<p><strong>Hero Pleasure Plus Price And Features:</strong> Hero MotoCorp బ్రాండ్‌ నుంచి చాలా కాలంగా మార్కెట్లో ఉన్న స్కూటర్ Pleasure Plus. తేలికైన బాడీ, మంచి మైలేజ్, సామాన్యులు కూడా భరించగలిగే ధరతో యువత, మహిళల మధ్య ఈ స్కూటర్ మంచి పేరు సంపాదించింది. ప్రస్తుతం ఈ స్కూటర్ మూడు వేరియంట్లలో అందుబాటులో ఉంది, అవి - LX, VX, XTEC ZX. ఒక్కో వేరియంట్‌లో ఏమేం ఫీచర్లు ఉన్నాయి? ధర ఎంత? మీకు ఏది సరైన ఎంపిక అవుతుందో తెలుసుకుందాం.</p>
<h3>ఇంజిన్ విషయానికి వస్తే...</h3>
<p>మూడు వేరియంట్లలో కూడా ఒకే 109.5cc సింగిల్ సిలిండర్, ఎయిర్ కూల్డ్ ఇంజిన్ ఇచ్చారు. అంటే పవర్, పనితీరు పరంగా పెద్ద తేడా ఉండదు. ఫీచర్లు, సస్పెన్షన్, డిజైన్ అంశాల్లోనే తేడా ఉంటుంది.</p>
<h3>LX - బేస్ వేరియంట్</h3>
<p>LX అనేది Pleasure Plus లో బేస్ వేరియంట్. ఇందులో స్టీల్ వీల్స్ ఇస్తారు. టెలిస్కోపిక్ ఫ్రంట్ సస్పెన్షన్ ఉండదు. అలాగే Hero i3S ఐడిల్ స్టార్ట్ స్టాప్ సిస్టమ్ కూడా ఉండదు. బ్లూటూత్ కనెక్టివిటీ సదుపాయం కూడా ఇవ్వరు.</p>
<p>ఇన్‌స్ట్రుమెంట్ క్లస్టర్ పూర్తిగా అనలాగ్ రూపంలో ఉంటుంది. హెడ్‌ల్యాంప్స్‌ హాలోజన్ టైప్. క్రోమ్ ఫినిష్ ఉండే ఫ్రంట్ ఫాస్షియా కనిపిస్తుంది. కానీ పిలియన్ బ్యాక్‌రెస్ట్ ఉండదు. ఇన్నర్ ప్యానెల్ బ్లాక్ ఫినిష్‌లో ఉంటుంది.</p>
<p>ఎక్స్‌-షోరూమ్‌ ధర (ఆంధ్రప్రదేశ్ & తెలంగాణ): ₹65,473. అన్ని ఖర్చులు, పన్నులు కలుపుకుంటే తెలుగు రాష్ట్రాల్లో ఆన్‌-రోడ్‌ ధర దాదాపు ₹81,957 వరకు ఉంటుంది.</p>
<h3>VX - మధ్య వేరియంట్</h3>
<p>VX వేరియంట్ LX కంటే ఒక మెట్టు పై స్థాయిలో ఉంటుంది. ఇందులో టెలిస్కోపిక్ ఫ్రంట్ సస్పెన్షన్ ఇస్తారు. అలాగే కాస్ట్ అలాయ్ వీల్స్ కూడా ఉంటాయి. Hero i3S సిస్టమ్ కూడా ఇందులో అందిస్తారు.</p>
<p>ఇన్‌స్ట్రుమెంట్ క్లస్టర్ డిజి-అనలాగ్ రూపంలో ఉంటుంది. కానీ బ్లూటూత్ కనెక్టివిటీ ఇవ్వరు. హెడ్‌ల్యాంప్స్‌ మాత్రం హాలోజన్ టైప్‌గానే ఉంటాయి. LX మాదిరిగానే పిలియన్ (వెనుక కూర్చునేవారికి) బ్యాక్‌రెస్ట్ ఉండదు.</p>
<p>ఎక్స్‌-షోరూమ్‌ ధర (ఆంధ్రప్రదేశ్ & తెలంగాణ): ₹67,160, LX కంటే ₹1,613 ఎక్కువ. అన్ని ఖర్చులు కలుపుకుని, తెలుగు రాష్ట్రాల్లో ఆన్‌-రోడ్‌ ధర దాదాపు ₹84,295 వరకు ఉంటుంది.</p>
<h3>XTEC ZX - టాప్ వేరియంట్</h3>
<p>XTEC ZX ఈ లైనప్‌లో టాప్ వేరియంట్. ఇందులో టెలిస్కోపిక్ సస్పెన్షన్, కాస్ట్ అలాయ్ వీల్స్, i3S సిస్టమ్ ఉంటాయి. అదనంగా బ్లూటూత్ కనెక్టివిటీతో కూడిన పూర్తి డిజిటల్ ఇన్‌స్ట్రుమెంట్ క్లస్టర్ ఇస్తారు.</p>
<p>హెడ్‌ల్యాంప్స్‌ ప్రొజెక్టర్ LED టైప్. ఇన్నర్ ప్యానెల్ డ్యూయల్ టెక్స్చర్ ఫినిష్‌లో ఉంటుంది. ముఖ్యంగా ఈ వేరియంట్‌లో మాత్రమే పిలియన్ బ్యాక్‌రెస్ట్ అందిస్తారు.</p>
<p>ఎక్స్‌-షోరూమ్‌ ధర (ఆంధ్రప్రదేశ్ & తెలంగాణ): ₹75,501. ఇది VX కంటే ₹4,333 ఎక్కువ. అన్ని ఖర్చులు కలుపుకుని, తెలుగు రాష్ట్రాల్లో ఆన్‌-రోడ్‌ ధర దాదాపు ₹93,972 వరకు ఉంటుంది.</p>
<h3>ఏ వేరియంట్ తీసుకోవాలి?</h3>
<p>మీరు కేవలం తక్కువ బడ్జెట్‌లో స్కూటర్ కావాలనుకుంటే LX సరిపోతుంది. కొంచెం మంచి సస్పెన్షన్, అలాయ్ వీల్స్ కావాలంటే VX సరైన ఎంపిక. అయితే పూర్తి ఫీచర్లు, బ్లూటూత్, LED లైటింగ్ కావాలంటే XTEC ZX బెస్ట్ ఆప్షన్.</p>
<p>తెలుగు రాష్ట్రాల్లో నగర ప్రయాణాలకు ఈ స్కూటర్ మంచి ఆప్షన్‌. కొనుగోలు చేసే ముందు మీ అవసరం, బడ్జెట్, రోజువారీ వినియోగం చూసుకుని సరైన వేరియంట్ ఎంచుకుంటే మంచిది.</p>
<h3>ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.</h3>
1 month ago
6 
