీడీ యాక్ట్ (PD Act) ప్రయోగిస్తామని స్పష్టం చేశారు. ఈ మహమ్మారిని అరికట్టడంలో పౌరుల భాగస్వామ్యం అత్యంత కీలకమని, పరిసరాల్లో ఎక్కడైనా ఆహార పదార్థాల కల్తీ జరుగుతున్నట్లు అనుమానం వస్తే వెంటనే డయల్ 100కి గానీ, హెచ్-ఫాస్ట్ నంబర్ 8712661212 కు <a title="వాట్సాప్" href="https://telugu.abplive.com/topic/whatsapp" data-type="interlinkingkeywords">వాట్సాప్</a> లేదా ఫోన్ ద్వారా సమాచారం అందించాలని విజ్ఞప్తి చేశారు. సమాచారం అందించిన వారి వివరాలను పూర్తిగా గోప్యంగా ఉంచుతామని ఆయన హామీ ఇచ్చారు. </p>
<p> </p>
3 months ago
9 
