<p>Cyclone Arnab | అమరావతి: అర్నబ్ తుపాను తీవ్రతను సమర్థవంతంగా ఎదుర్కొనేందుకు, తుపాను ప్రభావిత ప్రాంతాల్లో విద్యుత్ పునరుద్ధరణ పనులను వేగవంతం చేసేందుకు ఆంధ్రప్రదేశ్ రాష్ట్ర ప్రభుత్వం తెలంగాణ రాష్ట్ర సాయాన్ని కోరింది. ఆంధ్రప్రదేశ్ విద్యుత్ శాఖ మంత్రి గొట్టిపాటి రవికుమార్, ఇంధన శాఖ ముఖ్య కార్యదర్శి కె. విజయానంద్, తెలంగాణ విద్యుత్ శాఖ ప్రత్యేక ప్రధాన కార్యదర్శి నవీన్ మిట్టల్‌తో ఫోన్‌లో మాట్లాడారు. తుపాను వల్ల దెబ్బతిన్న విద్యుత్ వ్యవస్థను పునరుద్ధరించేందుకు అవసరమైన అదనపు విద్యుత్ సిబ్బందిని, సాంకేతిక పరికరాలను, ఇతర సామాగ్రిని ఏపీకి పంపాల్సిందిగా మంత్రి గొట్టిపాటి విజ్ఞప్తి చేశారు.</p>
<p>మంత్రి గొట్టిపాటి రవికుమార్ చేసిన అభ్యర్థనకు తెలంగాణ ప్రభుత్వం సానుకూలంగా స్పందించింది. అర్నబ్ తుపాను విపత్తు వేళ ఆంధ్రప్రదేశ్‌కు అండగా నిలిచేందుకు తెలంగాణ విద్యుత్ శాఖ ముందుకు వచ్చి, తక్షణమే అవసరమైన సిబ్బందిని, విద్యుత్ సామాగ్రిని ఏపీకి పంపేందుకు అంగీకారం తెలిపింది. ఈ సహకారం వల్ల తుపాను ప్రభావిత ప్రాంతాల్లో విద్యుత్ పునరుద్ధరణ పనులు మరింత వేగంగా పూర్తయ్యే అవకాశం లభించింది.</p>
<p>తెలంగాణ ప్రభుత్వంతో మాట్లాడిన అనంతరం మంత్రి గొట్టిపాటి ఏపీలోని తుపాను ప్రభావిత జిల్లాల కలెక్టర్లతో టెలీకాన్ఫరెన్స్ నిర్వహించారు. తుపాను సవాళ్లను సమర్థవంతంగా ఎదుర్కొనేందుకు కలెక్టర్లు నిరంతరం విద్యుత్ శాఖ అధికారులతో సమన్వయం చేసుకుంటూ పనిచేయాలని సూచించారు. విపత్తు సమయంలోనూ ప్రజలకు నిరంతరాయంగా విద్యుత్ సరఫరా అందించడమే తమ ప్రభుత్వ లక్ష్యమని మంత్రి స్పష్టం చేశారు.<br /><br /></p>
2 days ago
2 
