<p><strong>Easy Homemade Paneer Recipe : </strong>పనీర్ అనేది భారతీయ వంటకాల్లో ఎక్కువగా ఉపయోగించే పాల ఉత్పత్తుల్లో ఒకటి. పనీర్‌తో కర్రీలు, స్నాక్స్, సలాడ్లు, పరాటాలు వంటి రకరకాల వంటకాలు తయారు చేస్తారు. ఇది మార్కెట్లో సులభంగా లభించినప్పటికీ.. నాణ్యతపరంగా చాలా లోపాలు ఉంటాయి. తాజాగా హైదరాబాద్లో ఫేక్ పనీర్ను పట్టుకున్నారు ఫుడ్ సేఫ్టీ అధికారులు. ఈ నేపథ్యంలో పనీర్ బయట కొనాలన్నా.. తినాలన్నా చాలా ఆలోచించాల్సి వస్తుంది. అదే ఇంట్లోనే తయారు చేసుకుంటే.. పనీర్ మరింత తాజాగానూ, ఆరోగ్యకరంగానూ ఉంటుంది. పైగా ఎలాంటి కల్తీ పదార్థాల భయం ఉండదు. ఇంట్లోనే మెత్తగా, రుచికరంగా పనీర్ ఎలా తయారు చేసుకోవాలో ఇప్పుడు చూసేద్దాం. </p>
<h3>కావాల్సిన పదార్థాలు</h3>
<p>పాలు – 1 లీటర్ (ఫుల్ ఫ్యాట్ పాలు అయితే మంచిది)</p>
<p>నిమ్మరసం – 2 నుంచి 3 టేబుల్ స్పూన్లు (లేదా)</p>
<p>వెనిగర్ – 2 టేబుల్ స్పూన్లు</p>
<p>శుభ్రమైన ముస్లిన్ క్లాత్ లేదా పలుచని కాటన్ క్లాత్</p>
<h3>తయారీ విధానం</h3>
<p>ముందుగా స్టౌవ్ వెలిగించి మందపాటి గిన్నెలో పాలను వేసి మరిగించాలి. మీడియం మంటపై మరిగించి.. పాలు పూర్తిగా మరిగిన తర్వాత మంటను తగ్గించాలి. మరిగిన పాలలో కొద్దికొద్దిగా నిమ్మరసం లేదా వెనిగర్ వేస్తూ కలపాలి. కొన్ని సెకన్లలోనే పాలు విరిగి.. తెల్లటి ఘన పదార్థం, నీరు విడిపోతాయి. ఇప్పుడు ఒక గిన్నెపై మస్లిన్ క్లాత్ ఉంచి పాల మిశ్రమాన్ని అందులో పోయాలి. దీంతో పనీర్ గుడ్డలో మిగిలి.. నీరు కిందికి వెళ్లిపోతుంది.</p>
<p>పనీర్లో నిమ్మరసం లేదా వెనిగర్ రుచి, వాసన ఉంటుంది. అది పోవడానికి చల్లటి నీటితో పనీర్‌ను బాగా కడగాలి. క్లాత్ను మూటలా కట్టి అదనపు నీరు పూర్తిగా బయటకు వచ్చేలా పిండాలి. క్లాత్లో ఉన్న పనీర్‌పై ఒక ప్లేట్ పెట్టి దాని మీద కొద్దిగా బరువు ఉంచాలి. సుమారు 30 నుంచి 45 నిమిషాలు అలాగే ఉంచితే పనీర్ గట్టిపడుతుంది. ఇప్పుడు క్లాత్ తీసి పనీర్‌ను బయటకు తీసి కావాల్సిన ఆకారంలో ముక్కలుగా కట్ చేసుకోవాలి.</p>
<h3>పనీర్ మెత్తగా రావాలంటే ఫాలో అవ్వాల్సిన టిప్స్ </h3>
<p>ఫుల్ ఫ్యాట్ పాలను ఉపయోగిస్తే పనీర్ మరింత మెత్తగా వస్తుంది. నిమ్మరసం ఎక్కువగా వేయకండి. ఎక్కువైతే పనీర్ గట్టిగా మారుతుంది. బరువు ఎక్కువగా పెడితే పనీర్ గట్టిపడుతుంది. మెత్తగా కావాలంటే తక్కువ బరువు పెట్టండి. ఇలా తయారైన పనీర్‌ను చల్లటి నీటిలో 10 నిమిషాలు ఉంచితే మరింత సాఫ్ట్‌గా ఉంటుంది. </p>
<p>ఇలా ఇంట్లోనే సులభంగా, తక్కువ ఖర్చుతో తాజా పనీర్ తయారు చేసుకుని ఆరోగ్యకరమైన వంటకాలు సిద్ధం చేసుకోవచ్చు. పనీర్‌లోని ప్రోటీన్, కాల్షియం, ఫాస్ఫరస్, విటమిన్ B12 వంటి పోషకాలు శరీరానికి పుష్కలంగా ఉంటాయి. ఇది ఎముకల ఆరోగ్యానికి, కండరాల బలానికి, పిల్లల ఎదుగుదలకు ఉపయోగపడుతుందని నిపుణులు చెప్తున్నారు. </p>
<p><iframe class="vidfyVideo" style="border: 0px;" src="https://telugu.abplive.com/web-stories/lifestyle/fake-paneer-alert-smart-tips-to-identify-adulterated-paneer-250948" width="631" height="381" scrolling="no"></iframe></p>
4 months ago
10 
