<p><strong>Hexaware Technologies IPO News:</strong> స్టాక్ మార్కెట్‌లోకి మరో పెద్ద కంపెనీ అడుగు పెట్టబోతోంది. ముంబైకి చెందిన ఐటీ సేవల సంస్థ 'హెక్సావేర్ టెక్నాలజీస్ లిమిటెడ్', ప్రైమరీ మార్కెట్‌ కాలింగ్‌ బెల్‌ కొట్టేందుకు సిద్ధమైంది. ఈ కంపెనీ దాదాపు రూ.9 వేల కోట్ల భారీ IPO (Initial Public Offering) ఫిబ్రవరి 12 (బుధవారం) నుంచి ప్రారంభం కానుంది. ఆసక్తిగల పెట్టుబడిదారులు ఫిబ్రవరి 14 వరకు ఈ ఐపీఓ కోసం అప్లై చేసుకోవచ్చు.</p>
<p>ఇనీషియల్‌ పబ్లిక్‌ ఆఫరింగ్‌ కోసం, హెక్సావేర్ టెక్నాలజీస్‌, ఒక్కో IPO షేరుకు రూ. 674 - 708 ప్రైస్‌ బ్యాండ్‌ను ప్రకటించింది. ఫిబ్రవరి 11న జరిగే ప్రి-IPO విండోలో యాంకర్ ఇన్వెస్టర్లు పాల్గొంటారు.</p>
<p><strong>IPO ద్వారా రూ.8,750 కోట్లు సమీకరణ</strong><br />IPO ద్వారా, హెక్సావేర్ టెక్నాలజీస్ లిమిటెడ్‌ రూ.8,750 కోట్లు సమీకరించనుంది. ఈ IPO పూర్తిగా ఆఫర్ ఫర్ సేల్‌ (OFS)లో వస్తోంది. అంటే, కంపెనీలో ప్రస్తుతం ఉన్న పెట్టుబడిదారులు తమ షేర్లను అమ్మేస్తున్నారు. ఈ IPOలో కొత్త షేర్లు జారీ చేయడం లేదు. ఈ కంపెనీలో, ప్రమోటర్ CA మాగ్నమ్ హోల్డింగ్స్ 95.03 శాతం వాటాను కలిగి ఉంది. </p>
<p><strong>IPO లాట్‌ సైజ్‌ & లిస్టింగ్‌ డేట్‌</strong><br />హెక్సావేర్ టెక్నాలజీస్‌ IPOలో పెట్టుబడిదారులు కనీసం 21 షేర్లకు దరఖాస్తు చేసుకోవాలి. గరిష్ట ప్రైస్‌ బ్యాండ్‌ రూ.708 ప్రకారం, ఒక్కో లాట్‌ కోసం కనీసం రూ. 14,868 (708 x 21) పెట్టుబడి పెట్టాలి. రిటైల్ పెట్టుబడిదారులు గరిష్టంగా 13 లాట్లు లేదా 273 షేర్లకు దరఖాస్తు చేసుకోవచ్చు. అంటే, గరిష్టంగా రూ.1,93,284 వరకు పెట్టుబడి పెట్టవచ్చు. </p>
<p>IPO బిడ్డింగ్‌లో గెలుపొందిన పెట్టుబడిదార్లకు ఫిబ్రవరి 17న షేర్లు కేటాయిస్తారు. షేర్లు రాని వాళ్లకు ఫిబ్రవరి 18న డబ్బు వాపసు ఇస్తారు. అదే రోజున, విజయవంతమైన పెట్టుబడిదారుల డీమ్యాట్ ఖాతాలకు షేర్లు జమ చేస్తారు. </p>
<p>హెక్సావేర్ టెక్నాలజీస్ IPO 19 ఫిబ్రవరి 2025న స్టాక్ ఎక్స్ఛేంజీల్లో (BSE & NSE) లిస్ట్‌ అవుతుంది. </p>
<p><strong>ఐటీ రంగంలో అతి పెద్ద ఐపీఓ </strong><br />హెక్సావేర్ టెక్నాలజీస్ IPO ఐటీ రంగంలో అతి పెద్ద IPO అవుతుంది. టాటా గ్రూప్‌లోని ఐటీ కంపెనీ TCS, సుమారు 2 దశాబ్దాల క్రితం రూ. 4,713 కోట్ల IPOను తీసుకువచ్చింది. హెక్సావేర్ టెక్నాలజీస్ IPO ద్వారా రూ. 8,750 కోట్లు సేకరించనున్నారు. హెక్సావేర్ IPO TCS IPO కంటే దాదాపు 2 రెట్లు పెద్దది. </p>
<p><strong>హెక్సావేర్ టెక్నాలజీస్ రీఎంట్రీ</strong><br />హెక్సావేర్ టెక్ గతంలో స్టాక్ మార్కెట్‌లో లిస్ట్ అయింది. రెండు దశాబ్దాల క్రితం, జూన్ 2002లో ఇది లిస్ట్‌ అయింది. అయితే, దాదాపు 4 సంవత్సరాల క్రితం డీలిస్ట్‌ అయింది. పాత ప్రమోటర్ కంపెనీ బేరింగ్ ప్రైవేట్ ఈక్విటీ ఆసియా, 2020లో, హెక్సావేర్ టెక్‌ను ప్రైవేట్ కంపెనీగా మార్చాలని నిర్ణయించింది. అందువల్లే డీలిస్టింగ్‌ జరిగింది. కార్లైల్ గ్రూప్‌, 2021లో, బేరింగ్ ప్రైవేట్ ఈక్విటీ ఆసియా నుంచి హెక్సావేర్‌ను దాదాపు $3 బిలియన్లకు కొనుగోలు చేసింది.</p>
<p>Disclaimer: ఈ వార్త కేవలం సమాచారం కోసం మాత్రమే. ఏ పెట్టుబడి సాధనంలోనైనా పెట్టుబడి పెట్టాలని లేదా ఉపసంహరించుకోవాలని 'abp దేశం' చెప్పదు. </p>
<p>మరో ఆసక్తికర కథనం: <a title="ఈ ఏడాది బంగారం డిమాండ్‌ తగ్గొచ్చు - నగల రేట్లు దిగొచ్చే అవకాశం!" href="https://telugu.abplive.com/business/world-gold-council-predicts-demand-for-gold-and-gold-imports-smay-decline-in-2025-jewelry-prices-may-fall-196899" target="_self">ఈ ఏడాది బంగారం డిమాండ్‌ తగ్గొచ్చు - నగల రేట్లు దిగొచ్చే అవకాశం!</a> </p>
10 months ago
8 
